អាជ្ញាធររាជធានីភ្នំពេញ រៀបចំស្បៀងអាហារចែកជូនប្រជាពលរដ្ឋ និងកម្មករទីទ័លក្រជាង១ម៉ឺនគ្រួសារ

ភ្នំពេញ៖ អាជ្ញាធររាជធានីភ្នំពេញ ដោយការសហការជាមួយកម្លាំងកងទ័ពជើងគោកបាននិងកំពុងរៀបចំចាត់ចែងយកស្បៀងអាហារចុះទៅចែកជូនប្រជាពលរដ្ឋ និងកម្មករទីទ័លក្រជាង១ម៉ឺនគ្រួសារនៅថ្ងៃទី២៦ ខែមេសា នេះ ទៅតាមការណែនាំរបស់លោក ឃួង ស្រេង អភិបាលរាជធានីភ្នំពេញ ដោយក្រុមការងារទាំងអាជ្ញាធរខណ្ឌ ក៏ដូចជាកងកម្លាំងទាហានបានកំពុងដុតដៃដុតជើង ក្នុងការដឹកជញ្ជូនស្បៀងអាហារទៅតាមដាលគោលដៅខណ្ឌនីមួយៗដែលត្រូវប្រគល់ជូនប្រជាពលរដ្ឋដល់លំនៅដ្ឋាន ខណៈដែលពួកគាត់ត្រូវបានអាជ្ញាធររាជធានីភ្នំពេញធ្វើការបិទខ្ទប់
ដើម្បីទប់ស្កាត់នូវការរីករាលដាលជំងឺកូវីដ-១៩។

នេះបើតាមការបញ្ជាក់របស់លោក កើត ឆែ អភិបាលរងរាជធានីភ្នំពេញ ខណៈលោក ជាតំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ អញ្ជើញទទួលអំណោយពី លោក យុន ប៊ុនលី និងលោកស្រី ហៀវ លន់ សមាជិក សមាជិកា សមាគមកាយរឹទ្ធិនារីកម្ពុជា នៅសាលារាជធានីភ្នំពេញ នាព្រឹកថ្ងៃទី២៦ ខែមេសានេះ។
អំណោយដែលប្រគល់ជូនរដ្ឋបាលរាជធានីភ្នំពេញនេះ មានអង្ករចំនួន១៥តោន ដើម្បីយកទៅចាត់ចែងក្នុងការចូលរួមទប់ស្កាត់ការរីករាលដាលជំងឺកូវីដ-១៩ ខណៈជំងឺនេះ ពីមួយថ្ងៃទៅមួយថ្ងៃ នៅតែបន្តការរាលដាលឥតឈប់ឈរ។

ក្រៅពីការលើកឡើងខាងលើលោក កើត ឆែ បានមានប្រសាសន៍ ថ្លែងអំណរគុណយ៉ាងជ្រាលជ្រៅចំពោះលោក លោកស្រី ជាសប្បុរសជនដែលបានឧបត្ថម្ភមករដ្ឋបាលរាជធានីភ្នំពេញ ដែលនេះជាកាយវិការដ៏ប្រពៃប្រកបដោយមនុស្សធម៌ និងគុណធម៌ ដោយបានចូលរួមចំណែកយ៉ាង សំខាន់ជាមួយរដ្ឋបាលរាជធានីភ្នំពេញ និងរាជរដ្ឋាភិបាល ស្របតាមការអំពាវនាវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការចាត់វិធានការទប់ស្កាត់ការរីករាលដាលមេរោគកូវីដ-១៩ នៅរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជា បានទាន់ពេលវេលា៕

អត្ថបទ៖ ស្រីរ័ត្ន