ព័ត៌មានជាតិ

ពលរដ្ឋខ្មែរ១៦៤នាក់ ស្លាប់ក្នុងមួយថ្ងៃដោយសារជំងឺមិនឆ្លង

បានផុស

៤ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

ពលរដ្ឋខ្មែរប្រហែល ១៦៤នាក់ស្លាប់ក្នុងមួយថ្ងៃដោយសារជំងឺមិនឆ្លង ដែលស្ថានភាពស្ថិតក្នុងកម្រិតអាសន្ន។ ប្រធានគណៈកម្មការទី៨ សភាជាតិលោកស្រី ឡោក ខេង បានបង្ហាញពីក្ដីបារម្ភនេះ ខណៈអ្នកជំនាញវេជ្ញសាស្ត្រជំរុញឱ្យមានការផ្លាស់ប្តូរជាប្រព័ន្ធ តាំងពីការបង្កើតលំហសាធារណៈសម្រាប់ហាត់ប្រាណ រហូតដល់ការអប់រំឱ្យមានការយល់ដឹងស៊ីជម្រៅពីរបបអាហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ដែលផ្សព្វផ្សាយដោយសភាជាតិនៅថ្ងៃទី៤ ខែមេសានេះ ពលរដ្ឋខ្មែរប្រមាណ ៦ម៉ឺននាក់បានបាត់បង់ជីវិតដោយសារជំងឺមិនឆ្លងក្នុងមួយឆ្នាំៗ ឬប្រហែល១៦៤នាក់ក្នុងមួយថ្ងៃ លើសពីនេះប្រជាជនប្រមាណ២០%ប្រឈមនឹងហានិភ័យស្លាប់មុនអាយុ៧០ឆ្នាំ។

ថ្លែងក្នុងជំនួបមួយជាមួយអ្នកជំនាញផ្នែកវេជ្ជសាស្ត្រឥណ្ឌាលោកវេជ្ជបណ្ឌិត Gupta នៅវិមានរដ្ឋសភាថ្ងៃទី៣ ខែមេសា ឆ្នាំ២០២៦ ប្រធានគណៈកម្មការទី៨នៃរដ្ឋសភា លោកស្រី ឡោក ខេង បានបង្ហាញក្ដីបារម្ភពីស្ថានភាពនៃជំងឺមិនឆ្លងនៅកម្ពុជាបន្តកើនឡើង ទោះបីជាកម្ពុជាបានខិតខំផ្សព្វផ្សាយ និងណែនាំអំពីការផ្លាស់ប្តូររបបអាហារ និងរបៀបរស់នៅយ៉ាងសកម្មក៏ដោយ។

លោកស្រីបានស្នើឱ្យវេជ្ជបណ្ឌិត Gupta ចែករំលែកនូវបទពិសោធន៍ជោគជ័យ និងផ្តល់មតិយោបល់បច្ចេកទេសលើការទប់ស្កាត់ជំងឺ។ បន្ថែមពីនេះក៏បានសំណូមពរឱ្យភាគីឥណ្ឌា ជួយបណ្តុះបណ្តាលជំនាញឯកទេស និងការប្រើប្រាស់ឧបករណ៍ បរិក្ខារពេទ្យទំនើបៗ ដល់ គ្រូពេទ្យកម្ពុជា ដើម្បីពង្រឹងសមត្ថភាពព្យាបាលឱ្យកាន់តែប្រសើរផងដែរ។

លោកវេជ្ជបណ្ឌិត Gupta បានកោតសរសើរចំពោះភាពម្ចាស់ការ និងគំនិតផ្តួចផ្តើមរបស់រដ្ឋសភាកម្ពុជា។ លោកបានគូសបញ្ជាក់ថា ជំងឺមិនឆ្លងមិនត្រឹមតែជាបញ្ហាសុខភាពបុគ្គលប៉ុណ្ណោះទេ ប៉ុន្តែវាគឺជាបន្ទុកសកលដែលបំផ្លាញធនធានមនុស្សយ៉ាងធ្ងន់ធ្ងរ។

លោកបានសង្កត់ធ្ងន់ថា៖ «យើងត្រូវផ្លាស់ប្តូរជាលក្ខណៈប្រព័ន្ធ តាំងពីការបង្កើតលំហសាធារណៈសម្រាប់ហាត់ប្រាណ រហូតដល់ការអប់រំឱ្យមានការយល់ដឹងស៊ីជម្រៅពីរបបអាហារ»។

លោកវេជ្ជបណ្ឌិត ក៏បានបង្ហាញក្ដីរីករាយក្នុងការសហការបណ្តុះបណ្តាលគ្រូពេទ្យឯកទេសនៅកម្ពុជា ដោយក្នុងដំណើរទស្សនកិច្ចនេះ លោកក៏មានកម្មវិធីចែករំលែកបទពិសោធន៍បច្ចេកទេស ជាមួយគ្រូពេទ្យកម្ពុជាតាមមន្ទីរពេទ្យធំៗផងដែរ ដើម្បីរួមចំណែកលើកកម្ពស់សុខុមាលភាពប្រជាជនកម្ពុជាឱ្យកាន់តែល្អប្រសើរឡើង។

ជំងឺមិនឆ្លងគឺជាមូលហេតុនៃមរណភាពរបស់ប្រជាជននៅកម្ពុជាប្រមាណ ៦៤% ទៅ៦៧% ខណៈដែលជំងឺទាំងនោះរួមមាន ជំងឺបេះដូង សរសៃឈាម មហារីក ផ្លូវដង្ហើមរ៉ាំរ៉ៃ និងទឹកនោមផ្អែម។ ផ្អែកតាមការអង្កេត STEPS Survey កត្តាហានិភ័យសំខាន់ៗរួមមាន ការប្រើប្រាស់គ្រឿងស្រវឹង និងបារីនៅតែមានកម្រិតខ្ពស់, ការបរិភោគប្រៃលើសកម្រិត (មធ្យមភាគ ១០ក្រាម/ថ្ងៃ ដែលលើសពីការណែនាំរបស់ WHO ទ្វេដង) និងកង្វះសកម្មភាពរាងកាយ ឬការហាត់ប្រាណ៕