ក្រុមនិស្សិតមកពីNPIC ទទួលបានជ័យលាភីលេខ១ ក្នុងការប្រកួតរ៉ូបូតថ្នាក់ជាតិ និងក្លាយជាតំណាងកម្ពុជា ចេញទៅការប្រកួតកម្រិតអន្តរជាតិនៅហុងកុង

ឆ្លងកាត់ការប្រកួតយ៉ាងស្វិតស្វាញដោយមានសិស្ស-និស្សិតចំនួន ៨ក្រុម មកពីគ្រឹះស្ថានឧត្តមសិក្សា និងបណ្តុះបណ្តាលបច្ចេកទេសចំនួន៥បានចូលរួម  ព្រឹត្តិការណ៍ប្រកួតរ៉ូបូតថ្នាក់ជាតិ លើកទី១៣ ឆ្នាំ២០២៦ (ABU Robocon 2026) បានបិទបញ្ចប់ជាស្ថាពរ  ដោយម្ចាស់ជ័យលាភីលេខ១ បានទៅលើក្រុមនិស្សិតមកពីវិទ្យាស្ថានជាតិពហុបច្ចេកទេសកម្ពុជា (NPIC)។ ក្រុមជ័យលាភីលេខ១នេះ បានក្លាយជាក្រុមតំណាងឱ្យប្រទេសកម្ពុជា សម្រាប់ការប្រកួត ABU Robocon 2026 នៅទីក្រុងហុងកុង ប្រទេសចិន នាថ្ងៃទី២៣ ខែសីហា ឆ្នាំ២០២៦។

ឆ្លងកាត់ការប្រកួតដ៏តានតឹង និងជក់ចិត្ត ជាលទ្ធផលគណៈកម្មការបានស្វែងរកឃើញក្រុមជ័យលាភីចំនួន៣ ក្នុងនោះ ចំណាត់ថ្នាក់លេខ១ និងលេខ២ បានទៅលើក្រុមនិស្សិតមកពីវិទ្យាស្ថានជាតិពហុបច្ចេកទេសកម្ពុជា (NPIC១) និង NPIC ២ មកពីវិទ្យាស្ថានជាតិពហុបច្ចេកទេសកម្ពុជាដូចគ្នា ចំណែកចំណាត់ថ្នាក់លេខ៣ បានទៅលើក្រុម ITC២ មកពីវិទ្យាស្ថានបច្ចេកវិទ្យាកម្ពុជា។

ពិធីបិទការប្រកួតរ៉ូបូតថ្នាក់ជាតិ លើកទី១៣ ឆ្នាំ២០២៦ (ABU Robocon 2026) និងពិធីប្រគល់ពានរង្វាន់ជូនដល់អ្នកទទួលជ័យលាភី បានធ្វើឡើងក្រោមអធិបតីភាពលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងមានការអញ្ជើញចូលរួមសំខាន់ៗពីមន្ត្រីជាន់ខ្ពស់នៃក្រសួងអប់រំ យុវជន និងកីឡា ក្រសួងព័ត៌មាន និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាល្ងាចថ្ងៃអាទិត្យ ទី៥ ខែកក្កដា ឆ្នាំ២០២៦ នៅសាកលវិទ្យាល័យភូមិន្ទភ្នំពេញ។

អគ្គនាយកទូរទស្សន៍ជាតិកម្ពុជា លោក ឃឹម វុទ្ធី បានលើកឡើងថា ក្រុមទទួលបានជ័យលាភីលេខ១ ប្រចាំកម្ពុជានាការប្រកួតឡើកនេះ ត្រូវធ្វើជាតំណាងជាតិ ទៅចូលរួមការប្រកួតប្រជែងកម្រិតអន្តរជាតិ ABU Robocon 2026 នៅទីក្រុងហុងកុង ប្រទេសចិន នាខែសីហា ឆ្នាំ២០២៦ ខាងមុខនេះ។ អ្វីដែលកាន់តែជក់ចិត្តនោះគឺការប្រកួតថ្នាក់អន្តរជាតិនឹងធ្វើឡើងក្រោមប្រធានបទ «ក្បាច់គុណកុងហ្វូ Kung Fu Quest» ដែលជាការរៀបចំឡើងដោយរួមបញ្ចូលគ្នាយ៉ាងអស្ចារ្យរវាងក្បាច់គុនបុរាណចិន និងបច្ចេកវិទ្យារ៉ូបូត AI។

អគ្គនាយក TVK បានបញ្ជាក់ថា ការប្រកួតនេះ មិនត្រឹមតែជាវេទិកាបង្ហាញសមត្ថភាពផ្នែកវិស្វកម្ម និងបច្ចេកវិទ្យារបស់យុវជនប៉ុណ្ណោះទេ ប៉ុន្តែថែមទាំងផ្តល់ឱកាសឱ្យសិស្ស-និស្សិតកម្ពុជាបានផ្លាស់ប្តូរ និងចែករំលែកបទពិសោធជាមួយយុវជនមកពីបណ្តាប្រទេសផ្សេងៗ ព្រមទាំងជួយបំផុស និងលើកទឹកចិត្តឱ្យយុវជនងាកមកសិក្សាលើវិស័យបច្ចេកវិទ្យា វិស្វកម្ម និងនវានុវត្តន៍កាន់តែច្រើន។

លោកក៏បានថ្លែងអំណរគុណដល់សាកលវិទ្យាល័យភូមិន្ទភ្នំពេញ និងក្រុមហ៊ុនដៃគូសហការរួមទាំងក្រុមការងារបច្ចេកទេសទាំងអស់ ដែលបានខិតខំប្រឹងប្រែងទាំងយប់ទាំងថ្ងៃដើម្បីឱ្យព្រឹត្តិការណ៍នេះលេចចេញជារូបរាងឡើងប្រកបដោយមោទនភាព។

កម្មវិធីនេះរៀបចំឡើងក្នុងគោលបំណងជំរុញការសិក្សា ការស្រាវជ្រាវ និងការច្នៃប្រឌិតរបស់យុវជនកម្ពុជា ព្រមទាំងជ្រើសរើសក្រុមដែលមានសមត្ថភាពខ្ពស់បំផុត ដើម្បីតំណាងឱ្យព្រះរាជាណាចក្រកម្ពុជា ទៅចូលរួមការប្រកួតរ៉ូបូត កម្រិតអាស៊ី-ប៉ាស៊ីហ្វិក (Asia-Pacific Robot Contest) នាពេលខាងមុខ។

ការប្រកួតនេះ មិនត្រឹមតែជាវេទិកាបង្ហាញសមត្ថភាពផ្នែកវិស្វកម្ម និងបច្ចេកវិទ្យារបស់យុវជនប៉ុណ្ណោះទេ ប៉ុន្តែថែមទាំងផ្តល់ឱកាសឱ្យសិស្ស-និស្សិតកម្ពុជាបានផ្លាស់ប្តូរ និងចែករំលែកបទពិសោធជាមួយយុវជនមកពីបណ្តាប្រទេសផ្សេងៗ ព្រមទាំងជួយបំផុស និងលើកទឹកចិត្តឱ្យយុវជនងាកមកសិក្សាលើវិស័យបច្ចេកវិទ្យា វិស្វកម្ម និងនវានុវត្តន៍កាន់តែច្រើន។

គួរឱ្យដឹងថា ការប្រកួតរ៉ូបូតថ្នាក់ជាតិ ឆ្នាំ២០២៦នេះ មានការចូលរួមពីសិស្ស-និស្សិតចំនួន ៨ក្រុម មកពីគ្រឹះស្ថានឧត្តមសិក្សា និងបណ្តុះបណ្តាលបច្ចេកទេសចំនួន ៥រួមមាន៖ វិទ្យាស្ថានជាតិពហុបច្ចេកទេសកម្ពុជា (NPIC) វិទ្យាស្ថានជាតិបណ្តុះបណ្តាលបច្ចេកទេស (NTTI) វិទ្យាស្ថានពហុបច្ចេកទេសព្រះកុសុមៈ (PPI) វិទ្យាស្ថានបច្ចេកវិទ្យាកម្ពុជា (ITC) និងសាកលវិទ្យាល័យជាតិគ្រប់គ្រង (NUM)៕