យុវសិស្ស​កម្ពុជាដណ្តើម​បាន​ជយ​លាភីលេខ ២ ប្រកួតរ៉ូបូត​អន្តរជាតិ​នៅប្រទេសក្រិក

ក្រុមសិស្សវិទ្យាល័យកម្ពុជាដែលមានសមាជិក ៩ នាក់ បានទទួលជយលាភលេខ ២ ក្នុងការ​ប្រកួតរ៉ូបូតអន្តរជាតិ FIRST Global Challenge នៅទីក្រុងអាតែន ប្រទេសក្រិក ពីថ្ងៃទី២៦ ដល់ថ្ងៃទ២៩ ខែកញ្ញា ឆ្នាំ២០២៤ តាមរយៈកា​បង្ហាញពីជំនាញដ៏ល្អក្នុងការបង្កើតរ៉ូបូត នៅក្នុងការប្រកួតប្រជែងជាមួយក្រុមសិស្សមកពីជាង ១៩០ ប្រទេស។

ការប្រកួតរ៉ូបូតអន្តរជាតិ FIRST Global Challenge ឆ្នាំ២០២៤ ក្រោមប្រធានបទ “Refuel the Future” ត្រូវដោះស្រាយបញ្ហាថាមពលសាកលតាមរយៈបច្ចេកវិទ្យារ៉ូបូត ដោយលើកកម្ពស់ការអនុវត្តប្រកបដោយនិរន្តរភាព។

ក្រុមយុវសិស្សកម្ពុជាបានចំណាយពេលជាច្រើនខែដើម្បីបង្កើតរ៉ូបូត ដែលបង្ហាញពីភាពច្នៃប្រឌិតនិងការសហការគ្នា ដែល​បង្ហាញ​​ពី​ជំនាញសំខាន់ៗដូចជាជំនាញទំនាក់ទំនង ការធ្វើការជាក្រុម និងការដោះស្រាយបញ្ហាជាដើម។ ជោគជ័យនេះ​ ក៏​ជំរុញ​ឲ្យ​ក្រុមយុវជនកម្ពុជា​បង្ហាញការប្តេជ្ញាចិត្តក្នុងការជំរុញបច្ចេកវិទ្យារ៉ូបូតនៅកម្ពុជា។

នៅ​​ក្នុង​ពិធី​ជួប​សំណេះសំណាល​ជាមួយ​ក្រុម​យុវជន​កម្ពុជា​ដែលដណ្តើម​បាន​ជយលាភី​លេខ ២ នៅ​ប្រទេស​ក្រិក លោក ដាវ អានសាន រដ្ឋលេខាធិការ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បាន​លើកឡើងពីសារៈសំខាន់នៃវិទ្យាសាស្ត្រ និងបច្ចេកវិទ្យាសម្រាប់អនាគតរបស់កម្ពុជា។

តាមរយៈ​ការ​សម្រេច​បាន​លទ្ធផល​ដ៏ធំធេងរបស់​យុវជនកម្ពុជា ​ដែលមានសមត្ថភាព​​ដណ្តើក​ជយលាភី​ការ​ប្រកួតប្រជែង​កម្រិត​អន្តរជាតិនេះ​ លោក ដាវ អានសាន​ ក៏បានលើកទឹកចិត្តដល់យុវជន​កម្ពុជា​ឱ្យបន្តស្មារតីនៃការប្រកួតប្រជែង និងខិតខំប្រឹងប្រែង ដើម្បីឧត្តមភាពថ្មីៗបន្ថែមទៀត ដោយលើកឡើងពីតួនាទីរបស់ពួកគេក្នុងការសម្រេចចក្ខុវិស័យកម្ពុជាឆ្នាំ២០៥០៕