គណៈកម្មការផ្សារទួលទំពូង សហការជាមួយមន្ត្រីជំនាញ (កបប) ចុះត្រួតពិនិត្យសុវត្ថិភាពផលិតផល និងចំណីអាហារ  

ដើម្បីធានាបាននូវសុខុមាលភាព និងសុវត្ថិភាពរបស់ប្រជាពលរដ្ឋជាអ្នកប្រើប្រាស់ គណៈកម្មការផ្សារទួលទំពូង បានសហការជាមួយក្រុមការងារ នៃ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) បានចុះត្រួតពិនិត្យសុវត្ថិភាពផលិតផល និងចំណីអាហារជាច្រើនប្រភេទ នៅក្នុងបរិវេណផ្សារទួលទំពូង និងនៅតាមតូបលក់ដូរនានាផងដែរ។

នៅក្នុងការចុះត្រួតពិនិត្យនោះ ក្រុមការងារជំនាញបានផ្តោតសំខាន់ទៅលើការស្វែងរកសារធាតុគីមីហាមឃាត់ ដែលអាចមានផ្ទុកនៅក្នុងបន្លែ ផ្លែឈើ សាច់ និងគ្រឿងសមុទ្រ ព្រមទាំងពិនិត្យមើល ការហួសកាលបរិច្ឆេទ ប្រើប្រាស់លើទំនិញវេចខ្ចប់ស្រាប់ ដែលអាចបង្កគ្រោះថ្នាក់ដល់សុខភាពអ្នកបរិភោគ។

ជាមួយគ្នានេះ មន្ត្រីជំនាញ និងគណៈកម្មការផ្សារ ក៏បានធ្វើការណែនាំ និងអប់រំផ្សព្វផ្សាយបន្ថែមដល់អាជីវករទាំងអស់ ឱ្យយល់ដឹងកាន់តែច្បាស់អំពីច្បាប់ស្តីពីសុវត្ថិភាពម្ហូបអាហារ និងការទទួលខុសត្រូវក្នុងការលក់ដូរ ដោយត្រូវជៀសវាងដាច់ខាតនូវការប្រើប្រាស់សារធាតុគីមីខុសច្បាប់ ដើម្បីរួមគ្នាកសាងសង្គមមួយដែលមានសុខភាពល្អ និងសុវត្ថិភាពក្នុងការរស់នៅ៕