អាជីវករផ្សារទួលទំពូង ប្ដេជ្ញាពហិការមិនលក់ទំនិញ​​ថៃ ដោយសារការឈឺចាប់នឹងទង្វើឈ្លាន​ពាន

អាជីវករលក់ដូរនៅផ្សារទួលទំពូង បានប្ដេជ្ញាពហិការមិនលក់ដូរទំនិញរបស់ប្រទេសថៃទៀតនោះទេ ដោយសារការឈឺចាប់នឹងទង្វើឈ្លានពានរបស់ភាគីថៃ មកលើប្រទេសកម្ពុជា។

លោក ហ៊ុន សំរឹទ្ធ ជាអាជីវករលក់ដូរក្នុងផ្សារទួលទំពូង បានលើកឡើងថា លោកមិនលក់ដូរទំនិញថៃទៀតនោះឡើយ ព្រោះតែការឈឺចាប់លើទង្វើឈ្លានពាន រំលោភបំពាន និងមើលងាយឥតឈប់ពីសំណាក់ភាគីថៃ មកលើថ្នាក់ដឹកនាំ ក៏ដូចជាប្រជាជន និងប្រទេសកម្ពុជាទាំងមូល។ លោក ហ៊ុន សំរឹទ្ធ ថា ទោះអត់ទំនិញថៃលក់ ក៏ពួកគាត់មានទំនិញខ្មែរលក់ដើម្បីមានលទ្ធភាពផ្គត់ផ្គង់ជីវភាពគ្រួសារបានគ្រប់គ្រាន់ដែរ។ លោកសង្កត់ធ្ងន់ថា បច្ចុប្បន្នប្រជាពលរដ្ឋដែលចេញចូលផ្សារទួលទំពូង គឺបានចូលរួមពហិការ មិនប្រើប្រាស់ផលិតផលសៀមនោះឡើយ ខណៈដែលផលិតខ្មែរក៏មានគុណភាពល្អ។

លោក ចំរើន សុខលីម ប្រធានគណៈកម្មការគ្រប់គ្រងផ្សារទួលទំពូង យល់ឃើញថា ក្នុងកាលៈទេសៈដែលថៃបានបិទព្រំដែននេះ វាបានធ្វើឲ្យខ្មែរកាន់តែរឹងមាំ ពិសេសការងាកមកគាំទ្រលើផលិតផលក្នុងស្រុក ដែលវាជាខឿនដ៏រឹងមាំមួយ ក្នុងការជួយលើកស្ទួយដល់សេដ្ឋកិច្ចជាតិ និងប្រជាជនកម្ពុជាទាំងមូល។ ប្រធានគណៈកម្មការផ្សារបានបញ្ជាក់ថា ប្រទេសកម្ពុជាក្រោមការដឹកនាំរបស់សម្តេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត គឺបានអភិវឌ្ឍប្រទេសបានលឿន និងសង្ឃឹមជឿជាក់លើសម្តេច ដែលជ្រើសរើសដំណោះស្រាយបញ្ហាជំម្លោះព្រំដែនដោយសន្តិវិធី។

អ្នក​នាំពាក្យ​ព្រឹទ្ធសភា លោក ជា ធីរិទ្ធ កាលពីថ្ងៃទី១៥ ខែតុលា ឆ្នាំ២០២៥ បាន​ច្រាន​ចោល​ការ​លើក​ឡើង​របស់​លោក Surasan Kongsiri អ្នក​នាំ​ពាក្យ​ក្រសួង​ការពារជាតិថៃ ដែល​បាន​ថ្លែង​​​ថា សម្ដេចតេជោ ហ៊ុន សែន ប្រធាន​ព្រឹទ្ធសភា នៃព្រះរាជាណាចក្រ​កម្ពុជា បាន​ដាក់​សម្ពាធ​ឱ្យ​ប្រទេស​ថៃ​បើក​ច្រក​ព្រំដែន​នៅ​ថ្ងៃទី២០ តុលា ខាង​មុខ​នេះ។​

លោក ជា ធីរិទ្ធ បញ្ជាក់បន្ថែមថា កន្លងទៅ សម្ដេចតេជោ ធ្លាប់បានបញ្ជាក់ពីជំហររបស់សម្ដេច ជាបន្តបន្ទាប់ និងបានផ្សាយលើទំព័រហ្វេសប៊ុកផ្លូវការរបស់សម្ដេច កាលពីថ្ងៃទី២៣ ខែកញ្ញា ឆ្នាំ២០២៥ កន្លងទៅថ្មីៗនេះទៀតថា “ ចាប់តាំងពីយោធាថៃបិទព្រំដែនជាឯកតោភាគីមក កម្ពុជាមិនដែលបានសុំភាគីថៃបើកច្រកវិញទេ គ្រាន់តែប្រាប់ទៅភាគីថៃថា (ថៃជាអ្នកបិទ ថៃគឺជាអ្នកបើក មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ៥ម៉ោង)។ ជំហរកម្ពុជានេះ នឹងមិនផ្លាស់ប្តូរទេ ហើយកម្ពុជាក៏មិនធ្វើថោកទៅសុំឱ្យបើកច្រកព្រំដែននោះដែរ។ ថៃអាចបន្តបិទសូម្បី១០០ឆ្នាំទៀតក៏កម្ពុជាមិនស្លាប់ដែរ”៕

អត្ថបទ៖ សុភា