ចងចាំមិនភ្លេច! ២៤ កក្កដា ឆ្នាំ២០២៥៖ ថ្ងៃដែលយោធាថៃប្រើប្រាស់យន្តហោះចម្បាំង F-16 បើកការឈ្លានពានកម្ពុជា

ថ្ងៃទី២៤ ខែកក្កដា ឆ្នាំ២០២៦ គឺជាខួបមួយឆ្នាំនៃព្រឹត្តិការណ៍ដែលប្រជាជនកម្ពុជាមិនអាចបំភ្លេចបាន។ កាលពីថ្ងៃទី ២៤ ខែកក្កដា ឆ្នាំ ២០២៥ កងទ័ពថៃបានបើកការវាយប្រហារមកលើកងកម្លាំងការពារព្រំដែនកម្ពុជា និងពង្រីកការវាយប្រហារនៅតាមបណ្តោយតំបន់ព្រំដែន ដែលនាំឱ្យមានការបាត់បង់ជីវិត ការខូចខាតទ្រព្យសម្បត្តិ និងការជម្លៀសប្រជាពលរដ្ឋរាប់ម៉ឺននាក់ចេញពីលំនៅឋាន។

យោងតាមក្រសួងការពារជាតិកម្ពុជាដែលបានចងក្រងព្រឹត្តិការណ៍ឈ្លានពាននេះ ឱ្យដឹងថា នៅវេលាម៉ោងប្រមាណ ០៦:៣០នាទី ភាគីថៃបានចាប់ផ្តើមបង្កសកម្មភាពបំពានលើកិច្ចព្រមព្រៀងដែលបានឯកភាពគ្នាដោយឡើង​លើប្រាសាទតាមាន់ធំ ហើយលបចូលរាយលួសបន្លាតាមជើងប្រាសាទ។ បន្ទាប់មកនៅវេលាម៉ោង ០៧:០៤នាទី ភាគីថៃបានបង្ហោះ​ដ្រូនរយៈពេល ០២នាទី នៅតំបន់ជម្លោះ រហូតដល់ម៉ោង០៨:៣០នាទី ភាគីថៃបានធ្វើការបាញ់ឡើងលើ។

បន្ទាប់មកនៅវេលាម៉ោង ០៨:៤៦ នាទីព្រឹកកងទ័ពឈ្លានពាន​ថៃបានបើកការបាញ់ប្រហារមុនមកលើកងទ័ពកម្ពុជានៅតំបន់ប្រាសាទតា មាន់ធំ និងឈានទៅបាញ់ប្រហារនៅប្រាសាទតាក្របី តំបន់ភ្នំខ្មោច និងបានពង្រីកភូមិសាស្ត្រនៃការវាយប្រហារទៅដល់តំបន់មុំបីរួមទាំងប្រើប្រាស់យន្តហោះចម្បាំងប្រភេទF-16 បានទម្លាក់ចំនួន០២គ្រាប់នៅផ្លូវវត្តកែវសិក្ខគីរីស្វារៈវេលាម៉ោង ១០:៤០នាទីដែលបាននឹងកំពុងឈរជើងការពារបូរណភាពទឹកដីរបស់ខ្លួនក្នុងភូមិសាស្ត្រខេត្តឧត្តរមានជំ យ និងខេត្តព្រះវិហារ។

បន្ទាប់ពីទទួលរងការវាយប្រហារមុន កងកម្លាំងប្រដាប់អាវុធរបស់កម្ពុជាគ្មានជម្រើសអ្វីក្រៅពីប្រើប្រាស់សិទ្ធិការពារខ្លួនក្នុងដែនអធិបតេយ្យនិងបូរណភាពទឹកដីរបស់ខ្លួនប្រឆាំងនឹងការឈ្លានពានរបស់ទាហានថៃដែលបានបំពានលើ បូរណភាពទឹកដីកម្ពុជា បន្ទាប់ពីទទួលរងការវាយប្រហារមុនពីសំណាក់កងកម្លាំងយោធាថៃ។

ព្រឹត្តិការណ៍នៅថ្ងៃទី២៤ ខែកក្កដាបានក្លាយជាចំណុចរបត់មួយនៃភាពតានតឹងតាមបណ្តោយព្រំដែនកម្ពុជា-ថៃ ដែលបានបន្តអស់រយៈពេលជាច្រើនខែ បង្កឱ្យមានការខូចខាតហេដ្ឋារចនាសម្ព័ន្ធ សាលារៀន វត្តអារាម និងលំនៅឋានប្រជាពលរដ្ឋ ព្រមទាំងបង្ខំឱ្យប្រជាពលរដ្ឋជាច្រើនជម្លៀសទៅកាន់ទីតាំងមានសុវត្ថិភាព។ គិតមកត្រឹមថ្ងៃទី ២៤ ខែកក្កដា ឆ្នាំ ២០២៦ ពលរដ្ឋភៀសសឹកស្លូតត្រង់កម្ពុជាជាង ២ម៉ឺននាក់ នៅតែមិនទាន់អាចវិលត្រឡប់ទៅលំនៅឋានរបស់ពួកគេវិញដោយសារការរារាំងរបស់កងទ័ពថៃ។

មួយឆ្នាំក្រោយព្រឹត្តិការណ៍នេះ ប្រជាជនកម្ពុជានៅតែចងចាំថ្ងៃដ៏ឈឺចាប់មួយនេះ។ ការរំលឹកខួបមួយឆ្នាំ មិនមែនដើម្បីបង្កើនការស្អប់ខ្ពើម ឬជំរុញជម្លោះនោះទេ ប៉ុន្តែដើម្បីចងចាំប្រវត្តិសាស្ត្រ គោរពវិញ្ញាណក្ខន្ធអ្នកដែលបានបាត់បង់ជីវិត និងលះបង់ដើម្បីការពារមាតុភូមិ ព្រមទាំងរំលឹកពីតម្លៃនៃសន្តិភាព ដែលកម្ពុជាតែងតែប្រកាន់ខ្ជាប់ និងដោះស្រាយបញ្ហាតាមរយៈការចរចា និងច្បាប់អន្តរជាតិ។

ថ្ងៃទី២៤ ខែកក្កដា ឆ្នាំ២០២៥ នឹងបន្តត្រូវបានកត់ត្រាក្នុងប្រវត្តិសាស្ត្រកម្ពុជា ជាថ្ងៃដែលប្រជាជនខ្មែររួបរួមគ្នាការពារអធិបតេយ្យភាព បូរណភាពទឹកដី និងឯករាជ្យជាតិក្នុងគ្រាដែលប្រទេសជួបប្រទះការឈ្លានពានពីខាងក្រៅ៕