មន្ទីរពេទ្យកុមារជាតិ បំភ្លឺករណីទារកអាយុ៥ខែ ទទួលមរណភាពដោយជំងឺរលាកសួត និងឆ្លងរោគក្នុងឈាមធ្ងន់ធ្ងរ

មន្ទីរពេទ្យកុមារជាតិ នៅថ្ងៃនេះ បានចេញលិខិតបំភ្លឺជាផ្លូវការ ពាក់ព័ន្ធនឹងករណីកុមារាជាអ្នកជំងឺអាយុ ០៥ខែ ម្នាក់ ដែលបានទទួលមរណភាព ក្នុងអំឡុងពេលសម្រាកព្យាបាលនៅក្នុងមន្ទីរពេទ្យ កាលពីថ្ងៃទី២៣ ខែកក្កដា ឆ្នាំ២០២៦ កន្លងទៅនេះ ដែលបានចុះផ្សាយដោយគណនី ឈ្មោះ Muong RA កាលពីថ្ងៃទី២៤ ខែកក្កដា ឆ្នាំ ២០២៦

យោងតាមសេចក្តីបំភ្លឺរបស់មន្ទីរពេទ្យបានឱ្យដឹងថា ទារករងគ្រោះត្រូវបានក្រុមគ្រួសារបញ្ជូនមកសម្រាកព្យាបាលកាលពីថ្ងៃទី២២ ខែកក្កដា ឆ្នាំ២០២៦ ដោយទទួលបានការវិនិច្ឆ័យដំបូងថាមាន «ជំងឺរលាកសួតស្រួចស្រាវ»។ ចាប់តាំងពីពេលចូលសម្រាកព្យាបាល ក្រុមគ្រូពេទ្យបានខិតខំយកចិត្តទុកដាក់ពិនិត្យ តាមដាន និងព្យាបាលយ៉ាងយកចិត្តទុកដាក់ ស្របតាមគោលការណ៍បច្ចេកទេសវេជ្ជសាស្ត្រ។

ទោះបីជាយ៉ាងណាក៏ដោយ ជាការសោកស្តាយយ៉ាងខ្លាំង ទោះបីជាក្រុមគ្រូពេទ្យបានខិតខំប្រឹងប្រែងអស់ពីសមត្ថភាពយ៉ាងណាក៏ដោយ ក៏ស្ថានភាពជំងឺរលាកសួតរបស់កុមារា បានវិវត្តទៅរកភាពធ្ងន់ធ្ងរទៅៗ រហូតបាត់បង់ជីវិតនៅថ្ងៃទី២៣ ខែកក្កដា ឆ្នាំ២០២៦ វេលាម៉ោង ១០:៣៦ នាទី។ រោគវិនិច្ឆ័យចុងក្រោយបានបង្ហាញថា ទារកបានទទួលមរណភាពដោយសារ «រលាកសួតធ្ងន់ធ្ងរ និងមានការបង្កររោគក្នុងឈាមធ្ងន់ធ្ងរ ដែលបណ្ដាលឱ្យមានវិបត្តិលើប្រព័ន្ធរបត់ឈាម (Bronchopneumonia, unspecified organism and Severe Sepsis with Shock)»។

ពាក់ព័ន្ធនឹងករណីនេះ គណៈគ្រប់គ្រង និងក្រុមការងារបច្ចេកទេសនៃមន្ទីរពេទ្យកុមារជាតិ បានបញ្ជាក់ថា ស្ថាប័នកំពុងធ្វើការស្រាវជ្រាវ និងវាយតម្លៃយ៉ាងលម្អិតបន្ថែមទៀត ទៅលើដំណើរការព្យាបាលទាំងមូល ដោយឈរលើគោលការណ៍តម្លាភាព គណនេយ្យភាព និងស្របតាមនិយាមវិជ្ជាជីវៈវេជ្ជសាស្ត្រយ៉ាងម៉ឺងម៉ាត់។

រូបតំណាង

ជាមួយគ្នានេះដែរ គណៈគ្រប់គ្រង រួមទាំងក្រុមការងារថែទាំព្យាបាលនៃមន្ទីរពេទ្យកុមារជាតិ ទាំងមូល បានសម្តែងនូវការចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសព និងបានឧទ្ទិសបួងសួងឱ្យដួងវិញ្ញាណក្ខន្ធកុមារា បានទៅកាន់សុគតិភព កុំបីឃ្លៀងឃ្លាតឡើយ៕