អាជ្ញាធរខេត្តស្វាយរៀង និង អ.គ.ល.ក. ចុះពិនិត្យកាស៊ីណូក្រោន ដើម្បីធានាថាមិនជាប់ពាក់ព័ន្ធបទល្មើសផ្សេងៗ

ដើម្បីធានាថា គ្រប់ទីតាំងកាស៊ីណូដែលទទួលបានអាជ្ញាបណ្ណស្របច្បាប់ពី គ.ល.ក. ទាំងអស់ ពុំមានការលបលួចរៀបចំទីតាំង បម្រើឱ្យសកម្មភាពឆបោកតាមប្រព័ន្ធបច្ចេកវិទ្យា (Cyber Scam) ឬបទល្មើសផ្សេងៗទៀត អាជ្ញាធរខេត្តស្វាយរៀង សហការជាមួយ អគ្គលេខាធិការដ្ឋានគណៈកម្មការគ្រប់គ្រងល្បែងពាណិជ្ជកម្មកម្ពុជា (អ.គ.ល.ក.)ចុះពិនិត្យ និងវាយតម្លៃគុណភាពកាស៊ីណូក្រោន (CROWN) ក្នុងក្រុងបាវិត។

នាថ្ងៃទី២៤ ខែកក្កដា ឆ្នាំ២០២៦ លោក ម៉ែន អេង អភិបាលរង តំណាង លោក ប៉េង ពោធិ៍សា អភិបាល នៃគណៈអភិបាលខេត្តស្វាយរៀង បានសម្របសម្រួល និងដឹកនាំកិច្ចប្រជុំពិភាក្សាការងារ រួមជាមួយ លោកឧត្ដមសេនីយ៍ត្រី សេន សុភាព អគ្គលេខាធិការរង នៃអគ្គលេខាធិការដ្ឋានគណៈកម្មការគ្រប់គ្រងល្បែងពាណិជ្ជកម្មកម្ពុជា (អ.គ.ល.ក.) ដោយបានចុះពិនិត្យ និងវាយតម្លៃគុណភាព កាស៊ីណូ ក្រោន (CROWN) ដែលមានទីតាំងស្ថិតនៅក្នុងភូមិសាស្ត្រក្រុងបាវិត ខេត្តស្វាយរៀង។

ការចុះពិនិត្យនេះមានការអញ្ជើញចូលរួមពីសំណាក់ លោកព្រះរាជអាជ្ញារង អមសាលាដំបូងខេត្តស្វាយរៀង, លោកស្នងការរងនគរបាលខេត្ត, លោកអភិបាលក្រុងបាវិត ព្រមទាំងតំណាងអាជ្ញាធរដែនដី កងកម្លាំងប្រដាប់អាវុធ និងក្រុមការងារបច្ចេកទេសអន្តរក្រសួង-ស្ថាប័នពាក់ព័ន្ធជាច្រើនរូបទៀត។

បេសកកម្មចុះពិនិត្យ និងវាយតម្លៃនាពេលនេះ ត្រូវបានធ្វើឡើងក្នុងគោលបំណង ដើម្បីប្រមូល និងបច្ចុប្បន្នកម្មព័ត៌មានកាស៊ីណូទូទាំងប្រទេស សំដៅពង្រឹងប្រសិទ្ធភាពនៃការគ្រប់គ្រង និងទុកជាមូលដ្ឋានផ្លូវការ ក្នុងការពិនិត្យបន្តសុពលភាពអាជ្ញាបណ្ណអាជីវកម្មកាស៊ីណូ ប្រចាំឆ្នាំ២០២៦។ ជាពិសេស ដើម្បីធានាថា គ្រប់ទីតាំងកាស៊ីណូដែលទទួលបានអាជ្ញាបណ្ណស្របច្បាប់ពី គ.ល.ក. ទាំងអស់ ពុំមានការលបលួចរៀបចំទីតាំង បម្រើឱ្យសកម្មភាពឆបោកតាមប្រព័ន្ធបច្ចេកវិទ្យា (Cyber Scam) ឬបទល្មើសផ្សេងៗទៀត ដែលមានចែងក្នុងបទបញ្ជាលេខ ០១ បប ចុះថ្ងៃទី១៤ ខែកក្កដា ឆ្នាំ២០២៥ របស់រាជរដ្ឋាភិបាល ស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា។

ព្រមទាំង ដើម្បីវាយតម្លៃស្ថានភាពជាក់ស្តែងនៃវិស័យកាស៊ីណូនៅកម្ពុជា សម្រាប់ធ្វើជាធាតុចូលដ៏សំខាន់ ក្នុងការរៀបចំចក្ខុវិស័យ និងយុទ្ធសាស្ត្រអភិវឌ្ឍន៍វិស័យល្បែងពាណិជ្ជកម្មកម្ពុជា ឆ្នាំ២០៣០ ព្រមទាំងការរៀបចំនីតិវិធីប្រតិបត្តិស្តង់ដារ (SOP) សម្រាប់គ្រប់គ្រងវិស័យកាស៊ីណូឱ្យកាន់តែមានតម្លាភាព និងប្រសិទ្ធភាពខ្ពស់។

គួរបញ្ជាក់ផងដែរថា សកម្មភាពចុះពិនិត្យ និងវាយតម្លៃគុណភាពកាស៊ីណូនេះ នឹងត្រូវអនុវត្តជាបន្តបន្ទាប់នៅគ្រប់ទីតាំងកាស៊ីណូទាំងអស់ ក្នុងភូមិសាស្ត្រខេត្តស្វាយរៀង ដោយចាប់ផ្តើមអនុវត្តចាប់ពីថ្ងៃទី២២ ខែកក្កដា រហូតដល់ថ្ងៃទី០៩ ខែសីហា ឆ្នាំ២០២៦ ខាងមុខនេះ៕ អត្ថបទ៖ ភក្ដី