អភិបាលខណ្ឌជ្រោយចង្វារ ចុះពិនិត្យគម្រោងជួសជុលផ្លូវបេតុង ០១ ខ្សែ នៅសង្កាត់បាក់ខែង ដើម្បីធានាគុណភាពសំណង់ និង សុវត្ថិភាព ជូនពលរដ្ឋ

កាលពីថ្ងៃទី ២១ ខែកក្កដា ឆ្នាំ ២០២៦ ម្សិលមិញ លោក លីម សុភា អភិបាល នៃគណៈអភិបាលខណ្ឌជ្រោយចង្វារ បានដឹកនាំក្រុមការងារ និង មន្ត្រីពាក់ព័ន្ធ ចុះពិនិត្យវឌ្ឍនភាពការអនុវត្តគម្រោងជួសជុលផ្លូវបេតុង ០១ ខ្សែ ដែលមានប្រវែង ១១៣ ម៉ែត្រ ស្ថិតក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ដើម្បីធានាគុណភាពសំណង់ លើកកម្ពស់ហេដ្ឋារចនាសម្ព័ន្ធ និង សម្រួលការធ្វើដំណើររបស់ប្រជាពលរដ្ឋឲ្យកាន់តែងាយស្រួល មានសុវត្ថិភាព។

នាឱកាសចុះពិនិត្យនោះ លោកអភិបាលខណ្ឌ បានណែនាំដល់ក្រុមហ៊ុនទទួលសាងសង់ និង មន្ត្រីជំនាញ ត្រូវអនុវត្តការងារឲ្យបានត្រឹមត្រូវតាមលក្ខណៈបច្ចេកទេស ស្របតាមស្តង់ដារសំណង់ ដើម្បីធានាថា ផ្លូវដែលសាងសង់រួចមានគុណភាព ប្រើប្រាស់បានយូរអង្វែង និង អាចបម្រើផលប្រយោជន៍ប្រជាពលរដ្ឋបានយ៉ាងមានប្រសិទ្ធភាព។

លោកក៏បានបញ្ជាក់ថា ការអភិវឌ្ឍហេដ្ឋារចនាសម្ព័ន្ធផ្លូវថ្នល់ គឺជាកត្តាសំខាន់ក្នុងការជំរុញការអភិវឌ្ឍមូលដ្ឋាន ធ្វើឲ្យការដឹកជញ្ជូន ការធ្វើដំណើរ និង ការប្រកបរបរអាជីវកម្មរបស់ប្រជាពលរដ្ឋកាន់តែមានភាពងាយស្រួល ព្រមទាំងរួមចំណែកលើកកម្ពស់ជីវភាពរស់នៅផងដែរ។

ប្រជាពលរដ្ឋរស់នៅតំបន់ខាងលើ បានសម្តែងនូវការសប្បាយរីករាយ និង ថ្លែងអំណរគុណចំពោះអាជ្ញាធរខណ្ឌជ្រោយចង្វារ ដែលបានយកចិត្តទុកដាក់ដោះស្រាយបញ្ហាផ្លូវខូចខាត។ ពួកគាត់ បានលើកឡើងថា កន្លងមក ផ្លូវនេះមានសភាពបាក់ស្រុត និង ពិបាកធ្វើដំណើរ ជាពិសេសនៅរដូវវស្សា ដែលបង្កការលំបាកដល់ការធ្វើដំណើរ ការដឹកជញ្ជូន និង ការធ្វើអាជីវកម្មប្រចាំថ្ងៃ។

ប្រជាពលរដ្ឋ បានបន្តថា ក្រោយពេលគម្រោងជួសជុលរួចរាល់ នឹងជួយឲ្យការធ្វើដំណើរកាន់តែមានភាពងាយស្រួល សុវត្ថិភាព និង រួមចំណែកលើកសោភ័ណភាពក្នុងមូលដ្ឋានឲ្យកាន់តែល្អប្រសើរ៕
អត្ថបទ ៖ សំណាង