​វីដេអូថ្មី​មួយ​ទៀតនៅរោងចក្រ​យូលី១​ កម្មករ​​សម្រុក​ចេញពី​រោងចក្រ​ អាជ្ញាធរ​ហៅ​ជាការ​បញ្ចេញបញ្ចូល​​សម្លេង​ខុស​ការពិត

នៅល្ងាចថ្ងៃទី២៧ ខែឧសភា នេះ អាជ្ញាធរខេត្តស្វាយរៀង បានបញ្ចាក់ជូនដល់សាធារណៈជនអ្នកលេងបណ្តាញសង្គមហ្វេសប៊ុក ក៏ដូចជាអ្នកសារព័ត៌មានឆ្លើយតបទៅនឹងវីដេអូឃ្លីបមួយ ដែល​កេីតឡេីងនៅតំបន់សេដ្ឋកិច្ចពិសេស​សានតុងនៅ​ក្រុង​បាវិត ដែលកម្មករធ្វើដំណើរចាកចេញពីរោងចក្រយូលី១ ជាបន្តបន្ទាប់នៅថ្ងៃទី២៧​ ខែឧសភា​ ឆ្នាំ២០២១នេះ។

អាជ្ញាធរខេត្តបានបញ្ជាក់ថា ហេតុការណ៍​នេះ​គឺ​ជា​សកម្មភាព​កម្មករធ្វើចត្តាឡីស័ករួច​ ដែល​បានយកសំណាកជាលើកទី២ ហើយលទ្ធផលពួកគាត់អវិជ្ជមាន​ ទើប​ក្រុមការងារយកសំណាកនិងអាជ្ញាធរពាក់ព័ន្ធបានអនុញ្ញាត​ឲ្យ​ពួកគាត់ចាកចេញទៅលំនៅដ្ឋាន ដើម្បីធ្វេីចត្តាឡីស័កតាមដានសុខភាពបន្ត។

ដោយ​ឡែក អ្នកដែលរកឃើញវិជ្ជមាន ត្រូវបានក្រុមគ្រូពេទ្យបញ្ចូនទៅសម្រាកព្យាបាលនៅមណ្ឌលព្យាបាលជំងឺ​កូវីដ-១៩ នៅក្រុងបាវិត។

អាជ្ញាធរខេត្តបានហៅខ្សែវីដេអូថា ជាការបញ្ចេញបញ្ចូលសម្លេងដែលអ្នកថតវីដេអូនៅខាងក្រៅ ពេលកម្មកដើរចេញ និងអត្ថាធិប្បាយខុសពីអ្វីដែលអាជ្ញាធរ និងក្រុមគ្រូពេទ្យបានធ្វើការនៅខាងក្នុងផ្ទាល់ជាមួយកម្មករ។

អាជ្ញាធរខេត្តស្វាយរៀង បានផ្តាំផ្ញើដល់បងប្អូនកម្មករ កម្មការិនី ដែលទៅចត្តាឡីស័កនៅតាមផ្ទះ ប្រសិនបើមានរោគសញ្ញា​ដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ទៅធ្វេីតេស្តរកមេរោគ COVID-19 នៅទីតាំងជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ ខេត្ត ០៤៤ ៧១២ ៥៣២ ឬ ០៩៧ ៥០៣ ៤៥៦៧ ដើម្បីមានវិធានការណ៍បន្ត៕

អត្ថបទ៖ កោះកែវ