ស្លាប់ម្នាក់ រងរបួស៣នាក់ ដោយសារគ្រោះថ្នាក់ចរាចរណ៍ រថយន្តបុកម៉ូតូ

កំពត៖ មនុស្សម្នាក់បានស្លាប់ភ្លាមៗនៅកន្លែងកើតហេតុ និង៣នាក់ផ្សេងទៀតរងរបួស ដោយសារគ្រោះថ្នាក់ចរាចរណ៍រវាងរថយន្តនិងម៉ូតូបុកគ្នាពេញទំហឹង នៅលើដងផ្លូវជាតិលេខ៣ កំពត-ភ្នំពេញ។

គ្រោះថ្នាក់នេះ បានកើតឡើងនៅយប់ថ្ងៃទី២៩ ខែឧសភា ឆ្នាំ២០២១ វេលាម៉ោង១ និង០០នាទី រំលងអាធ្រាត ស្ថិតនៅចំនុចភូមិត្រពាំងច្រាប ឃុំថ្មី ស្រុកទឹកឈូ ចន្លោះបង្កោលគីឡូម៉ែត្រ១៣៧-១៣៨ លើផ្លូវជាតិលេខ៣ ក្នុងទិសដៅទិសដៅផ្ទុយគ្នា រវាងរថយន្តនិងម៉ូតូ។

ពាក់ព័ន្ធនឹងគ្រោះថ្នាក់នេះ សមត្ថកិច្ចបានឲ្យដឹងថា កាលពីវេលាដូចខាងលើ មានរថយន្តម៉ាក សាំយ៉ុង ទឹកប្រាក់ ពាក់ស្លាកលេខ ភ្នំពេញ 2AK-2162 បើកបរដោយឈ្មោះ ទង វិច្ឆិកា ភេទប្រុស អាយុ២៥ឆ្នាំ រស់នៅភូមិភ្ងា ឃុំអង្គប្រាសាទស្រុកគិរីវង្សខេត្តតាកែវមានអ្នករួមដំណើរ២នាក់ ១. ឈ្មោះ នូវ រ៉ា ភេទស្រីអាយុ ៤០ ឆ្នាំ ត្រូវជាម្តាយអ្នកបើកបររស់នៅភូមិឃុំជាមួយគ្នា ។ ២. ឈ្មោះ គឹម ហេង ភេទស្រីអាយុ ៤២ ឆ្នាំ រស់នៅភូមិក្រាំងរំដេង ឃុំស្រែជា ខាងត្បូងស្រុកដងទង់ខេត្តកំពត អ្នកទាំង ៣ រងរបួសស្រាល។ 

ដោយឡែក អ្នកស្លាប់ជិះម៉ូតូម្នាក់ឯងម៉ាក C125 ពណ៌ខ្មៅ ពាក់ស្លាកលេខកំពត 1K-9729. ផលិតឆ្នាំ2017 មានឈ្មោះ យ៉ាន់ បូ រ៉េត ភេទប្រុស អាយុ ៣១ ឆ្នាំ មានទីលំនៅ ភូមិដូនស៊យ ឃុំថ្មី ស្រុកទឹកឈូ កំពត បានស្លាប់នៅកន្លែងកើតហតុភ្លាមៗ។

បច្ចុប្បន្នវត្ថុតាងសមត្ថកិច្ចបានយកមករក្សាទុកនៅប៉ុស្តិនគរបាលរដ្ឋបាលភូមិថ្មី។ ចំណែកសពជនរងគ្រោះ ត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី៕

អត្ថបទ៖ សេង ណារិទ្ធ

ចុចអាន៖ បញ្ហា Depression ធ្វើឲ្យយុវតីម្នាក់សម្រេចបញ្ចប់ជីវិតខ្លួនឯងដោយបន្សល់ទុកត្រឹមពាក្យមួយម៉ាត់