ខេត្តចំនួន ៦ មានអត្រា​អ្នក​ពុលស្រា​ស​ និង​ស្រា​ថ្នាំ​ច្រើនជាងគេ ចាប់​ពី​ឆ្នាំ​២០១៦

ភ្នំពេញ៖ គិតចាប់ពីឆ្នាំ២០១៦ មកដល់ខែឧសភា ឆ្នាំ២០២១នេះ កម្ពុជាមានអ្នកបាត់បង់ជាជីវិត ដោយសារពុលស្រាស និងស្រាថ្នាំ សរុបចំនួន ៥០ នាក់ នៅតាមបណ្តាខេត្តចំនួន៦ ។

យោងសេចក្ដីជូនដំណឹង របស់អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម ស្ដីពីស្ថានភាពពុលស្រានៅក្នុងព្រះរាជាណាចក្រកម្ពុជា បានឱ្យដឹងថា ចាប់ពីឆ្នាំ២០១៦​ រហូតមកដល់ឆ្នាំ២០២០ មានករណីពុលស្រា ជាបន្តបន្ទាប់ចំនួន៤លើកនៅខេត្តពោធិ៍សាត់ ក្រចេះ បន្ទាយមានជ័យ កំពង់ឆ្នាំង ដែលបណ្តាលឱ្យមនុស្សស្លាប់ចំនួន២៨នាក់ និងមានពលរដ្ឋរងគ្រោះជាច្រើនទៀត។

ដោយឡែកក្នុងខែឧសភាថ្មីៗនេះ មានករណីពុលស្រាស និងស្រាថ្នាំ កើតមានឡើងនៅខេត្តចំនួន២ទៀត រួមមានខេត្តកណ្ដាលមានមនុស្សស្លានប់ចំនួន១០នាក់ និងខេត្តកំពត មានមនុស្សស្លាប់ចំនួន១២នាក់សរុបទាំង៦ខេត្ត មានប្រជាពលរដ្ឋចំនួន៥០នាក់ ស្លាប់បាត់បង់ជីវិត និងមានជនរងគ្រោះរាប់រយនាក់ផ្សេងទៀត រងផលប៉ះពាល់ដល់ សុខភាពត្រូវសម្រាកព្យាបាលនៅមន្ទីរពេទ្យ។

អគ្គនាយកដ្ឋាន ក.ប.ប. បានអំពាវនាវ ដល់ប្រជាពលរដ្ឋ ដែលជាអ្នកប្រើប្រាស់ សូមបង្កើនការប្រុងប្រយ័ត្នខ្ពស់មុននឹងទិញស្រាយកមកប្រើប្រាស់ ឬបរិភោគ សូមពិនិត្យនិងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់។

អគ្គនាយកដ្ឋាន ក.ក.ប បានពន្យល់ថា ស្រាគឺជាសារធាតុស្រវឹង ដែលបង្កផលប៉ះពាល់ដល់សុខភាពអ្នកបរិភោគជាប្រចាំ និងហួសកម្រិត។ ពិសេសជាងនេះទៀត នឹងបង្កផលប៉ះពាល់ដល់អាយុជីវិត ប្រសិនបើស្រានោះពុំបានផលិតឱ្យត្រឹមត្រូវតាមលក្ខណៈបច្ចេកទេស ឬយកសារធាតុផ្សេងទៀតមកបន្ថែម មានដូចជាមេតាណុល ឬសារធាតុពុល ផ្សេងទៀតជាដើម។

ជាទូទៅស្រាសដែលផលិតដោយការបិត (Distillation) ពីអង្ករតាមលក្ខណៈបច្ចេកទេសងាយៗ ឬតាមលក្ខណៈបុរាណ អាចមានបរិមាណសារធាតុមេតាណុលក្នុងកម្រិតតិចតួចប៉ុណ្ណោះ។ ចំពោះការរកឃើញ វត្តមានសារធាតុ មេតាណុលក្នុងកម្រិតខ្ពស់នោះ អាចបណ្តាលមកពីការទិញវត្ថុធាតុដើម (អាល់កុល) ដែលជាមេតាណុល មកលាយដើម្បីផលិតស្រា៕

អត្ថបទ៖ សំអឿន