ចំណូល​ពីការលក់បណ្ណ​ចូលទស្សនារមណីយដ្ឋាន​អង្គរទទួលបានជាង១៩ម៉ឺនដុល្លារ ក្នុងរយៈពេល៥ខែដំបូង

​រយៈពេល៥ខែ ឆ្នាំ២០២១ គ្រឹះស្ថានអង្គរ​​លក់​បណ្ណចូលទស្សនា​រមណីដ្ឋានអង្គរ​បាន​ចំនួន៤,៧៧៤នាក់ ដោយទទួលចំណូល១៩៧,២០៨ដុល្លារ ​ធ្លាក់ចុះ​៩៨.៩១ភាគរយ ធៀបនឹងរយៈពេល​ដូចគ្នាកាលពីឆ្នាំមុន​ នេះបើយោងតាមទិនិ្នន័យផ្លូវការរបស់គ្រឹះស្ថានអង្គរ ដែលចេញផ្សាយ​នាថ្ងៃទី១ ខែមិថុនា ឆ្នាំ២០២១នេះ។

ដោយឡែក សម្រាប់​ចំណូលពីការលក់បណ្ណចូលទស្សនារមណីដ្ឋានអង្គរក្នុងខែឧសភា ឆ្នាំ២០២១ ​បានត្រឹមតែ ៩,៩៩២ដុល្លារប៉ុណ្ណោះ ​ ​ធ្លាក់ចុះ​​៨៦.​១៣ភាគរយ ធៀបនឹង​រយៈពេលដូចគ្នាកាលពីឆ្នាំមុន​​។ យោងតាមក្រសួងទេសចរណ៍ ក្នុងខែឧសភា ឆ្នាំ២០២១ នៅទូទាំងប្រទេសកម្ពុជាទទួលបានភ្ញៀវទេសចរសរុប ១៩៤,០២៥ នាក់ ក្នុងនោះមានភ្ញៀវជាតិ ១៩១,៨២០ នាក់ និងភ្ញៀវបរទេសផ្ទៃក្នុង ២,២០៥ នាក់។

គួរបញ្ជាក់ថា រមណីយដ្ឋានគោលដៅទេសចរណ៍ និងមូលដ្ឋានអាជីវកម្មទេសចរណ៍ បានចាប់ផ្តើមបើកដំណើរឡើងវិញជាបណ្តើរៗ ចាប់ពីរាជរដ្ឋាភិបាលបានបើកដំណើរការរមណីយដ្ឋានទេសចរណ៍ឡើងវិញរហូតដល់ដំណាច់ចុងខែឧសភានេះ ដោយបានអនុវត្តយ៉ាងហ្មត់ចត់តាមវិធានការ «៣ កុំ» និង «៣ ការពារ» រួមជាមួយវិធានសុវត្ថិភាពទេសចរណ៍ក្នុងការទប់ស្កាត់ជំងឺកូវីដ-១៩៕

អត្ថបទ៖ កោះកែវ ​