ដីល្វឹងល្វើយដែលមេបញ្ជាការវរសេនាតូច ៨២៣ ទន្ទ្រាន ត្រូវប្រធានមន្ទីរបរិស្ថានដាក់ពាក្យប្តឹងសុំដកហូតជាសម្បត្តិរដ្ឋវិញ

ខេត្តបាត់ដំបង៖ ដីព្រៃដែលស្ថិតនៅក្បែរខ្សែបន្ទាត់ព្រំដែនកម្ពុជាថៃ ត្រង់ចំណុចប៉ុស្តិ៍បរថ្មី ស្ថិតក្នុងភូមិស្រែអណ្តូង ឃុំសំឡូត ស្រុកសំឡូត ខេត្តបាត់ដំបង ដែលត្រូវបានលោក យឹម វិចិត្រ មេបញ្ជាការវរសេនាតូចនគរបាលការពារព្រំដែនគោកលេខ ៨២៣ ដាក់កម្លាំងចុះកាប់ទន្ទ្រានទៅជាវាលល្ហល្ហេវ ថែមទាំងបានបង្កឱ្យមានមនុស្សស្លាប់ដោយសារដើមឈើបោកត្រូវ កាលពីពេលថ្មីៗនេះ កំពុងត្រូវបានលោកប្រធានមន្ទីរបរិស្ថានខេត្ត ដាក់ពាក្យប្តឹងទៅក្រសួង ដើម្បីសុំដីកាដកហូតយកដីទាំងនោះមកធ្វើជាសម្បត្តិរដ្ឋវិញ។

នៅព្រឹកថ្ងៃទី១៩ ខែមិថុនា ឆ្នាំ២០២១នេះ លោក កត បូរ៉ាន់ ប្រធានមន្ទីរបរិស្ថានខេត្ត បាត់ដំបង បានបញ្ជាក់មក “កម្ពុជាថ្មី” តាមតេឡេក្រាមថា រឿងរបស់លោក យឹម វិចិត្រ គឺលោកបានដឹងអស់ហើយ ដោយពេលនេះលោកកំពុងដាក់ពាក្យប្តឹង ដើម្បីសុំដីកាដកហូតយកមកវិញទាំងអស់ ដើម្បីដាក់ជាសម្បត្តិរដ្ឋវិញ។

លោក កត បូរ៉ាន់ បានសង្កត់ធ្ងន់ថា លោកស្តាយដោយសារតែកម្លាំងរបស់លោកទៅមិនទាន់ ដើម្បីចាប់ខ្លួនអ្នកដែលសុីឈ្នួលមកកាប់ឆ្ការឱ្យលោក យឹម វិចិត្រ។

គួរបញ្ជាក់ថាកាលពីពេលថ្មីៗនេះ លោក យឹម វិចិត្រ មេបញ្ជាការវរ: ៨២៣ ទិសសំឡូត ត្រូវបានលោកឧត្តមសេនីយ៍ទោ សាត គឹមសាន ស្នងការនគរបាល ខេត្តបាត់ដំបង ដកមកឈរជើងនៅក្នុងការិយាល័យបុគ្គលិក បន្ទាប់ពីមានរឿងអាស្រូវផ្ទុះឡើងនៅក្នុងអង្គភាព។ ឯដីនៅក្នុងតំបន់ខាងលើ គឺលោក យឹម វិចិត្រ បានដាក់កម្លាំងឱ្យចុះមកកាប់ឆ្ការ ទន្ទ្រានទុកជាកម្មសិទ្ធិ រហូតក្លាយជាវាលល្វឹងល្វើយ ដោយគ្មានច្បាប់អនុញ្ញាត៕

អត្ថបទ៖ សោ និយមរ័ត្ន