ដីជាង១ពាន់ហិកតានៅខេត្តកោះកុង នឹង​រៀបចំ​ជាតំបន់វិស្សមកាលក្រសួងការពារជាតិ

រដ្ឋបាលខេត្តកោះកុងបានយល់ព្រមផ្តល់ដីជាង១ពាន់ហិកតា ដែលជាដីបម្រុងរបស់រដ្ឋបាលខេត្តដល់ក្រុមការងារក្រសួងការពារជាតិ សម្រាប់រៀបចំជាតំបន់អភិវឌ្ឍសម្តេចពិជ័យសេនា ទៀ បាញ់ និងតំបន់វិសមកាលក្រសួងការពារជាតិ។

បើតាម លោក សុខទ្ធី អភិបាលរងខេត្តនិងជាអ្នកនាំពាក្យសាលាខេត្តកោះកុងបានឱ្យដឹងនៅព្រឹកថ្ងៃទី០៤កក្កដានេះថា ដីបម្រុងរបស់រដ្ឋបាលខេត្តកោះកុងទំហំ ១ ១០២ ហិកតា ដែលរដ្ឋបាលខេត្តប្រគល់ជូន​ក្រុមការងាររបស់ក្រសួងការពារជាតិនេះ មានទីតាំងស្ថិតនៅព្រែកតាអេក និងនៅចន្លោះព្រែកតាចាន់ ទៅព្រែកសៀមអុច ឃុំជ្រោយប្រស់ ស្រុកកោះកុង សម្រាប់រៀបចំជាតំបន់អភិវឌ្ឍសម្តេចពិជ័យសេនា ទៀ បាញ់ និងតំបន់វិសមកាលក្រសួងការពារជាតិ។

ចំពោះគម្រោងរៀបចំតំបន់ អភិវឌ្ឍសម្តេចពិជ័យសេនា ទៀ បាញ់ និងតំបន់វិសមកាលក្រសួងការពារជាតិនេះ លោក សុខ សិទ្ធី បានលើកឡើងថាលោកមិនបានដឹងពីគម្រោងនេះនៅឡើយទេ ហើយក៏មិនដឹងថានឹងចាប់ផ្តើមអនុវត្តនៅពេលណាដែរ ព្រោះការងារទាំងនេះក្រសួងការពារជាតិជាអ្នកអនុវត្តដោយផ្ទាល់៕

អត្ថបទ៖ សំអឿន