ជំនួយ​វ៉ាក់សាំង Johnson & Johnson ​របស់អាមេរិកជាង ១ លានដូស​​នឹងមកដល់កម្ពុជាឆាប់ៗ

ស្ថានទូតអាមេរិកប្រចាំកម្ពុជា​នៅថ្ងៃទី ២៣ ខែកក្កដា ឆ្នាំ​២០២១នេះ បាន​បញ្ជាក់ម្តងទៀត​ថា​អាមេរិកនឹងផ្ដល់​ជំនួយ​វ៉ាក់សាំង Johnson & Johnson ជាង១លានដូស ដល់កម្ពុជាហើយនឹងដឹកជញ្ជូន​មកក្នុងពេល​ឆាប់ៗ​នេះ។

ការប្រកាសបែបនេះ ធ្វើឡើងតាម​សារ​អេឡិចត្រូនិកធ្វីតទ័រ របស់លោក Patrick Murphy ​ឯកអគ្គរដ្ឋទូតប្រចាំ​នៅប្រទេសកម្ពុជា ក្រោយពេលដែលដំណឹងផ្តល់ជំនួយវ៉ាក់សាំងជាង១លានដូសដែលអាមេរិកសន្យាផ្ដល់​ជូន​កម្ពុជាមិនទាន់លឺដំណឹងតាំងពីខែឧសភា។

លោក Patrick Murphy ​ឯកអគ្គរដ្ឋទូតប្រចាំ​នៅប្រទេសកម្ពុជា បានបង្ហោះសារនៅលើបណ្ដាញសង្គម ធ្វីតទ័រនៅប៉ុន្មាននាទីមុននេះថា “សហរដ្ឋអាមេរិក នឹងផ្ដល់ជំនួយវ៉ាក់សាំង Johnson & Johnson ជាង​១​លានដូសដល់កម្ពុជា ខណៈស្ថានទូតកំពុងធ្វើការជាមួយរាជរដ្ឋាភិបាល និងភាគីពាក់ព័ន្ធដើម្បី​បញ្ជូន​វ៉ាក់សាំងមកកម្ពុជាឱ្យបានឆាប់”។

សូមបញ្ជាក់ផងដែរថា កម្ពុជាក៏នឹង​ទទួល​បាន​វ៉ាក់សាំងប្រភេទ Johnson & Johnson ​ចំនួន​១ លានដូសបន្ថែមទៀត​​តាមយន្តការ​កូវ៉ាក់ (COVAX) នៅពេល​ឆាប់ៗ​ខាងមុខនេះ៕ ដោយៈ ឡេង ដេត