លោក ហេង រតនា៖ បើយកឈើល្មើសច្បាប់មកបំរើការងារថែទាំប្រាសាទមិនដឹងជាល្អយ៉ាងណា!

ភ្នំពេញ៖ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក មជ្ឈមណ្ឌលសកម្មភាពកម្ចាត់មីនកម្ពុជា (CMAC) ស៊ីម៉ាក់ បានមានប្រសាសន៍ថាប្រសិនបើយកឈើល្មើសច្បាប់ដែលចាប់បាន មកបំរើការងារថែទាំ និងអភិរក្សប្រាសាទនានាមិនដឹងជាល្អយ៉ាងណានោះទេ។

ការលើកឡើងរបស់លោក ហេង រតនា បានធ្វើឡើងបន្ទាប់ពីអាជ្ញាធរអប្សរាក្តី អាជ្ញាធរប្រាសាទព្រះវិហារក្តី បានចាប់ផ្តើមយកឈើមកធ្វើកាំជណ្តើរ ឬក្រាលការពារទីតាំងបុរាណដ្ឋាន។

តាមរយ:ផេកហ្វេសប៊ុកផ្លូវការនៅថ្ងៃនេះ លោកបានមានប្រសាសន៍ថា ក្នុងសម័យសង្គ្រាមមិនត្រឹមគ្មានពេលវេលា និងធនធានថែរក្សាកេរមរតកដូនតាប៉ុណ្ណោះទេ​ ប៉ុន្តែ​មានការទម្លាក់គ្រាប់បែក​ បាញ់ប្លោង​ ដាក់គ្រាប់មីន​ ការប្រយុទ្ធគ្នា ការជីកកកាយគាស់​ វាយបំផ្លាញ​ មានប្រាង្គប្រាសាទ​ វត្ថុបុរាណយ៉ាងច្រេីនអនេកត្រូវរងការ​ខូច​ខាតយ៉ាងធ្ងន់ធ្ងរ​។

លោកបានបន្តថា ប៉ុន្តែក្នុងសម័យសន្តិភាព មានទេសចរណ៍ទាំងជាតិ និងអន្តរជាតិរាប់លាននាក់ក្នុងឆ្នាំៗ​ អ្នកទេសចរណ៍ទាំងឡាយបានដើរជាន់លើថ្មប្រាសាទ​ ឡើងចុះតាមកាំជណ្តេីរបុរាណជារៀងរាល់ថ្ងៃ​ មិនយូរប៉ុន្មានថ្មបុរាណទាំងឡាយនឹងសឹកបាត់រូបចម្លាក់​ បាត់ផ្ទាំងថ្មមិនខានឡើយ។

លោក ហេង រតនា បានបន្ថែមថា ផ្ទុយពីកម្ពុជា នៅតាមទីរមណីយដ្ឋានវប្បធម៌ប្រវត្តិសាស្ត្រនានានៅបរទេសដែលលោកធ្លាប់បានទៅទស្សនកិច្ច​ លោកសង្កេតឃើញថា​ ស្ទើរតែគ្រប់កន្លែងវត្ថុប្រវត្តិសាស្ត្រទាំងអស់​របស់គេ​ កុំថាឡើយដើរជាន់​ ឬយកដៃទៅប៉ះ​ សូម្បីតែកាម៉ារ៉ាថតរូប​ មានផ្លាស់ពន្លឺក៏មិនអនុញ្ញាតិឱ្យប្រើផង។

លោកបានបន្ថែមថា៖ “ជារួមខ្ញុំពិតជារីករាយណាស់ដែលបានឃើញអាជ្ញាធរអប្សរាក្តី​ អាជ្ញាធរប្រាសាទព្រះវិហារក្តី​ បានចាប់ផ្តើមយកឈើមកធ្វើកាំជណ្តើរ​ ឬក្រាលការពារ​ទីតាំងបុរាណដ្ឋាន​ ម្យ៉ាងការពារវត្ថុកេរមរតក​ និងម្យ៉ាងទៀតគឺការពារសុវត្ថិភាពក៏ដូចផ្តល់ផាសុកភាពភ្លៀវទេសចរណ៍ផងដែរ”។

លោក ហេង រតនា បានបញ្ជាក់ថា៖ “ខ្ញុំចេះតែគិតថា​ ប្រសិនបើចាប់ឈើល្មើសច្បាប់បាន​ទាំងឡាយយកមកបំរើការងារថែទាំ និងអភិរក្សបែបនេះ មិនដឹងជាល្អយ៉ាងណានោះទេ​ ព្រោះប្រាសាទទាំងឡាយត្រូវការឈើច្រើនណាស់ដែរ ដើម្បីបំពេញតម្រូវការការពារបែបនេះ​ បើបានឈើកាន់តែប្រណិតកាន់តែល្អ និងមានតំលៃផងដែរ”៕

អត្ថបទ៖ សំអឿន