៣ថ្ងៃអាជ្ញាធររាជធានីបង្ក្រាបហាងផឹកស៊ីល្មើសបម្រាម និងឃាត់មនុស្សរាប់សិបនាក់

ភ្នំពេញ៖ អនុវត្តទៅតាមបទបញ្ជាយ៉ាងម៉ឺងម៉ាត់របស់លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ ក្នុងការបិទបម្រាមគោចរ ក្នុងភូមិសាស្ត្ររាជធានីភ្នំពេញ សម្រាប់រយៈពេល ១៤ ថ្ងៃ គិតចាប់ពីម៉ោង ២៣ និង៥៩ នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១នេះ អាជ្ញាធរមានសមត្ថកិច្ចក្នុងជួរគណៈបញ្ជាការឯកភាព បានយកចិត្តទុកដាក់ដើម្បីអនុវត្តលើកាេងារនេះ។

ជាក់ស្តែង ក្នុងរយៈពេលប៉ុន្មនថ្ងៃជាប់គ្នានេះ គណៈបញ្ជាការឯកភាពតាមខណ្ឌនីមួយៗ បានចុះបង្ក្រាប និងឃាត់មនុស្ស​ប្រុស​ស្រី​រាប់សិបនាក់ ខណៈពួកគេប្រមូលផ្តុំគ្នា ពពាក់ពពូនផឹកស៊ីរាំច្រៀង ក្នុងហាងហូបចុក លួចបង្កប់ខេរ៉ាអូខេ ផ្គើន​នឹងបម្រាម​របស់រដ្ឋបាល​រាជធានី​ភ្នំពេញ ដែលត្រូវបិទបំរាមគោចរ ចាប់ម៉ោង៩យប់ដល់ម៉ោង៣ភ្លឺ នៅក្នុងភូមិសាស្ត្ររាជធានីភ្នំពេញ។

ក្នុងនោះ កាលពីវេលាម៉ោង៩ យប់ថ្ងៃព្រហស្បតិ៍ ទី០៥ ខែសីហា ឆ្នាំ២០២១ ប្រធានគណ:បញ្ជាការឯកភាពខណ្ឌទួលគោក ដឹកនាំដោយលោកឯក ឃុន ដឿន បានចុះធ្វើការ បង្ក្រាបភោជនីយដ្ឋាន​លួចបង្កប់ KTV មួយកន្លែង មានយីហោ ផ្ទះ​ផាត​ ធី​ មានអាស័យដ្ឋាន​ ភូមិ៦​ សង្កាត់ទឹកល្អក់ទី១​ ខណ្ឌទួលគោក​ រាជធានីភ្នំពេញ​ ដោយឃាត់ខ្លួនមនុស្សប្រុស ស្រីជាក់ស្តែងចំនួន១៣នាក់ ខណៈដែលពួកគេលួចបើកទទួលភ្ញៀវ និងច្រៀងខារ៉ាអូខេ ផ្គើនទៅនឹងវិធានការរបស់រដ្ឋបាលរាជធានីភ្នំពេញ។ ក្រោយពិនិត្យយកសំណាកអវិជ្ជមានទាំងអស់។

បន្ថែមពីនេះទៀត កាលពីម៉ោងជិត៣រសៀលថ្ងៃទី០៥ ខែកក្កដា ឆ្នាំ២០២១ នៅក្រុម១ ភូមិ១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ អាជ្ញាធរ និងកម្លាំងសមត្ថកិច្ច ចម្រុះខណ្ឌជ្រោយចង្វារ បានឡោមព័ទ្ធហាងផឹកស៊ីយីហោ តាសេត ដែលបើកផឹកស៊ីល្មើសនឹងបម្រាម របស់រដ្ឋបាលរាជធានីភ្នំពេញ ដែលហាមឃាត់ មិនឱ្យមានការផឹកស៊ីជួបជុំដើម្បីការពារទប់ស្កាត់ការរីករាលដាលជំងឺកូវីដ-១៩។ ក្នុុងប្រតិបត្តិការណ៍នេះកម្លាំងមានសមត្ថកិច្ចបានឃាត់ខ្លួនមនុស្ស ប្រុសស្រីចំនួន២២នាក់ រថយន្តទំនើបៗ១៣គ្រឿង បញ្ជូនទៅរក្សាទុក្ខនៅខណ្ឌ ចំណែកអ្នកទាំង២២នាក់ ក្រោយពិនិត្យយកសំណាក់អវិជ្ជានទាំងអស់គ្នា។

កាលពី​វេលា ម៉ោង​១០ ​និង​១០នាទី​យប់​ថ្ងៃ​ពុធ ទី​០៤ ខែសីហា ឆ្នាំ​២០២១ នៅចំណុចទីតាំង​ហាង នីសា​កែវ​ព្រិល តាមបណ្តោយមហាវិមាន​ឈ្នះ​ឈ្នះ ហៅ​ផ្លូវ​ទំនប់​កប់​ស្រូវ​ក្នុងភូមិ​ត្រពាំង​ទា សង្កាត់​ត្រពាំង​ក្រសាំង ខណ្ឌ​ពោធិ៍​សែន​ជ័យ គណៈបញ្ជាការ​ឯកភាព​ខណ្ឌ​ពោធិ៍​សែន​ជ័យបានឃាត់មនុស្ស​ប្រុស​ស្រី​ចំនួន១៣​នាក់ ជាមួយនឹងការពិនិត្យយកសំណាកតេស្តរហ័ស ឃើញ អវិជ្ជាមទាំងអស់។

កាលពីរសៀលថ្ងៃទី០៣ ខែសីហា លោក ប៉ាង លីដា អភិបាលរងខណ្ឌ និងលោក យិន គា នាយករដ្ឋបាលខណ្ឌ បានដឹកនាំកម្លាំងចម្រុះគណៈបញ្ជាការខណ្ឌពោធិសែនជ័យ ចុះបិទទីតាំង KTV ចំនួន ៣ទីតាំង សរសេរស្លាកជាភោជនីយដ្ឋាន តែខាងក្នុងKTV ដែលនៅតែគឃ្លើនលួចបើកដំណើរការអាជីវកម្ម ល្មើសនឹងបម្រាមរបស់រាជរដ្ឋាភិបាលក្នុងការប្រយុទ្ធទប់ស្កាត់ការរីករាលដាលជំងឺកូវីដ-១៩៕

អត្ថបទ៖ ស្រីរ័ត្ន