ព័ត៌មានជាតិ

ខេត្តកំពង់ស្ពឺបើកយុទ្ធនាការចាក់វ៉ាក់សាំងដល់កុមារនិងយុវវ័យជាង១១ម៉ឺននាក់

បានផុស

៥ years មុន

នៅ

ថ្ងៃអង្គារ ១០ សីហា ២០២១

ដោយ

ប្រធានមន្ទីរសុខាភិបាលខេត្តកំពង់ស្ពឺ បានឱ្យដឹងនៅព្រឹកនេះថា ខេត្តកំពង់ស្ពឺបានបើកយុទ្ធនាការចាក់វ៉ាក់សាំងដល់កុមារនិងយុវវ័យដែលមានអាយុចាប់ពី១២ឆ្នាំដល់ក្រោម១៨ឆ្នាំចាប់ពីថ្ងៃទី១០ ខែសីហា ឆ្នាំ២០២១នេះតទៅ នៅតាមទីតាំងចំនួន១១នៃក្រុងស្រុកចំនួន៩។

លោកវេជ្ជបណ្ឌិត អោ វ៉ាន់ថេន ប្រធានមន្ទីរសុខាភិបាលខេត្តកំពង់ស្ពឺបានបន្តថា ចំពោះកុមារដែលមិនទាន់គ្រប់អាយុ១២ឆ្នាំ ឬខ្វះ៣០ថ្ងៃក៏អាចទទួលបានវ៉ាក់សាំងការពារជំងឺកូវីដ-១៩ នេះបានដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានបន្តទៀតថា នៅក្នុងយុទ្ធនាការនេះ ខេត្តកំពង់ស្ពឺមានកុមារអាយុចាប់ពីអាយុ១២ឆ្នាំ រហូតដល់យុវវ័យអាយុ១៧ឆ្នាំដែលគ្រោងនឹងចាក់វ៉ាក់សាំងការពារជំងឺកូវីដ-១៩ មានចំនួន១១៥,១៨៧នាក់ ក្នុងនោះស្រីមានចំនួន៥៥,៧៥២៣នាក់។

លោកវេជ្ជបណ្ឌិតបានអំពាវនាវដល់បងប្អូនប្រជាពលរដ្ឋ ដែលមានកូនចាប់ពីអាយុ១២ឆ្នាំរហូតដល់១៧ឆ្នាំ យកទៅចាក់ថ្នាំការពារជំងឺកូវីដ-១៩ឲ្យបានគ្រប់ៗគ្នា ដើម្បីចៀសផុតពីជំងឺកូវីដ-១៩ទាំងអស់គ្នាដោយភ្ជាប់ឯកសារមកជាមួយមានដូចជា សំបុត្រកំណើត លិខិតបញ្ជាក់ពីអាជ្ញាធរ ឬលិខិតឆ្លងដែន។

ខេត្តកំពង់ស្ពឺជាខេត្តទី៨ហើយដែលបានបើកយុទ្ធនាការចាក់វ៉ាក់សាំងដល់កុមារនិងយុវវ័យអាយុចាប់ពី១២ឆ្នាំដល់១៧ឆ្នាំបន្ទាប់ពីរាជធានីភ្នំពេញ កណ្តាល តាកែវ កោះកុង ព្រះសីហនុ ស្វាយរៀងនិងកំពង់ចាម។

គួរបញ្ជាក់ថា ចាប់ពីថ្ងៃទី១រហូតមកដល់ថ្ងៃទី៩ ខែសីហា ឆ្នាំ២០២១នេះ ក្រុមគ្រូពេទ្យបានចាក់វ៉ាក់សាំងដល់កុមារនិងយុវវ័យចាប់ពីអាយុ១២ឆ្នាំ ដល់ក្រោម១៨ឆ្នាំបានចំនួន៣១៥,៤៦៩នាក់ស្មើនឹង១៦.០៤ភាគ រយ ធៀបនឹងគោលដៅ១៩៦៦,៩៣១នាក់នៅទូទាំងប្រទេស៕

អត្ថបទ ៖ សំអឿន

Related Topics:រដ្ឋបាលខេត្តកំពង់ស្ពឺ