នាយប៉ុស្តិ៍៖ មិនមានករណីនាំពលករ​ទៅប្រទេសថៃ តាមចំណុចច្រកល្បៀនចាន់គីរី ទេ

នគរបាលការពារព្រំដែនគោកស្វាយចេក ហៅចាន់គីរី ស្ថិតក្នុងខេត្តបាត់ដំបង បានធ្វើការបដិសេធ ចំពោះ​ការលើកឡើងថា នៅចំណុចច្រកល្បៀនចាន់គីរី ស្ថិតក្នុងភូមិស្វាយ​ ឃុំបឹងរាំង ស្រុកកំរៀង ​មានការលួច​លាក់នាំពលករខ្មែរ ទៅប្រទេសថៃ ​ដោយខុសច្បាប់។

​លោកអនុសេនីយ៍ឯក យ៉ុង​ សម្បត្តិ នាយប៉ុស្តិ៍នគរបាលការពារព្រំដែនគោក​ស្វាយចេក(ហៅចំណុចចាន់​គីរី​)បានប្រាប់ឱ្យដឹងនៅថ្ងៃទី២៥ ខែវិច្ឆកា ឆ្នាំ២០២០ នេះថា ​កន្លងមកនេះ​មាន​ព័ត៌មាន​មួយបានអះអាង​ថា កម្លាំងរបស់លោកបាន​ឃុបឃិតលួចលាក់​នាំចេញពលករខ្មែរ និងទំនិញ​គេចពន្ធ ឬបទល្មើសផ្សេងៗ​ជាច្រើនឆ្លងកាត់ជាការផ្គើន នឹងបទបញ្ជារបស់សម្តេចក្រឡាហោម​ ស​ ខេង ឧបនាយករដ្ឋមន្ត្រី រដ្ឋមន្ត្រីក្រ​សួង​ម​ហាផ្ទៃ ក្នុងការទប់ស្កាត់នូវជំងឺកូវីដ-១៩ ពីប្រទេសជិតខាង។

​លោក​ថា កន្លងមកមាន​ព័ត៌មាន​ក្លែងក្លាយ​ជាចរិក​ញុះញង់​ខណៈកម្លាំង​ឈរជើង​ទាំងអស់​មិន​ដែល​​បំពាន​នឹងបទបញ្ជារបស់ថ្នាក់លើទេ មានតែ​ខិត​ខំប្រឹងប្រែងបំពេញ​តួនាទី​ភារ:កិច្ច​ឱ្យ​ទទួលបានជោគ​ជ័យ​តាម​​បទបញ្ជារបស់ថ្នាក់ដឹកនាំ​។

លោក យ៉ុង​ សម្បត្តិ​ បានបន្តថា​ ទីតាំងឈរជើងក្នុងភូមិសាស្ត្រ​ខាងលើ ជាទីតាំងមួយដែល​អនុញ្ញាត​ឱ្យ​ការពិនិត្យ ធ្វើចត្តាឡីសក្ក័ពលករខ្មែរ ដែលចេញមកពីប្រទេសថៃ​ ហើយមាន​កម្លាំង​ចម្រុះ​ជាច្រើនទៀតបាន​ចូលរួមសហការ​បំ​ពេញ​កាតព្វកិច្ចយ៉ាងខ្ជាប់ខ្ជួន ខណៈចំណុចចាន់គីរី ធ្លាប់មានការអនុគ្រោះ ឱ្យពលរដ្ឋ​ជាប់តំបន់ព្រំដែនមួយចំ​នួនតូច បានចេញចូលដើម្បីទិញម្ហូបអាហារ នឹង​ស្បៀង​សម្រាប់​បរិភោគ​​ប្រចាំថ្ងៃ​ដោយមិនបានយកលុយកាក់ពីពួកគាត់សូម្បីមួយរៀលឡើយ៕

អត្ថបទ ៖ សៅ សារិទ្ធ