ព័ត៌មានជាតិ

Update ៖ គិតត្រឹមរសៀលនេះ រកឃើញអាជីវករ ផ្សារសិរីសោ ភ័ណ ចំនួន២៤នាក់ វិជ្ជមានកូវីដ

បានផុស

៤ years មុន

នៅ

ថ្ងៃសៅរ៍ ១៤ សីហា ២០២១

ដោយ

(បន្ទាយមានជ័យ)៖ គិតត្រឹមរសៀលថ្ងៃទី១៤ ខែសីហា ឆ្នាំ២០២១នេះ ក្រុមគ្រូពេទ្យ បានរកឃើញអាជីវករ ផ្សារសិរីសោភ័ណ ចំនួន២៤នាក់ហើយ វិជ្ជមានជំងឺកូវីដ-១៩។ លោក អ៊ុំ រាត្រី អភិបាលខេត្តបន្ទាយមានជ័យ អមដំណើរដោយ មន្ត្រីពាក់ព័ន្ធមួយចំនួនទៀត នៅព្រឹកថ្ងៃទី១៤ ខែសីហានេះ បានចុះបិទផ្សារសិរីសោភ័ណ ស្ថិតនៅក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យបណ្ដោះអាសន្ន ដើម្បីយកសំណាកតេស្ដរកកូវីដ លើអាជីវករចំនួន៦០០នាក់។

លោក អ៊ុំ រាត្រី បានថ្លែងប្រាប់អ្នកយកព័ត៌មានថា រដ្ឋបាលខេត្តបន្ទាយមានជ័យ បានសហការជាមួយក្រុមគ្រូពេទ្យ បានយកសំណាកអាជីវករលក់ដូរ ក្នុងផ្សារសិរីសោភ័ណ ជាង៦០០នាក់។ ក្នុងនោះ គិតត្រឹមរសៀលថ្ងៃនេះ រកឃើញអាជីវករ វិជ្ជមានចំនួន២៤នាក់ ហើយក៏មានកូនក្មេង ២នាក់ផងដែរ។ ភ្លាមៗ ក្រុមគ្រូពេទ្យ បានយកអ្នកវិជ្ជមាន ទៅព្យាបាលនៅមន្ទីរពេទ្យអស់ហើយ។

លោកបានឲ្យបន្តថា អ្នកមានវិជ្ជមាន ជំងឺកូវីដ-១៩ រួមជាមួយអ្នកពាក់ព័ន្ធខាងលើ បានធ្វើដំណើរចេញ-ចូល ក្នុងផ្សារសិរីសោភ័ណជារៀងរាល់ថ្ងៃ។ ដូច្នេះដើម្បីចៀសវាង ការរីករាលដាលជំងឺកូវីដ-១៩ កាន់តែមានភាពធ្ងន់ធ្ងរដល់សង្គម រដ្ឋបាលខេត្តបន្ទាយមានជ័យ សម្រេចបិទជាបណ្ដោះអាសន្ន នៅការលក់ដូរគ្រប់ប្រភេទ នៅក្នុងផ្សារសិរីសោភ័ណ ចាប់ពីថ្ងៃជូនដំណឹងនេះ រហូតមានការជូនដំណឹងជាថ្មី។

លោកអភិបាលខេត្ត បានបញ្ជាក់ថា ផ្សារនេះនៅពេលអនុញ្ញាត ឲ្យលក់ឡើងវិញ ត្រូវរៀបចំសណ្តាប់ធ្នាប់សាធារណៈ សុវត្ថិភាពសង្គម ពិសេសសុខភាពសាធារណៈឲ្យបានល្អ ដើម្បីចូលរួមបង្ការ និងទប់ស្កាត់ការឆ្លងរីករាលដាលជំងឺកូវវីដ-១៩ តែម្តងទៀត។ លោកថា វិធានការណ៍ការពារ នៃការឆ្លងរីករាលដាលជំងឺកូវីដ-១៩ ចូលក្នុងសហគមន៍ក្នុងព្រឹត្តិការណ៍២០កុម្ភៈ គឺតម្រូវឲ្យអាជីវករ និងអ្នកទិញទាំងអស់ ត្រូវតែចូលរួមអនុវត្តវិធានការ ៣កុំ ៣ការពារ។

សូមជម្រាបដែរថា ជាគោលការណ៍ ផ្សារសុវត្ថិភាព ដែលរៀបចំដោយ រដ្ឋបាលខេត្តបន្ទាយមានជ័យ តម្រូវឲ្យគ្រប់ផ្សារ ត្រូវតែមានច្រកចូល និងចេញធំទូលាយ មានម៉ាស៊ីនស្កេន ម៉ាស៊ីនវាស់កម្ដៅ បាញ់អាល់កុល មុននឹងចូល ផ្សាររកទិញ គ្រឿងឧបភោគ-បរិភោគ និងសម្ភារៈប្រើប្រាស់ផ្សេងៗ។ គណៈកម្មការគ្រប់គ្រងផ្សារ សន្តិសុខ អ្នកលក់ អ្នកទិញ ត្រូវតែពាក់ម៉ាសឲ្យបានត្រឹមត្រូវ លើកលែងតែពេលពិសាអាហារ។ បើសង្ស័យ មានការពាក់ព័ន្ធ ជាមួយជំងឺកូវីដ-១៩ ត្រូវរាយការណ៍បន្ទាន់ ទៅអាជ្ញាធរមានសមត្ថកិច្ច ភ្លាមៗ៕ (ដោយ)៖ វ៉ាន់ ណាង