មេសហជីព ឲ្យសមាជិករបស់ខ្លួន បន្តផ្សព្វផ្សាយវិធានការនានា ដល់កម្មករ-និយោជិត ដើម្បីទប់ស្កាត់ការ​រាត​ត្បាត​កូវីដ

លោក ឡុង សុផាត ប្រធានសហភាពសហជីពយុវជន ការពារសិទ្ធិកម្មករកម្ពុជា (YPCWRC ) និងជាប្រ​ធាន​សហពន្ធ័សហជីពសម្លេងយុវជនខ្មែរ និងសហការី នៅថ្ងៃទី១៧ ខែសីហា ឆ្នាំ២០២១នេះ បានចុះជួបសំណេះសំណាល និងអប់រំណែនាំបន្ថែម ដល់ថ្នាក់ដឹកនាំសហជីពមូលដ្ឋាន អំពីការចូលរួមទប់ស្កាត់ ការរាតត្បាតនៃជំងឺកូវីដ-១៩ នៅក្នុងស្រុកជើងព្រៃ ខេត្តកំពង់ចាម​។ ក្នុងនោះ មានរោងចក្រចំនួន៦ ដែលមេសហជីពរូបនេះ បានចុះទៅរួមមាន៖ ១-រោងចក្រ​ ខាលីងតុន​ ២-រោងចក្រ​ ស្កាយ​ ណាយ២​ ៣-រោងចក្រ​ប្រាយម៍​ស៊ូ​ ៤-រោងចក្រ​ វ៉ា​ ឡុង​ ៥-រោងចក្រ​ ឡុង​ ឈឹង​ និង​៦-រោងចក្រ​ ម៉ាន់ឡុង​។

ក្នុងឱកាសនោះ លោក ឡុង សុផាត បានផ្សព្វផ្សាយ ដល់ថ្នាក់ដឹកនាំសហជីពមូលដ្ឋាន អំពីការរីករាលនៃជំងឺកូវីដ-១៩​ ជាពិសេសការរាលដាល នៃវីរុស​បំប្លែងថ្មីដែលតា​។ ក្នុងនោះដែរ លោកបានផ្ដាំផ្ញើ ដល់ថ្នាក់ដឹកនាំសហជីពមូលដ្ឋានទាំងអស់ បន្តជួយផ្សព្វផ្សាយបន្ថែម ឲ្យកាន់តែទូលំទូលាយ ដល់កម្មករ-និយោជិត នៅតាមបណ្តារោងចក្រទាំងអស់ខាងលើ ឲ្យអនុវត្តដាច់ខាតនូវវិធានការ ៣ការពារ និង៣កុំ របស់សម្តេចតេជោនាយករដ្ឋមន្ត្រី​ និងវិធានការនា​នា ​របស់ក្រសួងសុខាភិបាល​ ធ្វើយ៉ាងណាកុំឲ្យមានការ បន្តឆ្លងរាល ដាលដល់កម្មករ-និយោជិត​ ព្រមទាំងគ្រួសារ និងរោងចក្រ-សហគ្រាស របស់ពួកគាត់។  

នៅក្នុងជំនួប ជាមួយថ្នាក់ដឹកនាំសហជីពមូលដ្ឋាន ទាំង៦រោងចក្រខាងលើនេះ លោក ឡុង សុផាត បានផ្តល់ ដបបាញ់អាល់កុល ក្នុងម្នាក់ៗចំនួន១​ សរុបចំនួន​២០០នាក់ ​ស្មើនឹង២០០ដប​ ដើម្បីពួកគេប្រើប្រាស់ ក្នុងការការពារបន្ថែម ពីការរាលដាលជំងឺកូវីដ-១៩​ផងដែរ៕ (ដោយ)៖ ឃួន សុភ័ក្រ