ចាប់ខ្លួនថៅកែ​ដេប៉ូខ្សាច់​សិត្បូ ក្រុង​តាខ្មៅ ចេញសែក​​ស្អុយ អត់លុយ

ភ្នំពេញ ៖ ថៅកែដេប៉ូខ្សាច់សិត្បូ ក្រុងតាខ្មៅមួយរូបដែលចាយសែកស្អុយ ( សែកអត់លុយ ) ត្រូវបានសមត្ថកិច្ចនគរបាលព្រហ្មទ័ណ្ឌកំរិតស្រាលរាជធានីភ្នំពេញចាប់ខ្លួន បញ្ជូនមកអយ្យការអមសាលាដំបូង នាព្រឹកថ្ងៃទី ០២កញ្ញា ឆ្នាំ២០២១នេះ។

ជនសង្ស័យដែលបានឃាត់ខ្លួនឈ្មោះ លាង សុងលី ភេទប្រុស មានទីលំនៅផ្ទះលេខ ២៧ ផ្លូវលេខ ២០អឺ ភូមិត្រពាំងល្វា សង្កាត់កកាប ខណ្ឌពោធិសែនជ័យ។

សមត្ថកិច្ចបានបញ្ជាក់ថា ការឃាត់ខ្លួនឈ្មោះ លាង សុងលី គឺអនុវត្តតាមដីកាបញ្ជាឲ្យ​ចូលខ្លួនរបស់លោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចុះថ្ងៃទី ២៤សីហា ឆ្នាំ២០២១ ដើម្បីធ្វើការសាកសួរលើបណ្ដឹងរបស់ឈ្មោះ តាំង ហ្គិចលៀង ដែលបានប្ដឹងពីបទ « មិនបំពេញកតព្វកិច្ចចំពោះឧបករណ៍ដែលអាចជួញដូរបាន »។ ជនសង្ស័យត្រូវបានបញ្ជូនមកដល់អយ្យការ ដើម្បីធ្វើការសាកសួរ ៕

អត្ថបទ៖ មករា