ព័ត៌មានជាតិ
រដ្ឋមន្ត្រីក្រសួងកសិកម្ម ណែនាំដល់មន្ត្រីពេទ្យសត្វបង្កើនការចាក់វ៉ាក់សាំងការពារជំងឺដុំពកលើស្បែកគោ ក្របី
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានណែនាំដល់មន្ត្រីពេទ្យសត្វបង្កើនការចាក់វ៉ាក់សាំងការពារជំងឺដុំពកលើស្បែកគោ ក្របីជូនប្រជាពលរដ្ឋឲ្យបានទូលំទូលាយថែមទៀត ខណៈបច្ចុប្បន្នជំងឺនេះកំពុងឆ្លងរាលដាលដល់គោក្របីប្រមាណ៣ម៉ឺនក្បាលនៅទូទាំងប្រទេស។ ការណែនាំរបស់លោករដ្ឋមន្ត្រីនេះ បានធ្វើឡើងក្នុងឱកាសចូលរួមត្រួតពិនិត្យកម្មវិធីចាក់ថ្នាំការពារជំងឺដុំពកស្បែកគោ ក្របីភូមិផ្អាវ ឃុំទឹកជ្រៅ ស្រុកតំបែរ ខេត្តត្បូងឃ្មុំ។
លោករដ្ឋមន្ត្រីបានធ្វើការណែនាំដល់លោកប្រធានមន្ទីរ លោកប្រធានការិយាល័យសុខភាពសត្វ និងផលិតកម្មសត្វ ត្រូវយកចិត្តទុកដាក់ចាត់ចែងកម្មវិធីចាក់ថ្នាំការពារជំងឺនេះជូនប្រជាពលរដ្ឋឲ្យបានទូលំទូលាយ គ្រប់ៗគ្រួសារដែលជាម្ចាស់សត្វ ដើម្បីធានា និងលើកកម្ពស់ការការពារជំងឺឆ្លងក៏កាចសាហាវនេះ ដែលអាចធ្វើឲ្យប៉ះពាល់ដល់សុខភាពសត្វ អាយុសត្វ និងសេដ្ឋកិច្ចគ្រួសារកសិករយ៉ាងធ្ងន់ធ្ងរ។
លោករដ្ឋមន្ត្រីបានស្នើសុំឲ្យមន្ត្រីពេទ្យសត្វ ត្រូវខិតខំបន្ថែមទៀតក្នុងការផ្សព្វផ្សាយអំពីបញ្ហាជំងឺ វិធានការការពារ និងព្យាបាលសត្វ និងជាពិសេសត្រូវជំរុញនិងលើកទឹកចិត្តឲ្យប្រជាពលរដ្ឋយកសត្វមកចាក់ថ្នាំការពារឲ្យបានទាន់ពេលវេលា និងចូលរួមសហការជាមួយការិយាល័យសុខភាពសត្វ និងផលិតកម្មសត្វដើម្បីរាយការណ៍អំពីការវិវឌ្ឍន៍របស់ជំងឺ ស្ថានភាពជំងឺ និងការរីករាលដាលជំងឺមកមន្ត្រីជំនាញឲ្យបានទាន់ពេល។
ជាមួយគ្នានេះដែរ លោករដ្ឋមន្ត្រីបានធ្វើការអំពាវនាវដល់ប្រជាពលរដ្ឋដែលជាម្ចាស់សត្វនៅទូទាំងប្រទេសត្រូវយកសត្វមកចាក់ថ្នាំការពារឲ្យបានទាន់ពេល ត្រូវអនុវត្តឲ្យបានខ្ជាប់ខ្ជួន និងប្រុងប្រយ័ត្នខ្ពស់បំផុតនូវវិធានការអនាម័យ និងវិធានការជីវសុវត្ថិភាពតាមការណែនាំរបស់មន្ត្រីជំនាញ និងហាមលែងសត្វទាំងសត្វជា និងសត្វឈឺឲ្យដើរស៊ីពាសវាលពាសកាល ត្រូវចិញ្ចឹមក្នុងទ្រុង ឬក្រោលហើយត្រូវតាមដានសុខភាពសត្វឲ្យបានជាប់ជាប្រចាំ ។ លោករដ្ឋមន្ត្រីបានណែនាំទៀតថា ជាងនេះទៅទៀតម្ចាស់សត្វមិនគួរប្រើប្រាស់ថ្នាំការពារ ឬថ្នាំព្យាបាលសត្វ ដោយមិនបានពិគ្រោះ ឬសុំយោបល់ពីមន្ត្រីជំនាញឡើយ។
លោក សេង សោភា ប្រធានការិយាល័យសុខភាពសត្វ និងផលិតកម្មសត្វបានឲ្យដឹងថាគិតមកទល់បច្ចុប្បន្ននៅទូទាំងខេត្តត្បូងឃ្មុំមានគោឈឺជំងឺដុំពកលើស្បែកនេះចំនួន៦៥៤១ក្បាល ព្យាបាលជាសះស្បើយ ៥៤១៧ ក្បាល និងងាប់៦០ក្បាលដែលភាគច្រើនកូនគោកំពុងបៅដោះ៕
អត្ថបទ៖ សំអឿន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ