ព័ត៌មានជាតិ

យុទ្ធនាការចាក់វ៉ាក់សាំងប្រឆាំងកូវីដ-១៩ ជូនកុមារអាយុ៦ឆ្នាំដល់១២ឆ្នាំ សម្រាប់ខេត្តប៉ៃលិន

បានផុស

៥ years មុន

នៅ

ថ្ងៃសុក្រ ១៧ កញ្ញា ២០២១

ដោយ

នៅបរិវេណមន្ទីរពេទ្យបង្អែក ខេត្តប៉ៃលិន នាព្រឹកថ្ងៃទី១៧ ខែកញ្ញា ឆ្នាំ២០២១ លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន និងលោក សៅ សារ៉ាត់ អ្នកតំណាងរាស្ត្រមណ្ឌលខេត្តប៉ៃលិន បានអញ្ជើញជាអធិបតីភាពក្នុងពិធីប្រកាសបើកយុទ្ធនាការចាក់វ៉ាក់សាំងបង្ការ ការពារការឆ្លងរីករាលដាលមេរោគជំងឺកូវី19 ជូនដល់កុមារ ដែលមានអាយុចាប់ពី៦ ឆ្នាំរហូតដល់១២ឆ្នាំ ។

លោកស្រី បាន ស្រមុំ អភិបាលខេត្តប៉ៃលិន បានមានប្រសាសន៍នៅក្នុងអង្គពិធីថា ការចាក់វ៉ាក់សាំង ដូសទី១ សម្រាប់កុមារ គឺជាការគិតគូរយកចិត្តទុកដាក់របស់សម្តេចអគ្គមហាសេនាបតីតេជោហ៊ុន សែន ប្រមុខរាជរដ្ឋាភិបាល មកលើកុមារដែលមានអាយុចាប់ពី៦ឆ្នាំរហូតដល់១២ឆ្នាំ ក្នុងគោលបំណងជំរុញឲ្យមានការបើកសាលាបឋមសិក្សាឡើងវិញ ខណៈពេលដែលកុមារដែលមានអាយុ ១២ឆ្នាំរហូតដល់១៨ឆ្នាំ បានកំពុងតែបន្តចាក់វ៉ាក់សាំងដូសបន្ត ហើយឈានទៅដល់ការបើកសាលាឲ្យដំណើរការទូទាំងប្រទេស។

អភិបាលខេត្តប៉ៃលិន បានមានប្រសាសន៍បន្តថា បើទោះបីជាសិស្សានុសិស្ស ឬកុមារតូចៗ ដែលបានទទួលការចាក់វ៉ាក់សាំងនឹងត្រូវបានចូលរៀននៅសាលាសាជាថ្មី ក៏ត្រូវតែមានការប្រុងប្រយ័ត្នខ្ពស់ដោយអនុវត្តតាមការណែនាំរបស់ក្រសួងសុខាភិបាលនិងអនុវត្តវិធានការ ៣កុំ៣ការពារ របស់សម្ដេចតេជោហ៊ុនសែនដោយមុននឹងចូលសាលាត្រូវពាក់ម៉ាស បាញ់អាកុល ឬជេលសម្លាប់មេរោគ និងរក្សាគម្លាតសុវត្ថិភាព ដើម្បីបង្ការទប់ស្កាត់ការឆ្លងមេរោគដ៏កាចសាហាវនេះ។

ប្រជាពលរដ្ឋក៏ដូចជាមាតាបិតា អាណាព្យាបាល បានសំដែងនូវសេចក្តីត្រេកអរឥតឧបមាដោយ បានឃើញកូនជាទីស្រឡាញ់របស់គាត់បានទទួលវ៉ាក់សាំងការពារការឆ្លងមេរោគ covid-19 និងសប្បាយចិត្តជាខ្លាំងខណ:ពេលដែលកូនៗរបស់ពួកគាត់បានចូលរៀនសារឡើងវិញបន្ទាប់ពីបិទសាលាមួយរយះកន្លងមក និងសង្ឃឹមថាមេរោគដ៏សាហាវនេះ និងរលាយឆាប់ៗនៅពេលខាងមុខនេះផងដែរ។

សូមបញ្ជាក់ថា យុទ្ធនាការចាក់វ៉ាក់សាំងកូវីដ១៩ សម្រាប់កុមារអាយុ៦ឆ្នាំដល់អាយុ១២ឆ្នាំ មានចំនួន៤ទីតាំងក្នុងខេត្តប៉ៃលិន គឺមន្ទីរពេទ្យបង្អែកខេត្តប៉ៃលិន មណ្ឌលសុខភាពភ្នំស្ពង់ មណ្ឌលសុខភាពភ្នំព្រាល និងមណ្ឌលសុខភាពផ្សារព្រំ ដែលមានការចាប់ផ្តើមយុទ្ធនាការចាក់ពីម៉ោង៨ព្រឹក រហូតដល់ម៉ោង១១ និងពេលរសៀលម៉ោង២ រហូតដល់ម៉ោង៥ ល្ងាចផងដែរ៕

អត្ថបទ៖ សេង សុវណ្ណារិទ្ធ