ព័ត៌មានជាតិ
អាល្លឺម៉ង់ នឹងរៀបកម្មវិធីស្បៀងអាហារពិភពលោកផ្តល់ជំនួយ៥លានអឺរ៉ូ ដើម្បីគាំទ្រគ្រួសារ ដែលផលប៉ះពាល់កូវីដ-១៩
តាងនាមក្រសួងសហប្រតិបត្តិការផ្នែកសេដ្ឋកិច្ច និងអភិវឌ្ឍអាល្លឺម៉ង់ (BMZ) ទីភ្នាក់ងារសហប្រតិបត្តិការអន្តរជាតិអាល្លឺម៉ង់ (ជីអាយហ្សិត) បានផ្ដល់ជំនួយចំនួន៥លានអឺរ៉ូ ដែលស្មើនឹងប្រមាណ៦លានដុល្លារអាមេរិក ដើម្បីផ្តល់ជំនួយជាសាច់ប្រាក់ដល់ក្រុមគ្រួសាររងគ្រោះដោយជំងឺកូវីដ១៩ ក្នុងបំណងរួមចំណែកស្តារនូវស្ថានភាពរបស់ក្រុមគ្រួសារឡើងវិញ នេះបើតាមការឲ្យដឹងពីកម្មវិធីស្បៀងអាហារពិភពលោកកម្ពុជានាព្រឹកនេះ។
ភាពជាដៃគូនេះ នឹងគាំទ្រដល់រាជរដ្ឋាភិបាលកម្ពុជា ក្នុងការលើកកម្ពស់លទ្ធភាពឆ្លើយតបរបស់គម្រោងគាំពារសង្គម ដើម្បីពង្រឹងភាពធន់ទៅនឹងវិបត្តិ។ ជំងឺរាតត្បាតកូវីដ-១៩នេះ បានជះឥទ្ធិពលផ្នែកសង្គម និងសេដ្ឋកិច្ចយ៉ាងខ្លាំងទៅលើប្រជាជនកម្ពុជា ដែលងាយរងគ្រោះ។ ចំណែកវិបត្តិអាកាសធាតុ គ្រោះទឹកជំនន់នៅចុងឆ្នាំ២០២០ បានបង្កឱ្យស្ថានភាពអវិជ្ជមានមួយចំនួនកាន់តែធ្ងន់ធ្ងរឡើង។
លោកស្រី គ្លែរ កូណាន់ តំណាងកម្មវិធីស្បៀងអាហារពិភពលោកបានលើកឡើងថា “កូវីដ-១៩ និងគ្រោះទឹកជំនន់បានបន្ថែមបន្ទុកចំពោះប្រជាជនដែលកំពុងតែជួបប្រទះនឹងបញ្ហាប្រឈមនានាស្រាប់ទៅហើយ។ របាយការណ៍បានបង្ហាញថា ក្រុមគ្រួសារងាយរងគ្រោះដែលរងផលប៉ះពាល់ដោយសារវិបត្ដិទាំងពីរនេះ បានកាត់បន្ថយការទទួលទានអាហារ លក់ទ្រព្យសម្បត្តិ និងខ្ចីបំណុលបន្ថែមដើម្បីបំពេញតម្រូវការចាំបាច់។ យើងពិតជាពេញចិត្តណាស់ក្នុងការជួយដល់ប្រជាជនខ្វះខាតដើម្បីបំពេញតម្រូវការស្បៀងនិងអាហារូបត្ថម្ភ និងជួយសង្គ្រោះស្ថានភាពរបស់ពួកគាត់ឡើងវិញ”។
ជីអាយហ្សិត និងកម្មវិធីស្បៀងអាហារពិភពលោក នឹងប្រើប្រាស់ទិន្នន័យពីរាជរដ្ឋាភិបាលកម្ពុជា ដូចជា ប្រព័ន្ធទិន្នន័យអត្តសញ្ញាណគ្រួសារក្រីក្រ (IDPoor) របស់ក្រសួងផែនការ និងប្រព័ន្ធព័ត៌មានទាន់ហេតុការណ៍និងអង្កេតតាមដានស្ថានការណ៍គ្រោះមហន្តរាយ (PRISM) ដើម្បីកំណត់អត្តសញ្ញាណក្រុមគ្រួសារក្រីក្រដែលរងគ្រោះដោយសារទឹកជំនន់ និងកូវីដ-១៩។ ជីអាយហ្សិតបានផ្តល់ការគាំទ្រផ្នែកបច្ចេកទេសដល់ក្រសួងផែនការដើម្បីអនុវត្តកម្មវិធីអត្តសញ្ញាណកម្មគ្រួសារក្រីក្រអស់រយៈពេលជាងមួយទសវត្សរ៍មកហើយ។
បច្ចុប្បន្ននេះ កម្មវិធីអត្តសញ្ញាណកម្មគ្រួសារក្រីក្រគ្របដណ្តប់១០០ ភាគរយ នៃតំបន់ជនបទ និងទីក្រុងនៅទូទាំងប្រទេសកម្ពុជា។
ក្រុមគ្រួសារគោលដៅនឹងទទួលបានជំនួយជាសាច់ប្រាក់ បន្ថែមពីលើជំនួយសង្គ្រោះបន្ទាន់ជាសាច់ប្រាក់សម្រាប់ទប់ទល់នឹងស្ថានភាពកូវីដ-១៩របស់រាជរដ្ឋាភិបាល។ ជំនួយបន្ថែមនេះនឹងជួយបង្ការមិនឱ្យក្រុមគ្រួសារបន្តធ្លាក់ចូលជ្រៅទៅក្នុងភាពក្រីក្រ និងជួយពង្រឹងភាពធន់របស់ពួកគាត់ចំពោះវិបត្តិនាពេលអនាគត។
ស្ថានភាពកូវីដ-១៩នៅមិនទាន់មានភាពប្រាកដប្រជានៅឡើយ ចំណែកវិបត្តិផ្នែកអាកាសធាតុនៅតែបង្កជាហានិភ័យជាប្រចាំ ហេតុដូច្នេះការត្រៀមលក្ខណៈទប់ទល់នឹងស្ថានភាពនេះមានសារៈសំខាន់ណាស់។ ដូច្នេះ កម្មវិធីស្បៀងអាហារពិភពលោកនិងជីអាយហ្សិតនឹងបន្តផ្តល់ការគាំទ្រដល់រាជរដ្ឋាភិបាលកម្ពុជា ក្នុងការលើកកម្ពស់លទ្ធភាពឆ្លើយតបរបស់គម្រោងគាំពារសង្គម ដើម្បីទប់ទល់នឹងវិបត្ដិនានា។
លោក Christian BERGER ឯកអគ្គរដ្ឋទូតអាល្លឺម៉ង់បានថ្លែងថា “សាធារណរដ្ឋសហព័ន្ធអាល្លឺម៉ង់មានមោទនភាពដែលបានគាំទ្រដល់កម្មវិធីអត្តសញ្ញាណកម្មគ្រួសារក្រីក្រ ជាមួយប្រទេសអូស្ត្រាលីអស់រយៈពេលជាងមួយទសវត្សរ៍កន្លងមក។ ក្នុងសហការជាមួយទីភ្នាក់ងារសហប្រតិបត្តិការផ្នែកបច្ចេកទេសរបស់យើង (ជីអាយហ្សិត) ក្រសួងផែនការបានបន្តកែលម្អកម្មវិធីអត្តសញ្ញាណកម្មគ្រួសារក្រីក្រជាបន្តបន្ទាប់ ហើយបច្ចុប្បន្ននេះ ការចុះបញ្ជីបានគ្របដណ្តប់ទូទាំងប្រទេសកម្ពុជា។ កម្មវិធីនេះមានអត្ថប្រយោជន៍ណាស់ក្នុងការឆ្លើយតបទៅនឹងការរាតត្បាតនៃជំងឺកូវីដ-១៩”។
ឯកអគ្គរដ្ឋទូតបានបន្ថែមថា “នៅក្នុងកិច្ចសហការបន្ថែមជាមួយកម្មវិធីស្បៀងអាហារពិភពលោកនេះ យើងប្រើវិធីសាស្ត្រដែលមានមូលដ្ឋានលើប្រព័ន្ធទិន្នន័យ ដោយប្រើកម្មវិធីអត្តសញ្ញាណកម្មក្រុមគ្រួសារក្រីក្រ និងប្រព័ន្ធព័ត៌មានទាន់ហេតុការណ៍និងអង្កេតតាមដានស្ថានការណ៍គ្រោះមហន្តរាយ ដើម្បីជួយសង្គ្រោះនិងកសាងភាពធន់សម្រាប់ក្រុមប្រជាជនងាយរងគ្រោះ រួមទាំងកុមារ មនុស្សចាស់ និងស្ត្រីផងដែរ។”
លោកស្រី កូណាន់ បានបញ្ជាក់បន្ថែមថា “យើងសូមថ្លែងអំណរគុណដល់ប្រទេសអាល្លឺម៉ង់ដែលបានផ្ដល់ការគាំទ្ររយៈពេលវែងដល់ប្រទេសកម្ពុជា ហើយយើងមានឆន្ទៈក្នុងការសហការយ៉ាងជិតស្និទ្ធជាមួយជីអាយហ្សិត ដើម្បីគាំទ្រដល់ក្រុមគ្រួសាររងគ្រោះដោយសារវិបត្តិនានាតាំងពីឆ្នាំមុន។ យើងមានបំណងអភិវឌ្ឍគំរូប្រតិបត្ដិការសម្រាប់កិច្ចគាំពារសង្គមទប់ទល់នឹងវិបត្តិនាពេលអនាគត សម្រាប់កម្ពុជា។ ធ្វើដូច្នេះ យើងនឹងអាចមានលទ្ធភាពរិះរកវិធីថ្មីៗដើម្បីលើកកម្ពស់កម្មវិធីជំនួយសង្គម និងកម្មវិធីឆ្លើយតបនឹងគ្រោះមហន្តរាយ ដែលនឹងជួយឱ្យក្រុមគ្រួសារងាយរងគ្រោះបានត្រៀមខ្លួនកាន់តែប្រសើរនិងមានភាពធន់ នៅពេលមានវិបត្ដិកើតឡើងនាពេលអនាគត”។
ភាពជាដៃគូនេះ នឹងជួយគាំទ្របន្ថែមដល់កិច្ចខិតខំប្រឹងប្រែងរបស់ស្ថាប័នរដ្ឋដូចជាក្រសួងសង្គមកិច្ច អតីតយុទ្ធជន និងយុវនីតិសម្បទា អគ្គលេខាធិការដ្ឋានក្រុមប្រឹក្សាជាតិគាំពារសង្គម ក្រសួងផែនការគណៈកម្មាធិការជាតិគ្រប់គ្រងគ្រោះមហន្តរាយ ក៏ដូចជាដៃគូអភិវឌ្ឍនានាដែលបានចូលរួមចំណែកក្នុងផ្នែកជំនួយគាំពារសង្គមនិងការឆ្លើយតបទៅនឹងគ្រោះមហន្តរាយ៕
ដោយ ៖ កោះកែវ
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)