សមិទ្ធផលមិនធម្មតា បាល់ទះនារីចិនជាក្រុមខ្លាំងបំផុតមួយក្នុងលោក

ក្រុម​បាល់ទះ​ជម្រើស​ជាតិ​នារី​ចិន​ត្រូវ​បាន​ចាត់​ទុក​ជាក្រុម​​ជោគជ័យ​បំផុត​មួយ​នៅ​ក្នុង​ពិភព​លោក បន្ទាប់​ពី​ពួក​គេ​បាន​សាង​សមិទ្ធផល​ជា​ច្រើន​ក្នុង​ព្រឹត្តិការណ៍​កីឡា​អន្តរជាតិ​ធំ​ៗ​ទាំង​ថ្នាក់​តំបន់ និង​ពិភព​លោក។

គិតត្រឹមឆ្នាំ២០២៤ ក្រុមបាល់ទះ​នារីចិនកំពុងស្ថិត​នៅ​ចំណាត់​ថ្នាក់​លេខ​៦​ ក្នុងតារាង​ពិភពលោក FIVB តាមពីក្រោយក្រុមលេខ១ ទួកគីចំនួន ៦៧.៨១ពិន្ទុ។ ក្រុម​នារីចិម​ទទួល​បានជោគជ័យបំផុតក្នុងវិស័យបាល់ទះនារី​ ដោយពួកគេ​បានឈ្នះ​មេដាយមាស​លំដាប់​ពិភព​លោកចំនួន១០​គ្រឿង​ ក្នុង​ការ​ប្រកួត​អន្តរជាតិធំ​៣​ផ្សេង​គ្នាគឺ​​ឈ្នះមេដាយមាសពិភព​លោក (World Cup) ៥លើក, ឈ្នះមេដាយមាស​ពិភព​លោក World Championships ២លើក និងឈ្នះមេដាយមាស​កីឡា​អូឡាំពិក៣លើក។

កំណត់ត្រាដ៏អស្ចារ្យរបស់ក្រុមបាល់ទះនារីចិនគឺការ​ឈ្នះ​មេដាយមាស៥លើកជាប់គ្នាក្នុងព្រឹត្តិការណ៍លំដាប់ពិភពលោក ក្នុងនោះ​ឆ្នាំ១៩៨១​បានឈ្នះមេដាយមាស World Cup, ឆ្នាំ១៩៨២ ឈ្នះមេដាយមាស World Championships, ឆ្នាំ១៩៨៤ ឈ្នះមេដាយមាស​អូឡាំពិក, ឆ្នាំ១៩៨៥ ឈ្នះមេដាយមាស World Cup និងឆ្នាំ១៩៨៦ ឈ្នះមេដាយមាស World Championships។

ក្រៅពីឈ្នះមេដាយមាសលំដាប់​ពិភព​លោក​ ក្រុម​នារីចិនក៏ប្រមូលបានមេដាយមាសជា​ច្រើន​ទៀតក្នុងព្រឹត្តិការណ៍​ក្នុង​តំបន់។ ពួកគេ​បាន​ឈ្នះមេដាយមាស៩ ប្រាក់៣ និង​សំរិទិ្ធ១ ពី​​ព្រឹត្តិការណ៍​កីឡា​ទ្វីប​អាស៊ី Asian Games, ឈ្នះមេដាយមាស១៣ ប្រាក់៤ និង​សំរិទិ្ធ១ ពី​​ការ​ប្រកួត​បាល់ទះ​ជើង​ឯក​អាស៊ី​ Asian Championship, ឈ្នះមេដាយមាស៥ និង​ប្រាក់២ ពី​ការ​ប្រកួត​ជើង​ឯក​អាស៊ី​ Asian Cup។ សរុបក្នុងព្រឹត្តិការណ៍ធំទាំង៣ក្នុងទ្វីបអាស៊ី ចិនប្រមូលមេដាយសរុបបានចំនួន៣៨គ្រឿង។ បើ​តាមសមិទ្ធផល​ទាំង​​នេះ ចិន​សម្រេចបានទាំងការប្រកួតកម្រិតពិភពលោក និងការប្រកួត​ថ្នាក់​តំបន់​ដែល​បាន​ជាក្រុម​បាល់ទះ​ជម្រើស​ជាតិ​នារី​ទទួលបានជោគជ័យ​បំផុត​៕

ប្រែ​សម្រួល៖ ផា រតនា