លោក ហ៊ុន ម៉ាណែត ឧបត្ថម្ភ​សម្ភារ​​និង​គ្រឿង​អេឡិចត្រូនិក​ដល់​សាលា​ពលទាហាន​

លោក​ឧត្ដមសេនីយ៍ឯក​ ហ៊ុន ម៉ាណែត អគ្គ​មេបញ្ជាការ​រង នៃ​កងយោធពលខេមរភូមិន្ទ និជា​មេបញ្ជាការ​កង​ទ័ព​ជើង​គោក ផ្តល់ការបំពាក់សម្ភារការិយាល័យ និងគ្រឿងអេឡិចត្រូនិក ជូនដល់សាលាពលទាហាន​ទាំង​៦​យោធភូមិភាគចំណុះកងទ័ពជើងគោក ដោយក្នុងមួយអង្គភាពទទួលបាន កុំព្យូទ័រចំនួន០៦ គ្រឿង កុំព្យូទ័រ​លើតុ ចំនួន១៤គ្រឿង ម៉ាស៊ីន​ព្រីនធ័រ ចំនួន១៣គ្រឿង ម៉ាស៊ីនកូពីខ្នាតធំ ចំនួន០១គ្រឿង ម៉ាស៊ីន​ស្លាយ ចំ​នួន ០៦គ្រឿង ក្តាខៀនចល័តចំនួន​១៨ផ្ទាំង តុការិយាល័យ ចំនួន១១ តុដាក់កុំព្យូទ័រ ចំនួន ១៤ និងទូ​ដាក់​ឯកសារ ចំនួន០៣។

ពិធីប្រគល់-ទទួល ត្រូវបានប្រារព្ធធ្វើរយៈពេល៣ថ្ងៃ នៅតាមទីតាំងផ្ទាល់ ដែលមានការអញ្ជើញចូលរួមពីតំ​ណាងរបស់អង្គភាពទាំង៦ ជាមួយនិងក្រុមការងារជំនួយការ មេបញ្ជាការកងទ័ពជើងគោក ព្រមទាំងផ្នែក ពាក់ព័ន្ធ​មួយចំនួនទៀតផងដែរ។

ការផ្តល់ជូននូវគ្រឿងបំពាក់ជូនសាលាយោធា និងសម្ភារផ្សេងៗ ទៅដល់បណ្តាអង្គភាពនីមួយៗ គឺជាផ្នែក​មួយ នៃការ​យកចិត្តទុកដាក់គិតគូរលើកិច្ចការងារ របស់ទ័ពជាទូទៅ ដែលកន្លងមក ​ មេបញ្ជាការ​កង​ទ័ព​ជើង​គោក តែង​ផ្តល់ជូនជាបន្តបន្ទាប់ដល់បណ្តាអង្គភាពចំណុះនីមួយៗ។

ការ​ឧបត្ថម្ភ​គ្រឿង​បរិក្ខារ​ការិយាល័យ​ទាំងនេះ ក៏​សំដៅ​បង្ក​លក្ខណៈងាយស្រួល បង្កើនប្រសិទ្ធិភាពការងារ​​បំ​ពេញដល់ការខ្វះខាតចាំបាច់ ដែលឆ្លើយតបដល់កិច្ចការងារ​បណ្ដុះបណ្ដាល​ធនធាន​មនុស្ស នៃកង​យោធ​ពល​ខេមរភូមិន្ទ ដែលជាឆ្អឹងខ្នងការពារជាតិមាតុភូមិ។ 

នាយទាហាន នាយទាហានរង និងពលទាហានទាំងអស់នៅក្នុងសាលាពលទាហានទាំង៦ យោធភូមិភាគ បានគោរពថ្លែងអំណរគុណយ៉ាងជ្រាលជ្រៅចំពោះមេបញ្ជាការកងទ័ពជើងគោក ដែលជានិច្ចកាលតែងតែ​ផ្តល់ការយកចិត្តទុកដាក់ ដោះស្រាយគ្រប់បែបយ៉ាងជួយសម្រួលដល់កិច្ចការងារ និងការរស់នៅរបស់យោ​ធិន​គ្រប់អង្គភាព ព្រមទាំងបានសន្យា​ថា និងខិតខំថែរក្សាសម្ភារទាំងនេះឱ្យបានល្អ និងប្រើប្រាស់​បម្រើ​ដល់​កិច្ច​ការងារ​អង្គភាព​ប្រកប​ដោយ​ប្រសិទ្ធិភាព​បំផុត៕

អត្ថបទ ៖ កោះកែវ