ចិន រិះគន់អ្នកប្រឆាំងច្បាប់សន្តិសុខជាតិថ្មីរបស់ ហុងកុង

ប្រទេសចិនបានបញ្ចេញមតិប្រឆាំងនឹងអ្នករិះគន់ច្បាប់សន្តិសុខជាតិថ្មីរបស់ហុងកុង ដោយចោទប្រកាន់រដ្ឋាភិបាលអង់គ្លេសថា មានផ្នត់គំនិតនៃអាណានិគម និងថ្កោលទោសសហភាពអឺរ៉ុបថាលាក់ពុត ។ នេះបើយោងតាមការចេញផ្សាយរបស់សារពត៌មាន CNA កាលពីថ្ងៃទី២០ ខែមីនាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងហុងកុង ដែលជាអតីតអាណានិគមរបស់ចក្រភពអង់គ្លេស មុនពេលការប្រគល់មកឲ្យចិនវិញនាឆ្នាំ ១៩៩៧ កាលពីថ្ងៃអង្គារកន្លងងទៅបានអនុម័តច្បាប់សន្តិសុខថ្មី ក្នុងមាត្រា ២៣ គឺផ្តន្ទាទោសលើបទស្មើសឧក្រិដ្ឋកម្មចំនួន ៥ ដូចជាអំពើក្បត់ជាតិ ការបះបោរ ការលួចព័ត៌មានសម្ងាត់របស់រដ្ឋ និងការធ្វើចារកម្ម ការបំផ្លិចបំផ្លាញ និងការជ្រៀតជ្រែកពីខាងក្រៅ ដើម្បីបិទចន្លោះប្រហោងដែលខ្វះខាតសម្រាប់ទីក្រុងមួយនេះ ។

ពាក់ព័ន្ធនឹងច្បាប់សន្តិសុខថ្មីនេះទៀតសោត រដ្ឋមន្ត្រីការបរទេសអង់គ្លេសលោក David Cameron បាននិយាយថា វានឹងធ្វើឲ្យប៉ះពាល់ដល់សិទ្ធិសេរីភាពបន្ថែមទៀតនៅក្នុងទីក្រុង ជាពិសេសធ្វើឲ្យប៉ះពាល់ដល់សេចក្តីថ្លែងការណ៍រួមចិន-អង់គ្លេស ជាកិច្ចព្រមព្រៀងចងជាអន្តរជាតិចុះហត្ថលេខាក្នុងឆ្នាំ ១៩៨៤ ដែលប្រទេសចិនបានយល់ព្រមគ្រប់គ្រងហុងកុងក្រោមគោលការណ៍ “ប្រទេសមួយប្រព័ន្ធពីរ” ។

ចំណែកជប៉ុនបានក៏បញ្ជាក់ជាថ្មីពីការព្រួយបារម្ភយ៉ាងខ្លាំងរបស់ខ្លួនអំពីការអនុម័តច្បាប់សន្តិសុខជាតិរបស់ទីក្រុងហុងកុងផងដែរ ដែលនឹងធ្វើឲ្យប៉ះពាល់ដល់ទំនុកចិត្តបន្ថែមទៀតក្នុងក្របខ័ណ្ឌ ប្រទេសមួយប្រព័ន្ធពីរ ។

ជាការឆ្លើយតប ក្រសួងការបរទេសចិននៅក្នុងទីក្រុងហុងកុងបានបន្ទោសចក្រភពអង់គ្លេសថាជាប្រទេសពុតត្បុត មិនទទួលខុសត្រូវលើស្ថានភាពរបស់ហុងកុង ដោយសារតែផ្នត់គំនិតដែលចាក់ឫសយ៉ាងជ្រៅក្នុងនាមជាអាណានិគម ឲ្យ ទទួលយកការពិត និងបោះបង់ចោលក្ដីស្រមៃចង់បន្តឥទ្ធិពលអាណានិគមរបស់ខ្លួននៅក្នុងទីក្រុងហុងកុងទៀត ។

ចំណែកឆ្លើយតបទៅនឹងការរិះគន់របស់សហភាពអឺរ៉ុប ការិយាល័យស្នងការចិនបានសម្តែងការមិនសប្បាយចិត្ត និងការប្រឆាំងយ៉ាងខ្លាំងចំពោះការអត្ថាធិប្បាយទាំងនោះ ហើយថែមទាំងឲ្យ EU បោះបង់ចោលការលាក់ពុត និងការប្រកាន់ពូជសាសន៍ទៀតទៅ ។

គួរបញ្ជាក់ថា ក្រុង​ប៉េកាំងធ្លាប់​បាន​ដាក់​ច្បាប់​សន្តិសុខ​ជាតិ​លើ​ទីក្រុង​ហុងកុង​ក្នុង​ឆ្នាំ ២០២០ ដែល​ផ្តោត​លើ​ការ​ដាក់​ទណ្ឌកម្ម​លើបទល្មើស​ឧក្រិដ្ឋកម្ម​ចំនួន ៤ គឺ​ការ​បះបោរ ការបំផ្លិចបំផ្លាញ អំពើ​ភេរវកម្ម និង​ការ​ឃុបឃិត​ជាមួយ​នឹង​កម្លាំង​បរទេស ហើយចាប់តាំងពីការអនុម័តរបស់ខ្លួន មនុស្សជិត ៣០០ នាក់ត្រូវបានចាប់ខ្លួននៅក្រោមច្បាប់នេះ ខណៈដែលអ្នកនយោបាយ សកម្មជន និងឥស្សរជនសាធារណៈជាច្រើននាក់ផ្សេងទៀតត្រូវបានចាប់ដាក់គុក ឬបង្ខំឲ្យនិរទេសខ្លួន ហើយសង្គមស៊ីវិលភាគច្រើនត្រូវបានបំបិទមាត់ ៕

អត្ថបទ ៖ ប៊ុន សុភាព