ជប៉ុន​ ដាស់តឿនអ្នកគាំទ្រកុំ​ធ្វើដំណើរទៅ​កូរ៉េខាងជើង​ ក្នុងជម្រុះ World Cup

ក្រសួងការបរទេសជប៉ុនថ្មីៗនេះបានចេញសារដាស់តឿនពលរដ្ឋរបស់ខ្លួនកុំឱ្យធ្វើ​ដំណើរ​ទៅ​ទស្សនាការប្រកួតបាល់ទាត់ នៅទីក្រុងព្យុងយ៉ាង ប្រទេសកូរ៉េខាងជើង នៅថ្ងៃទី២៦ ខែមីនា ខាងមុខនេះ ក្នុង​វគ្គជម្រុះបាល់ទាត់ពិភពលោក ឆ្នាំ២០២៦។

ក្រសួងការបរទេសជប៉ុនបាននិយាយថា ៖«ខ្លួន​ជំរុញយ៉ាងខ្លាំងដល់សាធារណជនឱ្យ​បដិសេធ»​ ពីការចូលរួមក្នុងការប្រកួតនៅថ្ងៃទី២៦ ខែមីនា ​ជាការប្រកួតលើកដំបូងសម្រាប់ក្រុមទាំងពីរនៅក្នុងប្រទេសកូរ៉េខាងជើង ចាប់តាំងពីឆ្នាំ២០១១។

«ដូច​អ្នកបានដឹងហើយថា ប្រទេសកូរ៉េខាងជើង មានអាកប្បកិរិយាអរិភាពចំពោះប្រទេសជប៉ុន ហើយការធ្វើដំណើរមិនត្រូវបានណែនាំសម្រាប់សាធារណជនទូទៅ»។ ក្រសួង​បាននិយាយនៅលើគណនី X។ 

ជប៉ុន និងកូរ៉េខាងជើង ប៉ះគ្នាជើងទី១ នៅទីក្រុងតូក្យូ ថ្ងៃព្រហស្បតិ៍ ទី​២១ ខែមីនា ឆ្នាំ​២០២៤ ជាផ្នែកមួយនៃការប្រកួតជម្រុះបាល់ទាត់ពិភពលោក ឆ្នាំ២០២៦ មុនពេលការប្រកួតត្រឡប់​ប្ដូរទឹកដីវិញនៅសប្តាហ៍ក្រោយនៅក្នុងទឹកដីកូរ៉េខាងជើង។

ជប៉ុនបានណែនាំជាយូរមកហើយដល់ពលរដ្ឋខ្លួនកុំធ្វើដំណើរទៅកូរ៉េខាងជើង បើទោះបីជាខ្លួនមិនបានហាមឃាត់ក៏ដោយ។ ប្រទេសទាំងពីរមិនទាន់មានទំនាក់ទំនងការទូតមួយរយៈមកហើយ។

វាមិនច្បាស់ទេថាតើអ្នកគាំទ្រប៉ុន្មាននាក់អាចព្យាយាមធ្វើដំណើរទៅ​កូរ៉េ​ខាងជើង​ ប៉ុន្តែប្រសិនបើពួកគេទៅ​ ពួកគេត្រូវការទិដ្ឋាការកូរ៉េខាងជើង។ ទូរទស្សន៍ជប៉ុន NHK បានរាយការណ៍ថា ទោះបីជាមានការណែនាំជាទូទៅក៏ដោយ មន្ត្រីរដ្ឋាភិបាលចំនួន ១៤នាក់នឹងអមដំណើរក្រុមជម្រើសជាតិជប៉ុនទៅកាន់ការប្រកួតនេះ រួមជាមួយនឹងប្រព័ន្ធផ្សព្វផ្សាយមួយចំនួនតូច។

ការប្រកួតជើងទី១ នៃការប្រកួតជម្រុះនារីសម្រាប់ព្រឹត្តិការណ៍កីឡាអូឡាំពិក ទីក្រុងប៉ារីស ឆ្នាំ២០២៤ ត្រូវបានផ្លាស់ប្តូរពីរដ្ឋធានីកូរ៉េខាងជើង ទៅ​ទីលានអព្យាក្រឹត ឬទឹកដីកណ្ដាល នៅប្រទេសអារ៉ាប៊ីសាអ៊ូឌីត កាលពីខែមុន។ ទំនាក់ទំនងមានភាពតានតឹងយូរមកហើយ​លើឧបទ្វីបកូរ៉េ រវាងឆ្នាំ១៩១០ និង១៩៤៥ ហើយ​ថ្មីៗនេះដោយការបាញ់មីស៊ីលរបស់ទីក្រុងព្យុងយ៉ាងលើទឹកដីជប៉ុន។

ការចាប់ពង្រត់ពលរដ្ឋជប៉ុនដោយភ្នាក់ងារកូរ៉េខាងជើង ក្នុងទស្សវត្សរ៍ឆ្នាំ១៩៧០ និង១៩៨០ បង្ខំឱ្យបណ្តុះបណ្តាលអ្នកស៊ើបការណ៍ជាភាសា និងទំនៀមទម្លាប់ជប៉ុនក៏ជាចំណុចសំខាន់នៃការឈ្លោះប្រកែកគ្នាជាយូរមកហើយ៕

ប្រែសម្រួល៖ មន្នីរ័ត្ន
ប្រភព៖ Inside The Games