លោកស្រី ឱ វណ្ណឌីន ណែនាំឱ្យពលរដ្ឋ ថែរក្សាសុខភាពផ្លូវចិត្ត ក្នុងបរិបទប្រយុទ្ធនឹងជំងឺកូវីដ-១៩

លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានធ្វើការណែនាំដល់ប្រជាពលរដ្ឋកម្ពុជាត្រូវចេះរៀនពីរបៀបថែរក្សាសុខភាពផ្លូវចិត្ត ដើម្បីធ្វើឱ្យសុខភាពផ្លូវចិត្តរបស់យើងបានល្អប្រសើរឡើងដូចជាការបំបាត់ស្ត្រេសនិងការថប់អារម្ភនៅក្នុងបរិបទប្រយុទ្ធនឹងជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានមានប្រសាសន៍ នៅថ្ងៃទី ១០ តុលានេះថា ការថែទាំសុខភាពផ្លូវចិត្តជារឿយៗត្រូវបានគេមិនអើពើដែលជះឥទ្ធិពលដល់ស្ថានភាពសុខភាពទូទៅរបស់បុគ្គល និងបង្កើតបញ្ហាទាក់ទងនឹងផ្លូវចិត្តដែលមិនត្រូវបានដឹងជាមុននៅក្នុងជីវិតប្រចាំថ្ងៃ។

លោកស្រី បានបន្តទៀតថា «ដូច្នេះ រៀនពីរបៀបថែរក្សាសុខភាពផ្លូវចិត្តដើម្បីធ្វើឱ្យសុខភាពផ្លូវចិត្តរបស់អ្នកប្រសើរឡើងដូចជាការបំបាត់ស្ត្រេសនិងការថប់អារម្ភនៅក្នុងបរិបទប្រយុទ្ធនឹងជំងឺកូវីដ-១៩»។

លោកស្រី លី អាយលែន ប្រធានអង្គការសុខភាពពិភពលោកប្រចាំនៅកម្ពុជាបានលើកឡើងថាជំងឺកូវីដ១៩ បានគំរាមគំហែងដល់សុខភាពផ្លូវចិត្តប្រជាពលរដ្ឋកម្ពុជាពិសេសជនងាយរងគ្រោះដូចជាកម្មករទេសន្តប្រវេសន៍។

លោកស្រីបានបន្តថា អង្គការសុខភាពពិភពលោក និងអង្គការសហប្រជាជាតិ នឹងធ្វើការជាមួយគ្នាដោយធានាថាក្រុមជនរងគ្រោះនឹងទទួលបាននូវសុខភាពផ្លូវចិត្ត និងចិត្តសាស្ត្រសង្គម៕

អត្ថបទៈ សំអឿន