ព័ត៌មានជាតិ

ស្ថានភាពទឹកនៅតំបន់ទំនប់៥៤ ស្រុកស្អាងបានស្រកចុះ ក្រោយមានអន្តរាគមន៍បញ្ជៀសការជន់លិច

បានផុស

៤ years មុន

នៅ

ថ្ងៃពុធ ១៣ តុលា ២០២១

ដោយ

ស្ថានភាពទឹកនៅតំបន់ទំនប់៥៤ ស្ថិតនៅភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល បានស្រកចុះបានចំនួន០,២ម៉ែត្រ (២តឹក)បន្ទាប់ពីក្រុមការងារជំនាញពាក់ព័ន្ធបានជីកកាយប្រឡាយចំនួន០៤ទីតាំងដើម្បីធ្វើការរំដោះទឹកមិនឱ្យជន់លិចលំនៅដ្ឋាន និងផលដំណាំរបស់ប្រជាកសិករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងឱកាសដឹកនាំក្រុមការងារ និងមន្ត្រីជំនាញចុះពិនិត្យនីវ៉ូទឹកនៅតំបន់ទំនប់៥៤កាលពីរសៀលថ្ងៃទី១២ ខែតុលា ឆ្នាំ២០២១ លោក គង់ សោភ័ណ្ឌ អភិបាលខេត្តកណ្តាល បានមានប្រសាសន៍ថា នីវ៉ូទឹកនៅតំបន់ទំនប់៥៤ គឺស្ថានភាពទឹកមានការស្រកចុះបានចំនួន០,២ម៉ែត្រ(២តឹក)បន្ទាប់ពីក្រុមការងារជំនាញពាក់ព័ន្ធបានជីកកាយប្រឡាយចំនួន០៤ទីតាំង ក្នុងនោះនៅប្រឡាយមេ៩៦ ទំហំ៣៥ម៉ែត្រ ចំនួន១ទីតាំង និងនៅចំណុចទំនប់៥៤ ចំនួន៣ទីតាំង ទំហំ៤០ម៉ែត្រ ដើម្បីជួយសម្រួលចរន្តទឹកហូររំដោះទឹកចេញពីភូមិព្រែករាំង១ សង្កាត់កំពង់សំណាញ់ ក្រុងតាខ្មៅ បង្ហូរទៅបឹង៥០០(បឹងជើងលោង) ដើម្បីបញ្ជៀសការជន់លិចលំនៅដ្ឋាន និងផលដំណាំប្រជាពលរដ្ឋនៅតំបន់មួយចំនួន នៅសង្កាត់កំពង់សំណាញ់ និងសង្កាត់ព្រែកហូរ នៃក្រុងតាខ្មៅ។

លោកអភិបាលខេត្ត បានណែនាំដល់មន្ទីរធនធានទឹកនិងឧតុនិយម ត្រូវតាមដាន និងពិនិត្យកម្ពស់ទឹកឱ្យបានជាប់លាប់ និងត្រូវសហការជាមួយអាជ្ញាធរពាក់ព័ន្ធត្រៀមលក្ខណៈអោយបានគ្រប់ពេលវេលា។

លោកអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ មេត្តាបង្កើនការយកចិត្តទុកដាក់ និងប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ ព្រមទាំងចូលរួមសហការ និងផ្តល់ព័ត៌មានជូនដល់អាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍បានទាន់ពេលវេលា៕

អត្ថបទ៖ សំអឿន