កីឡា

ស្ងាត់ៗ ក្រុមនារី Esports កម្ពុជា ឈានដល់វគ្គ ៨ ក្រុមចុងក្រោយ ជើងឯកក្លិបពិភពលោក នៅបារាំង

បានផុស

២ ម៉ោង មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

ក្រុមកីឡាការិនីអេឡិចត្រូនិកកម្ពុជា Galaxy Phoenix បានឈានដល់វគ្គ ៨ ក្រុមចុងក្រោយ បន្ទាប់ពីទទួលបានជ័យជម្នះ ២ ប្រកួតជាប់គ្នានៅវគ្គជម្រុះក្នុងពូល B នៃព្រឹត្តិការណ៍ប្រកួតកីឡាអេឡិចត្រូនិកអន្តរជាតិ MLBB Women’s International ដែលហៅកាត់ MWI ឆ្នាំ ២០២៦ នៅទីក្រុងបារីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជម្រុះជុំទី១ ក្នុងពូល B ក្រុមនារីកម្ពុជា Galaxy Phoenix បានយកឈ្នះក្រុមរបស់ហ្វីលីពីន Natus Vincere ដោយលទ្ធផល ២-០ ដើម្បីឡើងទៅកាន់វគ្គបន្តនៅក្នុងពូលកាលពីយប់ថ្ងៃទី១៤ ខែកក្កដា ឆ្នាំ ២០២៦។

នៅវគ្គជម្រុះជុំទី២ ក្រុមនារីកម្ពុជា បានយកឈ្នះក្រុម Falcons Vega Mena របស់ប្រទេសអារ៉ាប៊ីសាអ៊ូឌីត ដោយលទ្ធផល ២-០ ទៀតដើម្បីឡើងទៅកាន់វគ្គ ៤ ក្រុមចុងក្រោយប្រចាំពូល B។ តាមរយៈជ័យជម្នះ ២ លើកជាប់គ្នានេះ ក្រុម Galaxy Phoenix បានឡើងទៅកាន់វគ្គ ៨ ក្រុមចុងក្រោយហើយ ខណៈក្រុមចាញ់ត្រូវធ្លាក់ត្រូវវគ្គខ្វែងកម្រិតទាប។

រហូតដល់ពេលនេះ រកឃើញក្រុមចំនួន ៤ ហើយបានឡើងដល់វគ្គខ្វែង ៨ ក្រុមចុងក្រោយ គឺ ក្រុម Galaxy Phoenix (កម្ពុជា) និងក្រុម Team Vitality (ឥណ្ឌូណេស៊ី) មកពីពូល B ខណៈ ក្រុម Team Rey Young (ម៉ាឡេស៊ី) និង ក្រុម Geltek Cyber Team (រុស្ស៊ី) មកពីពូ A។ ការប្រកួតថ្ងៃទី៣ គឺថ្ងៃទី១៦ ខែកក្កដា ឆ្នាំ ២០២៦ នឹងបន្តស្វែងរក ៤ ក្រុមទៀតឡើងវគ្គ ៨ ក្រុមចុងក្រោយ។

សម្រាប់វិញ្ញាសា MLBB ផ្នែកនារីនេះមានក្រុមចំនួន ១៦ ដែលត្រូវបានជម្រុះពីគ្រប់តំបន់ទូទាំងពិភពលោកដើម្បីទទួលបានកៅអីនៅជុំចុងក្រោយនៅទីក្រុងបារីស ប្រទេសបារាំង។ វិញ្ញាសានេះម្រាប់ជ័យជលាភីលេខ ១ ជាជើងឯកទទួលបានប្រាក់រង្វាន់ ១៥ ម៉ឺនដុល្លារអាមេរិក ក្រុមលេខ ២ ទទួលបាន ៩ ម៉ឺនដុល្លារអាមេរិក ក្រុមលេខ ៣ ទទួលបាន ៥ ម៉ឺនដុល្លារអាមេរិក ក្រុមលេខ ៤ ទទួលបាន ៣ ម៉ឺនដុល្លារ និងក្រុមពីលេខ ៥ ដល់ លេខ ៨ ទទួលបាន ២ ម៉ឺនដុល្លារអាមេរិកដូច្នេះ ហើយក្រុមពីលេខ ៩ ដល់លេខ ១៦ ក៏ទទួលបានប្រាក់ឧបត្ថម្ភលើកទឹកចិត្តដែរ៕