កីឡា

ឆោម ចាន់ថន ចាប់ផ្ដើមស្រឡាញ់កីឡាហែលទឹកបន្ទាប់ពីចង់ឈ្នះអ្នកហាត់ជាមួយគ្នា

បានផុស

១១ វិនាទី មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

កីឡាករ ឆោម ចាន់ថន ថាចូលហ្វឹកហាត់កីឡាហែលទឹកដំបូងៗគឺគិតគ្រាន់តែមកដើម្បីហែលសប្បាយនោះទេ និងមិនដែលចង់ក្លាយជាអ្នកអាជីពអ្វីនោះឡើយ ប៉ុន្តែការបន្តហាត់ជាប្រចាំ និងការចង់ឈ្នះគ្នាអំឡុងការហ្វឹហាត់បានធ្វើឲ្យរូបគេបន្តដល់សព្វថ្ងៃនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ឆោម ចាន់ថន

ជម្រើសជាតិផ្នែកកីឡាហែលទឹកពាក់ជើងទា ឆោម ចាន់ថន បានឲ្យដឹងថា ដោយសារតែមានសាច់ញ្ញាតិខាងហែលទឹកច្រើន និងមានការជំរុញពីលោកយាយរបស់ខ្លួនផងនោះទើបរូបគេចាប់ផ្ដើមហាត់កីឡាហែលទឹកនេះតាំងពីអាយុប្រហែល ៨ឆ្នាំមកម្ល៉េះ។

ម្ចាស់មេដាយសំរឹទ្ធស៊ីហ្គេមវៀតណាមរូបនេះបន្ថែមទៀតថា ចូលហាត់ដំបូងៗនោះគឺគ្រាន់តែចង់ហែលទឹកលេងសប្បាយដូចក្មេងដទៃនោះទេ។ បើចាប់អារម្មណ៍ ឬដាក់គោលដៅឲ្យក្លាយជាកីឡាករជម្រើសជាតិដូចពេលនេះនោះគឺមិនដែលធ្លាប់គិតឡើយ។

កីឡាករ ឆោម ចាន់ថន

ក្នុងវ័យ ១៤ឆ្នាំ និងបានហ្វឹកហាត់យូរៗទៅរូបគេក៏ចាប់ផ្ដើមចង់ប្រកួតប្រជែងជាមួយមិត្តភ័ត្រ និងបានមើលឃើញពីការប្រណាំងប្រជែងឈ្នះ-ចាញ់ គ្នាផងនោះទើបធ្វើឲ្យខ្លួនចាប់ស្រឡាញ់ និងចង់បង្កើនសមត្ថភាពតាំងពីពេលនោះមក។ បច្ចុប្បន្ននេះកីឡាហែលទឹកជាចំណងចំណូលចិត្ត និងជាមិត្តដ៏ល្អសម្រាប់រូបគេទៅហើយ។ ចាន់ថន បានបង្កើតក្ដីស្រមៃ និងតស៊ូអត់ធ្មត់ជាខ្លាំងដើម្បីឈ្នះមេដាយក្នុងការប្រកួតនៅអន្តរជាតិនៅពេលខាងមុខ។ សរុបមកការហ្វឹកហាត់ជាប្រចាំក្លាយជាទម្លាប់ និងអាចជានិស្ស័យផងនោះទើបបណ្ដុះឲ្យរូបគេបន្តក្លាយជាកីឡាករហែលទឹកជម្រើសជាតិ។

កីឡាករ ឆោម ចាន់ថន

បញ្ជាក់ដែរថា កីឡាករ ឆោម ចាន់ថន បច្ចុប្បន្ននេះជាជម្រើសជាតិហែលទឹកពាក់ជើងទា។ រូបគេចាប់ហ្វឹកហាត់កីឡាហែលទឹកនេះអំឡុងអាយុប្រហែល ៨ឆ្នាំមកម្ល៉េះ។ កីឡាកររូបនេះបានជាប់ជម្រើសជាតិអំឡុងឆ្នាំ២០១៨ និងបន្តជាប់ជម្រើសជាតិផ្នែកហែលទឹកពាក់ជើងទានៅឆ្នាំ២០២២ ។ រូបគេធ្លាប់ឈ្នះមេដាយសំរឹទ្ធនៅស៊ីហ្គេមវៀតណាម ឆ្នាំ២០២២ និងឈ្នះមេដាយប្រាក់នៅស៊ីហ្គេមកម្ពុជា ឆ្នាំ២០២៣ និងធ្លាប់ឈ្នះមេដាយនៅព្រឹត្តិការណ៍ហែលទឹកពាក់ជើងទាអាស៊ីអាគ្នេយ៍កន្លងមកផងដែរ៕