ព័ត៌មានអន្ដរជាតិ

ហូឡង់ កត់ត្រាចំនួនអ្នកស្លាប់លើសពី ៩០០នាក់ ដោយសាររលកកម្តៅកើនឡើងខ្លាំង

បានផុស

១ minute មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

រលកកម្តៅនៅអឺរ៉ុបកំពុងកើនកាន់តែខ្លាំងឡើង ញឹកញាប់ និងរីករាលដាលជាងពេលណាៗទាំងអស់។ អ្នកវិទ្យាសាស្ត្រ បានកត់សម្គាល់ថា អឺរ៉ុបកំពុងឡើងកម្តៅលឿនជាងទ្វីបដទៃទៀត ហើយកម្តៅប្រហែលពីរដងនៃមធ្យមភាគសកល។

ជាក់ស្តែង ប្រទេសហូឡង់ បានកត់ត្រាចំនួនអ្នកស្លាប់លើសពី ៩០០នាក់ នៅចុងខែមិថុនា និងដើមខែកក្កដា ដោយសារការកើនកម្តៅ ខណៈរលកកម្តៅបានវាយប្រហារនៅអឺរ៉ុបខាងលិច ដែលហូឡង់ជាប្រទេសចុងក្រោយបង្អស់ដែលត្រូវបានរាយការណ៍ពីការកើនឡើងនៃអត្រាមរណភាពបណ្តាលមកពីកត្តាអាកាសធាតុ។ នេះបើយោងតាមអាជ្ញាធរសុខាភិបាល បានឲ្យដឹងនៅថ្ងៃទី១៥ ខែកក្កដា និងចុះផ្សាយដោយទីភ្នាក់ងារសារព័ត៌មាន AFP ។

ឡានបាញ់ទឹកនៅហូឡង់ ដោយសារក្តៅពេក។ រូបភាព៖ AFR

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានជាតិសុខភាពសាធារណៈនិងបរិស្ថាន(RIVM) លើកឡើងក្នុងសេចក្តីថ្លែងការណ៍មួយថា៖ « មូលហេតុនៃការស្លាប់ទាំងនោះមិនទាន់ដឹងច្បាស់នៅឡើយទេ ប៉ុន្តែវាទំនងជាកម្តៅបានដើរតួនាទីយ៉ាងសំខាន់»។

ប្រទេសនេះបានកត់ត្រាការស្លាប់ចំនួន ៩១១នាក់ ច្រើនជាងធម្មតា ចាប់ពីថ្ងៃទី២២ ខែមិថុនា ដល់ថ្ងៃទី៥ ខែកក្កដា ដោយមនុស្សមានអាយុ ៨០ឆ្នាំឡើងទៅ រងផលប៉ះពាល់យ៉ាងខ្លាំង ក៏ដូចជាអ្នករស់នៅភាគខាងត្បូង និងខាងកើត ជាកន្លែងដែលសីតុណ្ហភាពខ្ពស់បំផុត ជិត ៤០អង្សាសេក្នុងតំបន់មួយចំនួន។

យោងតាមការប៉ាន់ស្មាន រលកកម្ដៅជាបន្តបន្ទាប់នៅអឺរ៉ុបថ្មីៗនេះបានបំបែកកំណត់ត្រាសីតុណ្ហភាពខ្ពស់ បណ្តាលឱ្យមានមនុស្សស្លាប់រាប់ពាន់នាក់ក្នុងប្រទេសនានា រួមមាន បែលហ្ស៊ិក អង់គ្លេស បារាំង និងអេស្ប៉ាញ។

យោងតាមក្រុមអ្នកវិទ្យាសាស្ត្រ World Weather Attribution រលកកម្ដៅខែមិថុនានឹងស្ទើរតែមិនអាចទៅរួចទេ បើគ្មានការប្រែប្រួលអាកាសធាតុ៕

សម្រួល៖ ណឺ មិនា