ព័ត៌មានជាតិ

ត្រីកាម៉ុង លក់បានថ្លៃលើទីផ្សារ គ្រាមានព្យុះភ្លៀង២សប្តាហ៍កន្លងទៅ

បានផុស

២ years មុន

នៅ

ថ្ងៃចន្ទ ១៨ តុលា ២០២១

ដោយ

កោះកុង ៖ ក្រុមប្រជានេសាទជាលក្ខណៈគ្រួសារ ហាក់រីករាយនឹងការលក់ដូរត្រីកាម៉ុងបានថ្លៃជូនអតិថិជនដែលនិយមបរិភោគប្រភេទមួយនេះ គ្រាអ្នកនេសាទផ្សេងទៀតពុំហ៊ានចេញទៅនេសាទដោយសារខ្លាចព្យុះភ្លៀង២សប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃត្រីកាម៉ុងនៅលើទីផ្សារក្នុងស្រុក មានការហក់ឡើងខ្ពស់ចាប់ពីចន្លោះ១៥,០០០រៀល ទៅ១៨,០០០ រៀល ក្នុងមួយគីឡូក្រាម បើធៀបនឹងអាកាសធាតុអំណោយផលសម្រាប់ការចេញនេសាទសមុទ្រ។ ទិន្នផលនេសាទត្រីកាម៉ុងរបស់ប្រជានេសាទ ទោះរកបានតិច ឬច្រើនដឹងតែមានឈ្មួញទទួលទិញយកអស់តែម្តង។

អ្នកស្រី ស៊ី វ៉ើ ម្ចាស់ទូកត្រីកាម៉ុង និងជាអ្នកទទួលទិញត្រីកាម៉ុងតាមទូកនេសាទដូចគ្នា នៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង បានឲ្យដឹងថ្ងៃទី១៨ ខែតុលានេះថា ពេលមានព្យុះភ្លៀងប៉ុន្មានអាទិត្យមកនេះ ទិន្នផលគ្រឿងសមុទ្រថយចុះ ព្រោះគ្មានអ្នកចេញរកដូចពេលសព្វដង។ រីឯអ្នកហ៊ានចេញនេសាទតែងទទួលប្រមូលផលតិចឬច្រើនតាមលទ្ធភាពរបស់ពួកគេ ដើម្បីយកមកផ្គត់ផ្គង់អាហារជូនអតិថិជនប្រចាំថ្ងៃ។

អ្នកទទួលទិញត្រីកាម៉ុងបោះដុំ អះអាងទៀតថា បើការនេសាទបានច្រើនតម្លៃទិញចូលពីប្រជានេសាទ ត្រឹម៩,០០០រៀល ហើយប្រសិនពេលណាខ្សត់ នោះតម្លៃទិញចូលពីប្រជានេសាទ ហក់ឡើងដល់១២,០០០រៀល ក្នុងមួយគីឡូក្រាម។ ដោយឡែកចំពោះតម្លៃលក់ចេញនៅលើទីផ្សារវិញ គឺមានចន្លោះពី១៥,០០០រៀលទៅ១៨,០០០រៀល ក្នុងមួយគីឡូក្រាម។

គួរជម្រាបថា ត្រីកាម៉ុង ជាត្រីសមុទ្រមួយប្រភេទ ត្រូវបានពលរដ្ឋកម្ពុជាទទួលស្គាល់ថា មាននៅតែក្នុងខេត្តចំនួន៤ ជាប់សមុទ្រនៃប្រទេសកម្ពុជាប៉ុណ្ណោះ គឺខេត្តកោះកុង កំពត កែប និងខេត្តព្រះសីហនុ។ ទោះយ៉ាងត្រីប្រភេទនេះ ក៏កំពុងទទួលរងហានិភ័យខ្ពស់ពីការនេសាទ ខុសច្បាប់របស់ក្រុមឈ្មួញធ្វើការនេសាទក្នុងអំឡុងត្រីនេះកំពុងពងកូនផងដែរ។

លោក សេង ប៊ុណ្ណា អនុប្រធានជលផលខេត្តកោះកុង ក៏ទទួលស្គាល់ដែរថា ប្រភេទត្រីកាម៉ុងបច្ចុប្បន្ន កំពុងប្រឈមនិងការនេសាទខុសច្បាប់គ្រប់រដូវកាល ជាហេតុនាំឱ្យផលត្រីកាន់តែថមថយទៅៗ។ ពី១ឆ្នាំទៅ១ឆ្នាំ មន្ត្រីខណ្ឌរដ្ឋបាលជលផលខេត្ត ចុះពន្យល់ណែនាំដល់បងប្អូនប្រជានេសាទ ឱ្យបញ្ឈប់ការនេសាទខុសច្បាប់ ពោលគឺក្នុងរដូវកាលត្រីកំពុងពងកូន។

តំបន់សហគមន៍នេសាទសមុទ្រ ដែលក្រសួងកសិកម្មរុក្ខាប្រមាញ់ និងនេសាទ កាត់បញ្ចូល ជាតំបន់គ្រប់គ្រងដែនជម្រកសុវត្ថិភាពត្រីកាម៉ុង គឺមួយផ្នែកធំស្ថិតនៅសហគមន៍ព្រៃកោងកាងពាមក្រសោប ឃុំពាមក្រសោប ស្រុកមណ្ឌលសីមា និងមួយផ្នែកទៀត ស្ថិតក្នុងឃុំកោះកាពិ ស្រុកកោះកុង មានទំហំ១,២៨៣ហិកតា៕

អត្តបទ ៖ សិរីវឌ្ឍនៈ