ព័ត៌មានជាតិ

វឌ្ឍនភាព អាជ្ញាធរជាតិអប្សរាសម្រេចការងារអភិវឌ្ឍរមណីយដ្ឋានអង្គរ

បានផុស

៥ years មុន

នៅ

ថ្ងៃអង្គារ ១៦ វិច្ឆិកា ២០២១

ដោយ

ក្នុងឆ្នាំ២០២១ នេះ អាជ្ញាធរអប្សរាដែលទទួលបន្ទុកគ្រប់គ្រងតំបន់រមណីយដ្ឋានអង្គរបានសម្រេចការងារជាច្រើន ជាពិសេសលើការកែលម្អ លើកសោភណភាព ដែលបានផ្លាស់ប្ដូរមុខមាត់ថ្មីតំបន់បេតិកភណ្ឌអង្គរ ខណៈកម្ពុជាក៏ដូចជាខេត្តសៀមរាបត្រៀមបើកទទួលភ្ញៀវទេសចរណ៍ឡើងវិញនៅពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង កុសល អ្នកនាំពាក្យអាជ្ញាធរអប្សរាបានឲ្យកម្ពុជាថ្មីដឹងនៅព្រឹកនេះថា រយៈពេលមួយឆ្នាំ២០២១ នេះ ក្រុមការងារអាជ្ញាធរជាតិអប្សរាបានដាក់គោលដៅអភិវឌ្ឍតំបន់ឧទ្យានអង្គរតាមរយៈការធ្វើកិច្ចការជាច្រើន ធ្វើយ៉ាងណាឲ្យរមណីយដ្ឋានអង្គរដែលជាសម្បត្តិបេតិកភណ្ឌពិភពលោក ទទួលបានការលើកមុខមាត់ឲ្យស័ក្ដិសមជាតំបន់ទេសចរណ៍ធំបំផុត សម្រាប់ទទួលភ្ញៀវទេសចរណ៍ជាតិនិងអន្តរជាតិមកទស្សនា។

បើតាមមន្រ្តីអ្នកនាំពាក្យ ការងារដែលសម្រេចបានមានដូចជាការងារផ្នែកអភិរក្សដោយបានជួសជុលប្រាសាទកណ្ដាលស្រះស្រង់បានជោគជ័យ ជួសជុលទ្វារទន្លេអ៊ុំ សម្រេចជោគជ័យការជួសជុលប្រាសាទទន្លេស្ងួត ធ្វើការជួសជុលស្រះទឹកខាងជើងប្រាសាទអង្គរ និងជួសជុលខ្លោងទ្វារខាងកើតប្រាសាទអង្គរវត្ត និងជ្រុងរ៉ូតទី ៣ នៃប្រាសាទអង្គរវត្ត។

លើការងារអភិវឌ្ឍន៍ប្រកបដោយចិរភាព ដោយបានស្តារនិងកែលំអហេដ្ឋារចនាសម្ព័ន្ធផ្លូវថ្នល់តាមវង់តូច វង់ធំ ផ្លូវទៅព្រលាន ផ្លូវ ៦០ ម៉ែត្រ រួមទាំងផ្លូវសម្តេចវិបុលបញ្ញា សុខ អាន និងការលើកសោភណភាពទេសភាពមុខប្រាសាទអង្គរវត្ត ព្រលានជល់ដំរី និងកំពុងរៀបចំកន្លែងចំណតនៅភ្នំបាក់ខែង និងជួសជុលរហាត់ទឹក រួមទាំងការងារស្តារប្រឡាយ និងការដាំកូនឈើឡើងវិញ។ ជាមួយគ្នានេះ ក៏មានជួសជុលឧបករណ៍សម្ភារៈបរិក្ខារវិស័យទេសចរណ៍។

លោកឡុង កុសលបានបន្តថា អាជ្ញាធរជាតិអប្សរាបានបញ្ចប់ការកែលម្អសោភណភាពនៅមុខប្រាសាទអង្គរវត្ត និងបន្តរៀបចំនៅត្រពាំងសេះក្លាយជាកន្លែងទេសភាព។

លោកថា ពីមុននៅបរិវេណមុខប្រាសាទអង្គរវត្ត និងតំបន់ត្រពាំងសេះមានការលក់ដូររញ៉េរញ៉ៃ ធ្វើឱ្យប៉ះពាល់ដល់សណ្តាប់ធ្នាប់។ ប៉ុន្តែបន្ទាប់ពីអាជ្ញាធរជាតិអប្សរាចាប់ផ្តើមអនុវត្តគម្រោងកែប្រែតំបន់នេះ រៀបចំឱ្យក្លាយជាផ្លូវថ្មើជើង សួនឈើប្រណីតដើមផ្កាព្រៃ និងរុក្ខជាតិលម្អ កន្លែងទាំងនេះបានកែប្រែទៅជាភាពស្រស់បំព្រង មានពណ៌បៃតង បរិយាកាសល្អ និងមានសណ្តាប់ធ្នាប់។

បើតាមលោក ឡុង កុសល នៅចុងឆ្នាំនេះក៏នឹងមានការរៀបចំពិធីអបអរសាទរ ដែលសៀមរាបក្លាយជាទីក្រុងវប្បធម៌អាស៊ាន និងព្រឹត្តិការណ៍សំខាន់ៗផ្សេងៗទៀត ដើម្បីទទួលភ្ញៀវទេសចរណ៍ឡើងវិញ។

មុនមានជំងឺកូវីដ-១៩ រមណីយដ្ឋានអង្គរទទួលបានទេសចរប្រមាណ ៥ ទៅ ៦ លាននាក់ ទាំងទេសចរក្នុងស្រុក និងក្រៅប្រទេស។ អាជ្ញាធរអប្សរា គ្រោងរៀបចំដំណើរទេសចររបៀបថ្មី គឺចង់ឱ្យភ្ញៀវទេសចរទទួលបានបទពិសោធន៍ទៅនឹងជីវិតរស់នៅប្រចាំថ្ងៃ ដឹងពីវប្បធម៌ ប្រពៃណី និងទំនៀមទម្លាប់ផ្សេងៗរបស់អ្នកស្រុកអង្គរ និងបានយល់ពីបេតិកភណ្ឌមានជីវិត ក្រៅពីទស្សនាប្រាសាទតែមួយមុខនោះ៕

អត្ថបទ៖ ប៊ុណ្ណារ៉ា

Related Topics:អាជ្ញាធរជាតិអប្សរា