ប្រជាពលរដ្ឋប្រមាណ ៣០-៤០ ភាគរយ បានមកលេងទីកម្សាន្តនានា ក្នុងខណ្ឌដូនពេញ

លោក សុខ ពេញវុធ អភិបាល នៃគណៈអភិបាលខណ្ឌដូនពេញ មានប្រសាសន៍នៅព្រឹកថ្ងៃទី ១៩ ខែវិច្ឆិកាឆ្នាំ​២០២១​នេះថា ប្រជាពលរដ្ឋប្រមាណ ៣០ ភាគរយ ទៅ ៤០ ភាគរយប្រៀបធៀប ទៅនឹងព្រះរាជពិធីបុណ្យអុំទូក (ឆ្នាំមុន) បានមកលេងកម្សាន្ត នៅតាមទីសប្បាយភាពផ្សេងៗ ក្នុងមូលដ្ឋានខណ្ឌដូនពេញ ប្រកបដោយស្នាមញញឹម និង ភាពរីករាយ។

អភិបាលខណ្ឌដូនពេញបន្តទៀតថា ក្នុងនាមអាជ្ញាធរខណ្ឌដូនពេញ លោកបានដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ សហការជាមួយ ស្នងការនគរបាលរាជធានីភ្នំពេញរៀបចំ សន្តិសុខ សណ្តាប់ធ្នាប់របៀបរៀបរយសាធារណៈ ជូនប្រជាពលរដ្ឋ ដែលមកលេងកម្សាន្ត នៅតាមបណ្តោយសួនច្បារច្រាំងទន្លេ មុខព្រះបរមរាជវាំង និង ទីសប្បាយភាពផ្សេងៗ ក្នុងមូលដ្ឋានខណ្ឌដូនពេញ ក្នុងថ្ងៃឈប់សម្រាក នៃព្រះរាជពិធីបុណ្យអុំទូកថ្ងៃទី១ ដោយបាន​បែងចែកកម្លាំងដឹកនាំរួមប្រចាំការដោយ លោក សុខ ពេញវុធ អភិបាលខណ្ឌដូនពេញ និងលោកឧត្តមសេនីយ៍ទោ សុង លី ស្នងការទីស្ដីទី នៃស្នងការដ្ឋាននគរបាលរាជធានីភ្នំពេញ ដឹកនាំរួមនៅគោលដៅ មុខព្រះបរមរាជវាំង និងគោលដៅផ្សេងៗទៀត ដូចជាផ្សារាត្រី កំពង់ចម្លងភ្នំពេញ-អរិយក្សត្រ ជាដើម៕

អត្ថបទ៖ រស្មី