អាជ្ញាធរ​បន្ទាយមានជ័យ​ចាប់ផ្តើម​ចុះ​ពិនិត្យ​តំបន់​ព្រៃ​លិចទឹក​

ក្រុមគណៈកម្មការចម្រុះ ដែលបង្កើតឡើងដោយ រដ្ឋបាលខេត្តបន្ទាយមានជ័យ បានចាប់ផ្តើម ចុះពិនិត្យតាមតំបន់ព្រៃលិចទឹក ជាប់បឹងទន្លេសាប ក្នុងភូមិសាស្ត្រខេត្តបន្ទាយមានជ័យ។

ការចុះត្រួតពិនិត្យនេះ ប្រព្រឹត្តទៅនៅព្រឹកថ្ងៃទី ៣០ ខែវិច្ឆិកា ឆ្នាំ២០២១ ដោយប្រើប្រាស់​មធ្យោបាយទូកកាណូតស្មាច ប្រមាណជាង ២០ គ្រឿង ចែកជាបីក្រុមធ្វើដំណើរតាមផ្លូវទឹក ក្រោម​ការ​ដឹកនាំរបស់លោក អ៊ុំ រាត្រី អភិបាលខេត្តបន្ទាយមានជ័យ ដោយចុះពិនិត្យតាម​តំបន់ព្រៃ​លិចទឹក​ពិនិត្យបង្គោលព្រំដីព្រៃលិចទឹកតំបន់បី ក្នុងភូមិសាស្ត្រឃុំប្រាសាទ ឃុំភ្នំលៀប នៃស្រុកព្រះនេត្រព្រះ និងឃុំសំបួរ ស្រុកមង្គលបូរី នៃខេត្តបន្ទាយមានជ័យ តាមបទបញ្ជា និងចំណាត់ការរបស់​ប្រមុខរាជ​រដ្ឋាភិបាលកម្ពុជា។

ប្រតិបត្តិការនេះដែរក៏មានការចូលរួមពីសំណាក់កងកម្លាំងទាំង៣ប្រភេទ រួមមាន កម្លាំងនគរបាល ដឹកនាំដោយលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំង​អាវុធ​ហត្ថដឹកនាំដោយ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត​បន្ទាយមានជ័យ កម្លាំងយោធាកងពលតូចថ្មើរជើងលេខ៥១ ដឹកនាំដោយលោក សឹង្ហ ទុំ មេបញ្ជាការកងពលតូចថ្មើរជើងលេខ៥១ កម្លាំងសឹករងបន្ទាយមានជ័យ​ដឹកនាំដោយលោក​ឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងបន្ទាយមានជ័យ និងមន្ត្រីមន្ទីរសុរិយោដី ដឹកនាំដោយលោកអាង ណារិទ្ធ ប្រធានមន្ទីរសុរិយោដីខេត្តព្រមទាំងមន្ត្រីរាជការស៊ីវិលជាច្រើននាក់ទៀតចូលរួមផងដែរ។

លោក អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា ក្រុមការងារចុះដកបង្គោល លេខ៧​នៃបង្គោលកំណត់ព្រំដីតំបន់បីថា ក្រុមការងារដែលដឹកនាំដោយលោក​និងមានការចូលរួម​ពីក្រុម​ការងារថ្នាក់គឺដើម្បីចុះពិនិត្យមើលភូមិសាស្រ្តដីព្រៃលិចទឹកតាមបទបញ្ជារបស់សម្តេចតេជោ ហ៊ុន សែន ក្នុងនោះក្រុមការងារនៃមន្ទីរជំនាញបានចុះកំណត់ព្រំប្រទល់តំបន់បី។

លោក អ៊ុំ រាត្រី​បន្តទៀតថាដីព្រៃលិចទឹកក្នុងតំបន់បីដែលកំណត់​ដោយរដ្ឋាភិបាលនៅខេត្តបន្ទាយ​មានជ័យមានប្រមាណជាង១២០០០ហិចតា។ការពិនិត្យនេះផងដែលគឺដើម្បីឈានដល់អ្នកពាក់ព័ន្ទកាន់កាប់ខុសច្បាប់ឈានដល់ការបង្រ្កាប។

កាលពីពេលថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បទបញ្ជាឲ្យតាមបណ្តារដ្ឋបាលខេត្ត និងអង្គភាពប្រឆាំងអំពើពុករលួយ អាវុធហត្ថលើផ្ទៃប្រទេស និងឯលោក ជា សុផារ៉ា បានចុះអនុវត្តបង្ក្រាប និងដកហូតយកមកវិញ នូវដីព្រៃលិចទឹក ដែលត្រូវបានជនខិលខូច ទន្ទ្រានកាន់កាប់ដោយខុសច្បាប់៕

អត្ថបទៈ ពៅ