ព័ត៌មានជាតិ

លោកស្រី ឱ វណ្ណឌីន ៖ អ្នកចូលបរិភោគនៅហាងបឺហ្គឺរ Carls Jr ចាប់ពីថ្ងៃទី២៧វិច្ឆិកាដល់៥ធ្នូទើបជាប់ពាក់ព័ន្ធព្រឹត្តិការណ៍២៨វិច្ឆិកា

បានផុស

៤ years មុន

នៅ

ថ្ងៃអាទិត្យ ៦ ធ្នូ ២០២០

ដោយ

ភ្នំពេញ ៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានអះអាងថាបើគិតតាមបច្ចេកទេស គឺអ្នកដែលបានប៉ះពាល់បុគ្គលិកហាង Carl’s Jr Burger ទួលទំពូង ដែលមានឆ្លងជំងឺកូវីដ១៩ផ្ទាល់និងប្រយោលក្នុងប្រហែលពីថ្ងៃទី២៧ ខែវិច្ឆិកាដល់ថ្ងៃទី៥ ខែធ្នូ ឆ្នាំ២០២០ប៉ុណ្ណោះ។ ចំណែកអ្នកដែលចូលទៅបរិភោគមុនថ្ងៃទី២៧វិច្ឆិកាឆ្នាំ២០២០មិនជាប់ពាក់ព័ន្ធទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បានធ្វើឡើងបន្ទាប់ពីមានប្រជាពលរដ្ឋដែលបានចូលទៅបរិភោគអាហារនៅហាង Carl’s Jr Burger ទួលទំពូងបានចោទសួរថា តើចំពោះអតិថិជន ដែលបានចូលបរិភោគ អាហារនៅទីនោះ អាចប្រឈមខ្លាំង នៅចន្លោះពេលវេលាណា ឬថ្ងៃណាមួយព្រោះថាមានអ្នកខ្លះទៅហាងនោះនៅថ្ងៃទី ១៩ ខ្លះទៅទី២០ វិច្ឆិកាឆ្នាំ២០២០។

លោកស្រីនៅតែបន្តណែនាំនិងស្នើសុំអ្នកធ្វើចត្តាឡីស័កនៅផ្ទះទាំងអស់ សូមធ្វើឲ្យបានត្រឹមត្រូវជាទីបំផុត តាមការណែនាំរបស់ក្រសួងសុខាភិបាល ហើយដាច់ខាតកុំចេញដើររហេតរហូត ឲ្យសោះ ហើយតាមដានសុខភាពផ្ទាល់ខ្លួន ប្រសិនបើមានអាការៈប្រែប្រួល សុំហៅទៅលេខ១១៥។

លោកស្រីសូមជូនពរលោកអ្នកឲ្យជៀសផុតពីវីរុសចង្រៃនេះគ្រប់ៗគ្នា។ ក្រសួងសុខាភិបាលបានប្រកាសនៅព្រឹកថ្ងៃទី០៦ ខែធ្នូ ឆ្នាំ២០២០នេះពីការរកឃើញអ្នកឆ្លងកូវីដ១៩ថ្មីម្នាក់ទៀត ដែលជាប់ពាក់ព័ន្ធនឹងព្រឹត្តិការណ៍ «សហគមន៍២៨ វិច្ឆិកា» គឺលោក សាយ សៅលាង អាយុ២១ឆ្នាំ ស្នាក់នៅជិតវត្តសន្សំកុសល សង្កាត់បឹងទំពន់ ខណ្ឌមានជ័យ រាជធានីភ្នំពេញ ជាបុគ្គលិកហាង Carl’s Jr Burger ទួលទំពូង ធ្លាប់រស់នៅជាមួយអ្នកជំងឺឈ្មោះ ញិល សុខកូឡា ភេទប្រុស អាយុ២២ឆ្នាំ មុនថ្ងៃទី២៨ ខែវិច្ឆិកា ឆ្នាំ២០២០ ដែលធ្វើការនៅហាង Pedro ផ្លូវព្រះសីហនុ ដែលបានរកឃើញវិជ្ជមានកូវីដ១៩ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ សូវៀត៕
ដោយ ៖ សំអឿន