​ចុះ​ត្រជាក់ជាង ២០ អង្សាសេ ប្រជាពលរដ្ឋក្រុង​បាត់ដំបង នាំគ្នាសម្រុកទិញខោអាវក្រាស់ៗពាក់

ខេត្តបាត់ដំបង÷ អាកាសធាតុចាប់ផ្តើមចុះត្រជាក់ តាំង​ពីព្រឹករហូតដល់ល្ងាចនាថ្ងៃទី៦ខែធ្នូឆ្នាំ២០២០ តាម​បណ្តាផ្សារធំៗមួយចំនួនក្នុងខេត្តបាត់ដំបង ប្រជាពលរដ្ឋជាច្រើននាំគ្នាទិញខោអាវរងារត្រៀមបង្ការទប់ស្កាត់និងភាពត្រជាក់នេះ។

ប្រជាពលរដ្ឋប្រុសស្រីជាច្រើនរស់នៅក្នុងក្រុងបាត់ដំបងបានលើកឡើងប្រហាក់ប្រហែលគ្នាថា អាកាសធាតុចាប់ផ្តើមប្រែប្រួលចុះត្រជាក់លាយឡំជាមួយខ្យល់ហួតហែង ធ្វើ​ឲ្យ​ពួកគេ​ប្រញាប់ប្រញាល់ស្វែងរកទិញសម្លៀកបំពាក់ទប់ស្កាត់មានដូចជា៖ មួកអំបោះ,ស្រោមដៃ,ស្រោមជើងនិងខោអាវរងារក្រាស់ៗ ដើម្បីទប់ទល់នឹងអាកាសធាតុធ្លាក់ត្រជាក់នេះពិសេសត្រៀមបង្ការសម្រាប់ឳពុកម្តាយជីដូនជីតាដែលមានអាយុច្រើន ដែលពួកគាត់​ចាញ់ភាពត្រជាក់ព្រមទាំងកូននិងចៅតូចៗជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមអ្នកចូលទិញអ្នកស្រី.ចិន្តា មានទីលំនៅក្នុងក្រុងបាត់ដំបងបានឲ្យដឹងថា អាកាសធាតុចាប់ផ្តើមប្រែប្រួលត្រជាក់តាមរដូវកាលជាបន្តបន្ទាប់មួយរយ:ពេលចុងក្រោយមកនេះ មានភាពបានត្រជាក់គួរសមពិសេសពេលព្រឹកព្រលឹមនិងពេលយប់។ ដើម្បីទប់ទល់នឹងភាពត្រជាក់ លោកស្រីបានមកកាន់ផ្សារបឹងឈូកក្នុងក្រុងបាត់ដំបងដើម្បីរកទិញខោឬអាវរងារព្រោះឆ្នាំនេះអាកាសធាតុត្រជាក់ខ្លាំងជាងឆ្នាំកន្លងទៅនិងអូសបន្លាយពេលយូរទៀត។

កាលើកឡើងរបស់ពលរដ្ឋក៏ប្រហាក់ប្រហែលនិងលោកឡុង.ផល្គុណ ប្រធានមន្ទីរធនធានទឹកនិងឧតុនិយមខេត្តបាត់ដំបងផងដែរ។ លោកបានបញ្ជាក់អោយដឹងនៅព្រឹកថ្ងៃទី៦ខែធ្នូឆ្នាំ២០២០នេះ នៅតំបន់ទីប្រជុំជននានាអាកាសធាតុត្រជាក់មានសីតុណ្ហភាព២០អង្សាសេនិងនៅតំបន់ព្រៃជួរភ្នំដូចជាស្រុកសំឡូតជាដើម អាកាសធាតុចន្លោះ​ពី​១៨​ដល់​១៩​អង្សាសេ ហើយអាកាសធាតុបែបនេះនឹងបន្តអូសបន្លាយរយ:ពេលយូរជាងឆ្នាំកន្លងទៅ៕

អត្ថបទ៖ សៅ សារិទ្ធ