ព័ត៌មានជាតិ
អាជ្ញាធរខេត្តកំពត ចុះរុះរើសំណង់មិនរៀបរយ ដែល សង់លើដីរដ្ឋ ក្បែរដងព្រែកក្បាលរមាស
របងថ្មដ៏រឹងមាំ ដែលគេលួចរៀបចាក់គ្រឹះ នៅក្បែរដងព្រែកក្បាលរមាស ស្ថិតក្នុងភូមិត្រពាំងធំ ឃុំជុំក្រៀល ស្រុកទឹកឈូ ខេត្តកំពត ត្រូវបានអាជ្ញាធរខេត្ត ដឹកនាំកងកម្លាំងចម្រុះចុះទៅរុះរើ និងយកធ្វើជាសម្បត្តិរដ្ឋវិញ ក្រោមបង្គាប់បញ្ជា របស់លោក ម៉ៅ ធនិន អភិបាលខេត្តកំពត។
ប្រតិបត្តិការនេះ បានប្រព្រឹត្តឡើង នៅព្រឹកថ្ងៃទី ១៣ ខែធ្នូ ឆ្នាំ ២០២១ ដឹកនាំដោយលោក សេង សេរីបុត្រ អភិបាលរងខេត្តកំពត និងមានការចួលរួមពីលោកព្រះរាជអាជ្ញា អមសាលាដំបូងខេត្ត កងកម្លាំងប្រដាប់អាវុធ អាជ្ញាធរដែនដី និងមន្ត្រីគ្រប់ជំនាញ។
ចំពោះប្រតិបត្តិការ ដឹកនាំកម្លាំងចម្រុះ រុះរើសំណង់មិនរៀបរយ ដែលសង់លើដីរដ្ឋនេះ លោក សេង សេរីបុត្រ អភិបាល រងខេត្តកំពត បានបញ្ជាក់យ៉ាងច្បាស់ថា រដ្ឋបាលខេត្ត ក្រោមការដឹកនាំរបស់លោក ម៉ៅ ធនិន ដាច់ខាតត្រូវតែរុះរើសំណង់ខុសច្បាប់ ពិសេសសំណង់ដែលសង់រំលោភចូល ក្នុងដីរបស់រដ្ឋ ឬសំណង់ប៉ះពាល់ដីចំណីព្រែកជាដើម។
យ៉ាងណាក៏ដោយ ជុំវិញនឹងការរុះរើសំណង់ មិនស្របច្បាប់នៅជាប់ចំណី ព្រែកក្បាលរមាសនេះ លោក នាក់ សុវណ្ណារី អភិបាលស្រុកទឹកឈូ ក៏បានបញ្ជាក់ដែរថា ក្រោយពីទទួលបាននូវសេចក្តីរាយការណ៍ពីការចាក់ដី និងធ្វើរបងថ្មទន្ទ្រានយកដីរដ្ឋ ស្ថិតក្នុងភូមិសាស្ត្រខាងលើ លោកក៏បានបញ្ជាកម្លាំងសមត្ថកិច្ច និងមន្ត្រីជំនាញទៅហាមឃាត់ ឲ្យបញ្ឈប់សកម្មភាព។ ប៉ុន្តែម្ចាស់សំណង់ នៅតែបន្តលួចធ្វើ ទើបរដ្ឋបាលស្រុក បានចេញលិខិតជូនដំណឹងដល់ម្ចាស់សំណង់ ឲ្យរុះរើចេញចំនួន ៣លើកមកហើយ តែម្ចាស់សំណង់មានចេតនារឹងរូស ទើបអាជ្ញាធរប្រើធម៌ក្តៅបែបនេះ តែម្តង។
សូមបញ្ជាក់ថា របងថ្មដ៏រឹងមាំប្រវែងជាង ៥០០ម៉ែត្រ ស្ថិតជាប់ដងព្រែកក្បាលរមាស ក្នុងភូមិត្រពាំងធំ ឃុំជុំក្រៀល ស្រុកទឹកឈូ ខេត្តកំពត ត្រូវបានអាជ្ញាធរខេត្ត ដឹកនាំកម្លាំងចម្រុះរុះរើចេញ ដោយប្រើគ្រឿងចក្រចំនួន ៣គ្រឿង។ ជាមួយគ្នានេះ លោកអភិបាលស្រុកទឹកឈូ បានអះអាងថា ផ្នែកខ្លះនៃផ្ទៃដីនៅភូមិសាស្ត្រខាងលើ គឺស្ថិតនៅក្នុងតំបន់វិនិច្ឆ័យ ប៉ុន្តែចំពោះការចាក់ដី ឬធ្វើរបងនៅទីនេះ ម្ចាស់សំណង់មិនបានសុំច្បាប់ ពីរដ្ឋបាលដែនដីឡើយ។
ជាមួយនឹងចំណាត់ការដ៏ក្តៅនេះ មហាជនពិតជាមានការត្រកអរ ហើយសង្ឃឹមថា លោកអភិបាលខេត្តកំពតថ្មី ម៉ៅ ធនិន នឹងប្រើកណ្តាប់ដៃដែក បំបែកសំណុំរឿងក្ដីពាក់ព័ន្ធនឹងដីធ្លីធំៗ ជាច្រើនទៀត ជាពិសេសចាត់ការដល់ជនឆ្លៀតឱកាស ដែលលួចបន្លំ បំពារបំពានដីរបស់រដ្ឋបន្តទៀត៕
អត្ថបទ៖ សេង ណារិទ្ធ
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍៥ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ២ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore