ដើម្បីដើរឱ្យទាន់ការឡើងចុះនៃតម្លៃប្រេងឥន្ធនៈ ក្រសួងនឹងផ្លាស់ប្តូរការប្រកាសតម្លៃប្រេង ១០ថ្ងៃម្តង

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា ក្រសួងនឹងរៀបចំធ្វើការផ្លាស់ប្តូរការជូនដំណឹងពីពេលវេលាកំណត់តម្លៃប្រេងឥន្ធនៈ ពីរយៈពេល ១៥ថ្ងៃ មកត្រឹម ១០ថ្ងៃម្តងវិញ ដើម្បីឱ្យទាន់នៃការឡើងចុះនៃតម្លៃប្រេងឥន្ធនៈ។ លោករដ្ឋមន្រ្តីថ្លែងបែបនេះ នៅក្នុងសិក្ខាសាលាភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ផលប៉ះពាល់ បញ្ហាប្រឈមនិងកំណើនអនាគត សម្រាប់អាស៊ីបូព៌ា និងអាស៊ាន កាលពីថ្ងៃទី១៤ ខែមីនា ឆ្នាំ២០២២ នៅសណ្ឋាគារ Hyatt Regency រាជធានីភ្នំពេញ។

លោក ប៉ាន សូរស័ក្តិ បានលើកឡើងថា បច្ចុប្បន្ននេះតម្លៃប្រេងឥន្ធនៈមានការប្រែប្រួលឡើងចុះលឿន ដូចច្នេះការផ្លាស់ប្តូរការជូនដំណឹងនេះជាវិធានការបឋមបំផុតដើម្បីផ្តល់ជូនភាពឈ្នះឈ្នះដល់អ្នកប្រើប្រាស់ប្រេងឥន្ធនៈ និងវិស័យឯកជន ដែលមកដល់ពេលនេះគឺមិនទាន់ ឡើងថ្លៃពេកនោះទេ ប៉ុន្តែអាចនឹងឡើងថ្លៃនៅពេលឆាប់ៗខាងមុខនេះ។

​ពាក់ព័ន្ធនឹងបញ្ហាជម្លោះរវាងរុស្ស៊ី និងអ៊ុយក្រែន ក្រសួងពាណិជ្ជកម្ម កំពុងមានការព្រួយបារម្ភពីបញ្ហាប្រេងឥន្ធនៈ អាចនឹងបន្តឡើង ដោយសារបញ្ហាទណ្ឌកម្មសេដ្ឋកិច្ច រុស្ស៊ី ទៅកន្លែងផ្សេងៗ។ នេះបើតាមការបញ្ជាក់របស់លោករដ្ឋមន្រ្តី៕