កម្ពុជា បាននាំកសិផលមានគុណភាព​ទៅទីផ្សារចិនបានចំនួន ៣១មុខ

រហូតមកដល់ពេលនេះ កម្ពុជា បាននាំផលិតផលកសិកម្មចំនួន ៣១មុខហើយ ទៅកាន់ទីផ្សារប្រទេសចិន។ នេះបើតាមការបញ្ជាក់របស់លោក ងិន ឆាយ អគ្គនាយកនៃអគ្គនាយកដ្ឋានកសិកម្ម នៅក្នុងសន្និសីទសារព័ត៌មាន ស្ដីពី «លក្ខខណ្ឌគុណភាពឆ្លើយតប និងការនាំចេញកសិផល ទាក់ទងនឹងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងចិន» នៅថ្ងៃទី ១៨ ខែ មីនា។​

លោក ងិន ឆាយ បានលើកឡើងថា កសិផលដែលបាននាំចេញនោះ​ ជាប្រភេទកសិផលនៅក្នុងទំនិញមិនជាប់កម្រិតកំណត់។ លោក ងិន ឆាយ បានថ្លែងដូច្នេះថា« កាលនាំគ្រាប់ស្វាយចន្ទីចេញកន្លងទៅ មិនចាំបាច់ចរចា បើកទីផ្សារ ឬកំណត់ភូតគាមអនាម័យទេ គ្រាន់តែកម្ពុជាចេញលិខិតបញ្ជាក់ពីតម្លៃប្រាប់ទៅចិនថា មិនមានសមាសធាតុចង្រៃដែលជាភូតគាមអនាម័យ ហើយផលិតផលដែលផលិតបាននេះ មានសុវត្ថិភាព និងបំពេញបាននូវភូតគាមអនាម័យ ដែលមានចែងនៅក្នុងស្តង់ដារភូតគាមអនាម័យអន្តរជាតិ»។

មានមតិសាធារណជនបានលើកឡើងថា ការចរចាមានភាពតឹងតែងម្លឹង តើធ្វើម្តេចនឹងងាយបាននាំចេញ? ជាការឆ្លើយតបលោក ងិន ឆាយ បានជម្រាបជូនថា ទិដ្ឋភាពបច្ចេកទេសគឺបែបនេះ មានន័យថា ទំនិញដែលជាប់កម្រិតកំណត់ គឺគេបានចេងនៅក្នុងច្បាប់រួចជាស្រេច មិនអាចមិនចរចាហើយនាំចេញបាននោះទេ។

តាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា ចិន ភាគីទាំងពីរ បាននិងកំពុងចរចាលើផលិតផលមៀនប៉ៃលិន និងត្រីប្រា ព្រមទាំងទំនិញផ្សេងៗទៀត ពីកម្ពុជាទៅចិន។

សូមបញ្ជាក់ថា ទំនិញកសិកម្មកម្ពុជា បាននាំចេញទៅប្រទេសចិនកាលពីឆ្នាំ ២០២១ មានចំនួនជាង ៨៣ម៉ឺនតោន។ នេះជាការបញ្ជាក់របស់លោក ងិន ឆាយ៕

អត្ថបទ៖ ទួន សុផល