ព័ត៌មានជាតិ

ប្រេសិតពិសេសរបស់ប្រធានអាស៊ាន បន្តជួបសវនាការជាមួយរដ្ឋមន្រ្តីចំនួន ៣រូបទៀត នៅមីយ៉ាន់ម៉ា

បានផុស

៤ years មុន

នៅ

ថ្ងៃអង្គារ ២២ មីនា ២០២២

ដោយ

តាមព័ត៌មានពីក្រសួងការបរទេសកម្ពុជា បានឲ្យដឹងថា លោកឧបនាយករដ្ឋមន្ត្រី ប្រាក់ សុខុន បានបន្តជួបសវនាការជាមួយលោក វុនណា ម៉ោងល្វីន រដ្ឋមន្ត្រីការបរទេសមីយ៉ាន់ម៉ា, លោក កូកូ ឡាំង រដ្ឋមន្រ្តីសហប្រតិបត្តិការអន្តរជាតិ និងជាប្រធានក្រុមការងារ ស្តីពី ជំនួយមនុស្សធម៌អាស៊ាន, និងលោកឧត្តមសេនីយ៍ យ៉ា ព្យេ រដ្ឋមន្ត្រីការិយាល័យរដ្ឋាភិបាលសហព័ន្ធ និងជាប្រធានគណៈកម្មាធិការសាមគ្គីភាពជាតិ និងកសាងសន្តិភាព នៃមីយ៉ាន់ម៉ា។

សូមបញ្ជាក់ថា កាលពីព្រឹកថ្ងៃទី ២១ ខែមីនា ឆ្នាំ ២០២២ បន្ទាប់ពីទៅដល់មីយ៉ាន់ម៉ាភ្លាម លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាប្រេសិតពិសេសរបស់ប្រធានអាស៊ាន ស្ដីពី មីយ៉ាន់ម៉ា បានជួបសវនាការជាមួយនាយឧត្តមសេនីយ៍ជាន់ខ្ពស់ មីង អោងឡាំង ប្រធានក្រុមប្រឹក្សារដ្ឋបាលរដ្ឋ នៃសាធារណរដ្ឋសហភាពមីយ៉ាន់ម៉ា។

នៅក្នុងជំនួបសវនាការនោះ ភាគីទាំងពីរបានពិភាក្សា និងផ្លាស់ប្តូរទស្សនៈ ស្តីពី ការអនុវត្ត និងវឌ្ឍនភាព នៃការព្រមព្រៀងជាឯកច្ឆន្ន ៥ ចំណុចរបស់អាស៊ាន ក្រោយពីដំណើរទស្សនកិច្ច របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីខែមករា។

សូមជម្រាបថា លោកឧបនាយករដ្ឋមន្ត្រី ប្រាក់ សុខុន បានដឹកនាំគណៈប្រតិភូអញ្ជើញ ទៅបំពេញទស្សនកិច្ចការងារ នៅសាធារណរដ្ឋសហភាពមីយ៉ាន់ម៉ា កាលពីព្រឹកថ្ងៃទី ២១ ខែមីនា ដើម្បីបំពេញទស្សនកិច្ចរយៈពេល៣ថ្ងៃ។

ដំណើរទស្សនកិច្ចលើកដំបូង នៃប្រេសិតពិសេសរបស់ប្រធានអាស៊ាន ស្ដីពី មីយ៉ាន់ម៉ា មានគោលបំណង ដើម្បីបង្កើតលក្ខខណ្ឌអំណោយផល ដើម្បីឈានទៅដល់ការបញ្ចប់អំពើហិង្សា ក៏ដូចជាការអត់ធ្មត់ឲ្យបានខ្ពស់បំផុតពីគ្រប់ភាគីទាំងអស់, ការចែកចាយជំនួយមនុស្សធម៌ ដោយមានការគាំទ្រនិងសម្របសម្រួលពីលេខាធិការដ្ឋានអាស៊ាន និងមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ និងការគ្រប់គ្រងគ្រោះមហន្តរាយ, និងលើកទឹកចិត្តឱ្យមានកិច្ចពិគ្រោះយោបល់ កិច្ចសន្ទនានយោបាយ ក្នុងចំណោមភាគីពាក់ព័ន្ធទាំងអស់។

ដំណើរទស្សនកិច្ចនេះ ផ្អែកលើឯកសារមូលដ្ឋាន នៃកិច្ចព្រមព្រៀងជាឯកច្ឆន្ទប្រាំចំណុច របស់អាស៊ាន, លទ្ធផលនៃដំណើរទស្សនកិច្ចការងារ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ទៅកាន់ប្រទេសមីយ៉ាន់ម៉ា នៅថ្ងៃទី ៧-៨ ខែមករា ឆ្នាំ ២០២២, លទ្ធផលនៃកិច្ចពិភាក្សារវាង សម្តេចតេជោនាយករដ្ឋមន្ត្រី ហ៊ុន សែន និងនាយឧត្តមសេនីយ៍ជាន់ខ្ពស់ មីង អោងឡាំង និងលទ្ធផល នៃកិច្ចប្រជុំចង្អៀត រដ្ឋមន្រ្តីការបរទេសអាស៊ាន នាពេលថ្មីៗនេះ៕

អត្ថបទ៖ កោះកែវ