ព័ត៌មានជាតិ

កិច្ចប្រឹងប្រែងរបស់កម្ពុជាក្នុងវិស័យសិទ្ធិមនុស្ស ត្រូវបានបង្ហាញជូនសម័យប្រជុំលើកទី ៤៩ នៃក្រុមប្រឹក្សាសិទ្ធិមនុស្ស

បានផុស

៤ years មុន

នៅ

ថ្ងៃពុធ ៦ មេសា ២០២២

ដោយ

ក្រុមប្រឹក្សាសិទ្ធិមនុស្ស របស់អង្គការសហប្រជាជាតិ បានបញ្ចប់សម័យប្រជុំលើកទី ៤៩ កាលពីថ្ងៃទី ១ ខែមេសា ឆ្នាំ ២០២២កន្លងទៅនេះ បន្ទាប់ពីបានរៀបចំកិច្ចសន្ទនាអន្តរសកម្ម ជាមួយអ្នករាយការណ៍ពិសេសតាមប្រធានបទ និងប្រទេសជាក់លាក់ចំនួន ៤១ កិច្ចពិភាក្សាទូទៅចំនួន ៩ និងកិច្ចពិភាក្សាជាក្រុមចំនួន ៨ ព្រមទាំងបានអនុម័តសេចក្តីសម្រេចចិត្ត ពាក់ព័ន្ធនឹងបញ្ហាតាមប្រធានបទ និងប្រទេសជាក់លាក់សរុបចំនួន ៣៥។ នេះបើតាមការឲ្យដឹងពីលោក អាន សុខខឿន ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ នាទីក្រុងហ្សឺណែវ។

លោក អាន សុខខឿន បានឲ្យដឹងនៅថ្ងៃនេះថា ក្នុងអំឡុងនៃកិច្ចប្រជុំរយៈពេល ៥សប្តាហ៍ (ពីថ្ងៃទី ២៨ ខែកុម្ភៈ ដល់ថ្ងៃទី ១ ខែមេសា ឆ្នាំ ២០២២) ស្ថានបេសកកម្មអចិន្ត្រៃយ៍ នៃព្រះរាជាណាចក្រកម្ពុជា ប្រចាំអង្គការសហប្រជាជាតិ នៅទីក្រុងហ្សឺណែវ បានចូលរួមទ្បើងថ្លែងបទអន្តរាគមន៍សរុប ៣៣ លើកបង្ហាញពីកិច្ចប្រឹងប្រែងសមិទ្ធផល និងវឌ្ឍនភាពក្នុងទិដ្ឋភាពច្បាប់គោលនយោបាយ និងការអនុវត្តជាក់ស្តែង របស់កម្ពុជាក្នុងការលើកកម្ពស់ និងការពារសិទ្ធិមនុស្សគ្រប់ប្រភេទ មានដូចជា៖ សិទ្ធិពលរដ្ឋ នយោបាយ សង្គម សេដ្ឋកិច្ច និងវប្បធម៌ រួមទាំងសិទ្ធិអភិវឌ្ឍន៍។ គណៈប្រតិភូកម្ពុជា ក៏បានចូលរួមចំណែកក្នុងកិច្ចពិភាក្សានានា ស្ដីពី ការពង្រឹងរបៀបរបបការងារ របស់ក្រុមប្រឹក្សាសិទ្ធិមនុស្ស និងអ្នករាយការណ៍ពិសេស ព្រមទាំងប្រធានបទ ស្តីពី ស្ថានភាពសិទ្ធិមនុស្សក្នុងប្រទេសមួយចំនួនផងដែរ។

បើតាមលោក អាន សុខខឿន នៅក្នុងកិច្ចប្រជុំរយៈពេល ៥សប្តាហ៍នោះ លោកបានលើកឡើងពីបញ្ហាមួយចំនួនដូចជា៖ ការឆ្លើយតបរបស់កម្ពុជា ចំពោះជំងឺរាតត្បាតកូវីដ-១៩ ដោយបានប្រកាន់គោលការណ៍សិទ្ធិមនុស្សជាស្នូល ជាពិសេសសិទ្ធិមានជីវិត សុខភាព និងការរស់រាន, កម្មវិធីឧបត្ថម្ភសាច់ប្រាក់ និងការចាក់វ៉ាក់សាំងការពារជំងឺកូវីដ-១៩ ដោយឥតគិតថ្លៃរបស់កម្ពុជាជាដើម, ការបរិច្ចាកម៉ាស់ការពាររាប់លាន រួមជាមួយវ៉ាក់សាំង និងសម្ភារៈបរិក្ខារវេជ្ជសាស្ត្រផ្សេងទៀត ដល់ប្រទេសមួយចំនួន ឈរលើស្មារតីសាមគ្គីភាព និងកិច្ចខិតខំប្រឹងប្រែងរួមគ្នា ដើម្បីទប់ស្កាត់ការឆ្លងរាតត្បាតជំងឺកូវីដ-១៩ ដោយអនុវត្តតាមការលើកឡើងថា “គ្មាននរណាម្នាក់អាចមានសុវត្ថិភាពឡើយ ប្រសិនបើគ្រប់គ្នាពុំមានសុវត្ថិភាព”, ការផ្តល់លទ្ធភាពជូនជនពិការ ទទួលបានសេវាសុខុមាលភាពសង្គម ស្របតាមផែនការយុទ្ធសាស្រ្តជាតិស្តីពីពិការភាព (២០១៩-២០២៣), សិទ្ធិទទួលបានរបបអាហារ, ការលុបបំបាត់អំពើហិង្សាលើកុមារនៅទូទាំងពិភពលោក, ការផ្តល់សច្ចាប័នលើអនុសញ្ញា ទាក់ទងនឹងវប្បធម៌ជាច្រើន, ភាពសុខដុមរមនាផ្នែកសាសនា, គោលនយោបាយជាតិ ស្តីពីការអភិវឌ្ឍជនជាតិដើមភាគតិច, ការគាំពារសមភាពយេនឌ័រ និងការផ្តល់អំណាចដល់ស្ត្រី, កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលថ្នាក់ដឹកនាំជាស្រ្តី លើកទី២ ក្រោមប្រធានបទ “កសាងចីរភាព បរិយាប័ន្ន និងភាពធន់៖ សហគ្រិនភាពរបស់ស្រ្តីនៅអាស៊ាន”, ការដោះស្រាយចំពោះការកើនឡើងនៃការប្រើប្រាស់ភាសាស្អប់ខ្ពើម ការផ្សព្វផ្សាយព័ត៌មានមិនពិត និងការញុះញង់។

ជាមួយគ្នានោះ ក៏បានលើកឡើងពីការគាំទ្ររបស់កម្ពុជា នូវរាល់កិច្ចខិតខំប្រឹងប្រែងសំដៅកែលម្អការងាររបស់អ្នករាយការណ៍ពិសេស រួមទាំងការអំពាវនាវឱ្យបង្កើតយន្តការត្រួតពិនិត្យ ដើម្បីធានាការអនុវត្ត ប្រកបដោយប្រសិទ្ធភាពនូវក្រមសីលធម៌ របស់អ្នករាយការណ៍ពិសេសផងដែរ៕

អត្ថបទ៖ កោះកែវ