អ្នកឯកទេសអប់រំ៖ ការរៀនតាមអនឡាញមិនអាចបោះបង់បានទេ

លោក បណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា បានមានប្រសាសន៍នៅព្រឹកថ្ងៃទី២៨ ខែមេសានេះថា បើទោះបីជាមានការបើករៀននៅក្នុងថ្នាក់ជាធម្មតាឡើងវិញក៏ដោយ ក៏ការរៀនតាមអនឡាញនៅតែមិនអាចបោះបង់ចោលបានទេ ព្រោះវាមានផលប្រយោជន៍ច្រើន។

លោកបណ្ឌិតបានបន្តថា បច្ចុប្បន្ននេះក្រសួងអប់រំ យុវជន និងកីឡា បានតម្រូវឱ្យសិស្សត្រូវរៀនក្នុងថ្នាក់ផង និងក្រៅថ្នាក់ផងដែលគេហៅថា អនឡាញភ្លើស (បូក) ដើម្បីបង្ការការឆ្លងរាលដាលជំងឺកូវីដ-១៩។

លោកបណ្ឌិតបានបន្តទៀតថា៖ “សព្វថ្ងៃនៅតែបន្តអនុវត្តដដែល ហើយទោះបីទៅថ្ងៃក្រោយមានការរៀនក្នុងថ្នាក់ពេញលេញក៏ដោយ ក៏ការសិក្សាតាមអនឡាញនៅតែមិនបោះបង់ចោលទេ ព្រោះថាបច្ចុប្បន្នទាំងនៅបរទេសក្តី និងប្រទេសយើងក្តីក្នុងបរិបទសម័យកូវីដ-១៩ យើងរៀននៅក្នុងថ្នាក់មិនបាន យើងអនុវត្តតាមអនឡាញធ្វើឱ្យសិស្សទទួលបានការសិក្សាដូចក្នុងថ្នាក់ដែរ”។

លោកបណ្ឌិត បានបន្ថែមថា គេនឹងបញ្ចូលការរៀនតាមបែបឌីជីថលនេះទៅក្នុងកម្មវិធីសិក្សាតែម្តង ដែលអាចឱ្យសិស្សរៀនក្នុងថ្នាក់ក៏បាន រៀនក្រៅថ្នាក់ក៏បាន ព្រោះថា ការរៀនតាមអនឡាញមានសារៈប្រយោជនច្រើន។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ ថាការសិក្សាតាមអនឡាញពិតជាមានសារៈសំខាន់ណាស់ក្នុងដំណាក់កាលការរាតត្បាតជំងឺកូវីដ-១៩។

លោក រស់ សុវាចា បានបន្តថា៖ “ក្នុងបរិបទកូវីដ-១៩ គោលបំណងធំសម្រាប់ការសិក្សាគឺ មានការរៀនសូត្រជាបន្តប្រកបដោយគុណភាព និងចូលរួមជាមួយរាជរដ្ឋាភិបាលក្នុងការគ្រប់គ្រង ទប់ស្កាត់ និងបង្ការការរីករាលដាលនៃជំងឺកូវីដ-១៩ ដោយតម្រូវឱ្យគ្រប់គ្រឹះស្ថានសិក្សា បន្តពង្រឹងការអនុវត្តសុវត្ថិភាពសុខភាពសិក្សា រក្សាគម្លាតសុវត្ថិភាព និងសុវត្ថិភាពចំណីអាហារដល់បុគ្គលិកអប់រំ និងសិស្សានុសិស្ស”។

យ៉ាងណាក៏ដោយ អ្នកនាំពាក្យក្រសួងអប់រំ យុវជន និងកីឡា បានបន្តទៀតថា បច្ចុប្បន្នក្រសួងនៅតែបន្តអនុវត្តការបង្រៀន និងរៀនតាមបែបគន្លងប្រក្រតីភាពថ្មី នៃវិស័យអប់រំ ដោយប្រើប្រាស់កម្មវិធីសិក្សាចម្រុះតាមទិដ្ឋភាពជាក់ស្តែង ពោលគឺរៀននៅក្នុងថ្នាក់ផង និងនៅផ្ទះផង ដោយបែងចែកការសិក្សាឆ្លាស់គ្នាដោយក្នុងមួយថ្នាក់អាចដាក់សិស្សបានប្រមាណពី ៣០ ទៅ ៤០ នាក់ប៉ុណ្ណោះ៕

អត្ថបទ៖ សំអឿន