វិបត្តិកូវីដ៖ រាជរដ្ឋាភិបាល ចំណាយថវិកា ៤៨០លានដុល្លារ ចិញ្ចឹមពលរដ្ឋក្រីក្រ ៣លាននាក់ ក្នុងមួយឆ្នាំ

រាជរដ្ឋាភិបាល បានចំណាយថវិកាប្រមាណ ៤០លានដុល្លារ ក្នុងមួយខែ ស្មើនឹង ៤៨០លានដុល្លារ ក្នុងមួយឆ្នាំ សម្រាប់ជួយដល់ពលរដ្ឋក្រីក្រ ៧០ម៉ឺនគ្រួសារ សរុបប្រជាជន ៣លាននាក់ កុំឱ្យធ្លាក់ក្រោមបន្ទាត់ក្រីក្រ នៅក្នុងវិបត្តិកូវីដ-១៩​​។

​សម្តេច បានគូសបញ្ជាក់ថា« នេះជាការចាំបាច់ ដើម្បីចំណាយ មិនទាន់គិតអំពីការចំណាយលើបញ្ហាព្យាបាលជំងឺផ្សេងៗទេ គឺយើងគិតពីរឿងចិញ្ចឹមប្រជាពលរដ្ឋជាមុនសិន នេះជាសំណាញ់សុវត្ថិភាពសង្គម នៅក្នុងដំណាក់កាលលំបាក»។

ថវិកាដែលជួយទប់ស្កាត់ការចំណាយនេះ បានមកពីការខំប្រឹងប្រែងប្រមូលពន្ធរបស់អគ្គនាយកពន្ធដារ។ អគ្គនាយកពន្ធដារ បានរាយការណ៍ជូនសម្តេចថា គិតត្រឹមថ្ងៃទី២៧ ខែមេសា ចំណូលពន្ធដារសម្រេចបាន៥៣ភាគរយហើយ ពោលគឺគិតចាប់ពីខែ មករា ដើមឆ្នាំមក។

សម្តេចតេជោ បានបញ្ជាក់ថា កាលពីឆ្នាំ ២០២១ ការប្រមូលពន្ធដារសម្រេចបានលើសផែនការ រហូតដល់១២៤ភាគរយ។ ចំណែកនៅត្រីមាសទី១ ឆ្នាំ២០២២នេះ ពន្ធដារ ប្រមូលចំណូលពន្ធបានចំនួន ៥.១១៥,៤២ពាន់លានរៀល ស្មើនឹង ១ ២៦៣,០៧លានដុល្លារ គិតជាភាគរយស្មើនឹង៤៤,៨០% នៃផែនការច្បាប់ហិរញ្ញវត្ថុប្រចាំឆ្នាំ២០២២។

សម្តេចតេជោ នាយករដ្ឋមន្រ្តី សង្កត់ធ្ងន់ថា កំណើនចំណូលពន្ធនេះ ដោយសារតែកម្ពុជាគ្រប់គ្រងបានយ៉ាងល្អនូវសកម្មភាពសេដ្ឋកិច្ច និងសង្គម លើបញ្ហាកូវីដ-១៩។

ការលើកឡើងរបស់សម្តេចតេជោនេះ នៅក្នុងពិធីជួបសំណេះសំណាល និងផ្តល់អនុសាសន៍ ដល់កីឡាករ កីឡាការិនី និងអត្តពលិក មុនចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម ព្រឹកថ្ងៃទី ២៨ ខែមេសា ឆ្នាំ ២០២២៕