​សម្តេចតេជោ ហ៊ុន សែន ថា ​នឹងចូលរួមកិច្ចប្រជុំកំពូលពិសេសអាស៊ាន-អាមេរិក​ ដោយ​ក្តីសោមនស្សរីករាយ​

ឆ្លើយតប​ការអញ្ជើញរបស់​លោក ចូ បៃឌិន (Joseph R. Biden) ប្រធានាធិបតី​សហរដ្ឋអាមេរិក​ ​ដែលបាន​​​អញ្ជើញ​សម្តេច​​តេជោ ហ៊ុន សែន ​ទៅចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោង​ធ្វើឡើងនៅថ្ងៃ​ទី ១២-១៣ ខែឧសភា ឆ្នាំ ២០២២ ខាងមុខ​នោះ​ សម្តេច​​​អះអាងថា នឹង​ចូលរួមកំពូល​ពិសេសអាស៊ាន-សហរដ្ឋអាមេរិក​ ដោយ​ក្តីសោមនស្សរីករាយ​ ពីព្រោះ​​កិច្ចប្រជុំកំពូលពិសេសនេះ ជាឱកាសដ៏ប្រសើរ​ពិភាក្សាពីការជំរុញកិច្ចសហប្រតិបតិ្តការ ព្រមទាំងផ្លាស់ប្តូរ​យោបល់គ្នាលើបញ្ហានានា ដែលជាក្តីបារម្ភ និងជាប្រយោជន៍រួមរបស់អាស៊ាន និងសហរដ្ឋ​អាមេរិក។​

យោតាមលិខិត​​ ដែល​ផ្ញើជូន​លោក ចូ បៃឌិន ប្រធានាធិបតី​សហរដ្ឋអាមេរិក​ សម្តេច​​តេជោ ហ៊ុន សែន​ បានលើកឡើងថា «ខ្ញុំសូមអរគុណឯកឧតុ្តមប្រធានាធិបតី ដែលបានផ្ញើលិខិតអញ្ជើញខ្ញុំចូលរួមកិច្ចប្រជុំ កំពូលពិសេស​អាស៊ាន-សហរដ្ឋ អាមេរិក ដែល​​នឹងប្រព្រឹត្តទៅ​នៅរដ្ឋធានីវ៉ាស៊ីនតោន នាថ្ងៃទី​ ១២-១៣ ខែឧសភា ឆ្នាំ ២០២២។ ខ្ញុំមានសេចក្តីសោមនស្សរីករាយនឹងចូលរួមកិច្ចប្រជុំនេះ»។

សម្តេច​​តេជោ ហ៊ុន សែន​​ លើកឡើងទៀតថា «ខ្ញុំជឿជាក់ថា ការបញ្ជាក់ជាថ្មីនូវប្ដេជ្ញាចិត្តរបស់ឯកឧត្ដម ដើម្បីពង្រឹងថែមទៀតនូវ ទំនាក់ទំនងរវាងសហរដ្ឋអាមេរិក និងអាស៊ាន ជាពិសេសក្នុងឱកាសរំឭកខួបអនុស្សាវរីយ៍ លើកទី ៤៥ នៃទំនាក់ទំនងដៃគូសន្ទនាអាស៊ាន-សហរដ្ឋអាមេរិក នឹងជាជំហានឆ្ពោះទៅមុខ​មួយ ឈានទៅរកការតម្លើងភាពជាដៃគូ របស់យើងឱ្យឡើងដល់កម្រិតខ្ពស់មួយថ្មីទៀត។ ក្នុង ន័យនេះ កម្ពុជាគាំទ្រយ៉ាងពេញទំហឹងលើការកម្ពស់ទំនាក់ទំនងអាស៊ាន-សហរដ្ឋអាមេរិក ពីដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ»។

បើតាមសម្តេច​​តេជោ ហ៊ុន សែន​​ ក្នុងនាមកម្ពុជាជាប្រធានអាស៊ានឆ្នាំ ២០២២ សម្តេចបញ្ជាក់សាជាថ្មីអំពីបំណងប្រាថ្នាដ៏មុតមាំរបស់កម្ពុជា ក្នុងការខិតខំស្វែងរកកាលានុវត្តភាពបន្ថែមទៀត ដើម្បីពង្រីកកិច្ចសហ​ប្រតិបត្តិការអាស៊ាន-សហរដ្ឋអាមេរិកលើគ្រប់វិស័យ។ សម្ដេចតេជោនាយករដ្ឋមន្ត្រី បានបន្ថែមថា «ខ្ញុំជឿជាក់ថា កិច្ចប្រជុំកំពូលពិសេសនេះ ជាឱកាសដ៏ប្រសើរសម្រាប់យើង ពិភាក្សាពីការជំរុញកិច្ចសហ​ប្រតិបតិ្តការ ព្រមទាំងផ្លាស់ប្តូរ យោបល់គ្នាលើបញ្ហានានាដែលជាក្តីបារម្ភ និងជាប្រយោជន៍រួមរបស់អាស៊ាន និងសហរដ្ឋអាមេរិក។ ខ្ញុំទន្ទឹងជួបជាមួយឯកឧតុ្តមដោយផ្ទាល់ នៅរដ្ឋធានីវ៉ាស៊ីនតោន និងត្រៀមធ្វើការ ជិតស្និទ្ធជាមួយឯកឧត្តម​»៕

អត្ថបទ៖ កោះកែវ